Bachfischet

De Bachfischet isch en Bruuch vo de Stadt Aarau.

Er isch all Joor im Septämber voor de Herbschtfeerie. Me kännt de Bachfischet scho sit Joorhunderte. Wämmen äeinisch im Joor de Stadtbach, wo vo de Suure heer chunt, abgschlage hät zum ne chönne putze und wänn druufaben am Oobig s Wasser wider chunt, so waartet d Schuelchind und die Chlyyne vo de Chindsgi uf em Wääg näbetem Bach mit iirne Latäärne a de Stäcken uff d Papyyrschiffli, wo d Suurer Chind uf em Bach i d Stadt abelönd.

Dänn lauffen alli dur d Gasse vo de verdunklete Stadt. Zletscht chunt der Zuug in Schachen abe, wos es schööns Füürwäärch git. Uf em Wääg rüeffet d Klassen i de Stadt de Väärs:

«De Bach isch do, de Bach isch do.
Sind alli mini Buebe do?
Jo, jo, jo!
De Bach isch do, de Bach isch do.
Sind alli mini Mäitli do?
Jo, jo, jo!
Füürio, de Bach brönnt.
D Suurer händ ne’n aazündt!
D Aarauer händ ne glösche.
D Chüddiger, d Chüddiger,
Riitet uff de Frösche.»

Lueg au

• d Lischte vo de läbige Tradizioone vo dr Schwiiz

Weblink

• Bachfischet uf aarau.ch
• Der Bachfischet uf aarauinfo.ch
• Bachfischet uf wirrizunft.ch