Extinción

Reconstrucción d'un dodo (Raphus cucullatus), una especie extinta paradigmatica.

En Biolochía y en Ecolochía, a extinción (pronunciau 'estinción' en aragonés) ye o proceso de desaparición de toz os miembros d'una especie u d'un taxón. En aragonés, l'organismo que ha sufierto a extinción se diz que ye extinto.

Anque tecnicament no se puet considerar extinta una especie dica que o zaguero d'os miembros d'ella s'haiga muerto, si l'habitat que ocupa presenta complicacions puet tornar-se difícil de precisar si en queda bel uno u no. Ixo fa posible o fenomeno d'os taxons lazaro que, de forma que s'asemella con o personache biblico d'an se quitó ixe nombre, son os organismos que «reviscolan» u, millor dito, se tornan a trobar dimpués de tiempo sin que se'n sabese cosa.

A la contra, tamién puet pasar que un organismo sía virtualment extinto sin que s'haiga muerto lo zaguero d'os individuos, como gosa pasar-les a las especies que tienen reproducción sexual pero que toz os individuos que en queda son d'o mesmo sexo. Un eixemplo en o cual pasó esto, en Aragón, fue o bucardo, que en zagueras no quedaban si que fembras y a zaguera acabó por morir en l'anyo 2000.

De manera natural, por efecto d'a evolución, as nuevas especies apareixen por especiación. Atras especies s'extinguen cuan ya no son capables de sobrevivir en as condicions d'o medio natural an viven, en especial si as condicions cambian. Seguntes un estudio, a mayoría d'especies s'extinguen entre os 10 millons d'anyos dimpués d'a suya aparición. Por tanto, a extinción ocurre de traza natural en a naturaleza. Se calcula que o 99,9% d'as especies que bella vez estuvon vivas ya son extintas.

Se veiga tamién

• Especiación.
• Extinción masiva.
• Lugar amortau.

Referencias

• Datos: Q123509
• Multimedia: Extinction / Q123509