跳去內容

經濟泡沫

出自維基百科，自由嘅百科全書
Dr. Greywolf（討論｜貢獻）喺2024年8月23號 (五) 03:57嘅修訂。
【改動】←之前嘅修訂｜最新嘅修訂版本【改動】｜新啲嘅修訂→【改動】
澳洲鎳泡沫嘅圖解；X 軸係時間，Y 軸係鎳嘅價－鎳價喺 1969 年中突然暴跌。

經濟泡沫（粵拼：ging1 zai3 pou5 mut6），又叫資產泡沫，係種經濟現象，指一件資產嘅價持續膨脹，搞到個價脫離咗實際價值[1]：是但搵件市場上嘅資產，件嘢都會有個價－指啲人用幾多錢買賣件嘢；同時件嘢又會有個實際價值－反映件嘢實際上有幾能夠提高個經濟體嘅生產能力；人有陣時會以高過件物品嘅實際價值嘅價嚟買賣件嘢－形成泡沫，造成經濟繁榮嘅假象；而件物品個價一升到咁上下，啲人就會發覺件嘢根本唔值咁多錢，於是個價就會喺短時間內勁跌－個泡爆[2][3]。

經濟泡沫呢家嘢喺歷史上一路都有發生。好似係澳洲鎳泡沫噉：單嘢發生喺 1960 年代嘅澳洲；當時澳洲因為越戰等嘅原因而搞到鎳nip1呢種金屬出現短缺，於是鎳嘅價就自然開始升；打後因為投資者响度炒鎳金屬等嘅原因，個價愈升愈勁，喺 1969 年上半橛升到去成每噸 7,000 英鎊嘅價咁高，一般投資者買唔起；但到咗同年下半橛，啲人發覺鎳根本唔值咁多錢，於是鎳金屬嘅價就喺幾個月內跌咗超過 50% 咁多[4]。

每逢有經濟泡沫爆，就會有好多投資者損手爛腳，造成經濟震盪甚至崩潰。因為噉，好多政府都有嘗試諗辦法阻止泡沫出現，而經濟學上亦有深入研究經濟泡沫。有好多經濟學家主張，經濟泡沫源於有限理性－簡化講，現實嘅投資者喺資訊同認知上會有失誤，搞到佢哋對資產嘅價值有錯誤判斷，令泡沫有可能產生[2][5]；不過呢種諗法唔係個個經濟學家都贊同[6]，而截至廿一世紀初，人類仲未有方法完全消除經濟泡沫[7]。

定義

[編輯]
2015 年香港一間超市有一拃貨；每件貨都有個價錢，反映買家同賣家用幾多錢買賣件貨。
内文：市場價值
睇埋：經濟價值、實際同名目價值同金融危機

首先，思考市場價值[英 1]嘅概念。

想像家陣有個經濟體。由個經濟體裏面是但攞件資產嚟睇，件嘢都會有個「價值」。响經濟學上，有好多指標可以攞嚟衡量一件資產嘅價值，例如實際同名目價值噉，當中最顯而易見嗰種價值係市場價值－件資產嘅市場價值係指買家同賣家喺「雙方都有充足資訊，而且大家都心甘情願」嘅情況下，會用幾多錢買賣件資產[8]。有咗市場價值嘅概念，就可以界定「經濟泡沫」－定義上，經濟泡沫係種經濟現象，指[2]：

  • 一件資產嘅市場價值喺相對短嘅時間之內係噉升，啲人以愈嚟愈貴嘅價買賣件資產－呢個階段係所謂嘅泡沫形成；
  • 個價升到咁上下，就突然間以極快嘅速度跌－呢個階段就算係個泡爆[英 2]咗；

經濟泡沫會對一個經濟體造成深遠嘅影響，而且零舍受投資者關注：當一樣資產－例如係某間上市公司嘅股票－嘅價勁升嗰陣，通常會吸引好多投資者爭住去買入嗰樣資產，因為佢哋諗住買咗就可以等樣資產嘅價遲吓再繼續升，到時自己就有得賣走件嘢圖利；噉表示當個泡爆嗰陣，手上揸住件資產嘅人就會面臨「當初使咗好多錢買件嘢，但件嘢家陣完全唔值錢」噉嘅情況－呢啲人就會損失慘重[2]。

詞源

[編輯]

（粵語意譯）「你唔係傻仔嘅就實睇到，單嘢係點樣一嘢就碎嗮，初頭乜都冇一嘢乜都冇，就好似泡沫爆嗰陣噉樣。」[9]

－奧厘化雲島豪米士
内文：南海公司

經濟泡沫呢隻詞據講係源自南海公司泡沫嘅[10]。

單嘢發生喺 1710 年代嗰陣嘅英國：喺 1711 年嗰時，英國嘅南海公司[英 3]向投資者賣自己啲股票，而且佢哋及後仲話攞到權可以壟斷對南美洲幾笪地方嘅奴隸供應；於是好多人都睇好間公司，想買間公司嘅股票圖利，噉就自然令間公司嘅股價喺短期內升得好勁，而個價响 1720 年嗰陣達到頂峰；不過因為西班牙王位繼承戰爭同埋「南美洲多地都係由西班牙控制住」等嘅問題，南海公司啲生意最後完全搞唔成；最後英國人發覺南海公司根本唔掂，噉間公司啲股票就自然變到完全唔值錢，個價插水式噉跌，搞到數以千計嘅投資者血本無歸[11]。

打後有評論者分析成件事，就打咗個比喻，話南海公司單嘢「好似個番梘泡噉」－「本來係乜都冇，齋靠空氣膨漲，漲到咁上下就會爆，爆咗就變返乜都冇」－呢單嘢據講就係經濟泡沫呢隻詞彙嘅起源[10]。

上圖顯示南海公司嘅股價喺 1719 年至 1720 年之間嘅上落，當中 Y 軸係個股價而 X 軸係時間（每對相鄰日期之間隔咗 5 日）。由幅圖度睇得出，南海公司啲股票嘅價喺 1720 年 2 月頭至同年 6 月尾之間升咗成差唔多 9 倍咁多，但個價喺跟住嗰三個月內急跌，跌到返落原來數值咁滯－如果有位投資者喺啲股價勁升嗰段期間買入咗啲股票，佢就損失慘重。

點樣察覺

[編輯]
「咦？嗰隻股嘅價係噉升緊喎。我唔知間公司做咩生意，不過等我即刻買隻股然後快手賣咗佢賺錢先。」－好似噉嘅係典型嘅投機諗嘢方式。
喺2007年影到嘅一嚿鵝肝；事實表明，啲人搵到快錢，往往會開始大膽咗，猛咁消費鵝肝等嘅奢侈品（財富效應）。
睇埋：市場情緒

喺經濟學同金融學等嘅領域當中，「點樣先可以察覺有經濟泡沫形成」係一條廣受關注嘅問題：玩投資嘅人就會想响有泡沫形成嗰陣及時察覺，費事自己上當買入有泡沫形成嘅資產，或者最少想自己能夠喺個泡爆之前及時賣走樣資產；最基本上，經濟學工作者可以做個案研究[12]－佢哋可以睇返歷史，搵過去發生過嘅經濟泡沫，睇吓呢啲經濟泡沫形成嗰時發生咩事，從而得知「經濟泡沫形成嗰時，傾向有咩跡象」。

喺21世紀初，一般認為以下呢啲跡象都係顯示似有經濟泡沫形成緊[13][14][15]：

期望過高

[編輯]
睇埋：理性預期

經濟泡沫往往涉及投資者對樣資產有高得滯、不切實際嘅期望。

例如1990年代尾嘅科網泡沫[英 4]就畀人指有噉嘅特性，當時啲投資者好多抱住「搞互聯網相關科技嘅公司，買佢哋股票係保證賺」噉嘅心態，雖然互聯網最後的確對世界造成咗巨大嘅影響，但早期搞相關科技嘅公司有好多都係執笠收場嘅－買咗呢啲公司股票嘅投資者就損失慘重[16]。有金融界人士分析返單嘢指，每當有新興產品進入市場嗰陣，搞呢啲產品嘅公司成日都會講到隻產品好似會改變世界噉，引好多人買佢哋股票，不過嘗試創新嘅公司好多時都失敗收場，而且就算隻產品最後成功（好似互聯網噉），依然有可能會有投資者「高估咗隻產品嘅潛力」或者「低估咗隻投資回本要用嘅時間」等嘅情況[17]。

有金融工作者指出，對一隻資產期望高得滯嘅投資者，往往會出現各種唔理性嘅行為，例如係[18]

  • 對隻資產嘅長遠潛力冇深入噉分析、
  • 對盤生意睇法極樂觀，樂觀到覺得搞嗰隻生意係「包保會賺」噉、以至
  • 用「佢哋只係唔明盤生意幾正啫嘛」噉嘅謬論嚟打發懷疑者嘅意見

... 呀噉。

至於「點樣評估隻股票個價係咪合理」，有研究者主張要睇市盈率[英 5]：一般認為，當一隻股票嘅市盈率極高－有人話高過 3 [19]，就顯示似係泡沫喺度形成緊[20]。

其他跡象

[編輯]
睇埋：通脹同財富效應

無視實質走勢：

  • 有金融界人士指，經濟泡沫形成嗰陣，往往有大批投資者拒絕考慮「自己買嗰隻資產或者真係唔掂」嘅可能性；呢啲人士指，噉嘅投資者成日都會將啲消息「合理化」－如果間新興公司真係賺到預期噉嘅利潤，啲投資者會覺得件消息確定咗「間公司的確掂」嘅諗法，不過就算間公司達唔到預期中嘅利潤，啲投資者依然會將件消息合理化，繼續炒高間公司嘅股票[18]；啲投資者彷彿好似覺得「無論消息係點，間公司都係掂嘅」噉[13]。

外行人玩埋一份：

  • 有金融界人士指，經濟泡沫往往涉及啲人對某隻資產嘅升值潛力期望高得滯，而呢種期望通常會快速噉散播，仲會吸引大眾媒體廣泛報導[21]；噉就導致好多唔係好識投資嘅人加入，個個諗住可以輕易賺大錢（睇返投機嘅概念）；例如有金融界人士就噉講[13]－

    粵文翻譯：當的士司機、飛髮師傅同埋雜貨舖職員喺度畀投資貼士你嗰陣，就有跡象顯示有套投資提案擴散咗去主流度，而且吸引緊啲冇咁老練嘅零售式交易人想搵快錢。而佢哋（啲想搵快錢嘅人）好有可能會成功－一段時間（意思係話呢啲唔識投資嘅人成功一段時間後，就會損手爛腳）。[22]

第啲資產跟住升：

  • 有經濟金融界嘅專家指出，喺經濟泡沫「升緊但未爆」嗰段期間，有好多投資者都會手上揸住啲價錢係噉升嘅資產，搵到快錢；呢啲短時間內有錢咗嘅投資者，好多時會開始揮金買嘢（財富效應），尤其係買啲奢侈品（好似係名牌嘅鞋同手袋）或者佢哋覺得「有升值潛力」嘅資產，呢啲奢侈品或者資產多咗人想買，價錢自然會升埋一份[13]；事實係有日本嘅經濟研究睇返歷史，發現股價同啲人對藝術品等奢侈品嘅需求成正相關，而且呢股相關喺經濟泡沫形成嗰陣零舍強[23]。

... 呀噉。

形成原理

[編輯]
低流通度嘅例子：呢棟建築物掛咗個 for sale 牌想搵人買－建築物呢種資產成日要搞一大輪先成交，所以冇得快速轉做現錢。
睇埋：商業週期、投機、展望理論同Gimmick

有唔少經濟學家都醉心研究經濟泡沫呢種現象：除咗純理論性質嘅探究之外，呢啲研究仲有實用價值；經驗表明，經濟泡沫爆會搞到好多人手上嘅資產價值大跌，對經濟造成嚴重衝擊，仲會搞到失業率同自殺率顯著上升[24]。因為噉，實用性質嘅經濟研究會想剖析經濟泡沫嘅成因，加深人類對經濟泡沫呢種現象嘅理解，從而幫手諗方法防止經濟泡沫形成，或者最少減低泡沫形成嘅機率[25][26]。

到咗廿一世紀初，經濟學界對「泡沫嘅成因係乜」呢條問題仲未有共識，有多派見解：

政策成因

[編輯]

「我哋見到嘅呢啲嘢（持續嘅經濟危機），係太多錢喺度追太少投資機會嗰陣時必然會發生嘅。」

－美國經濟學家克魯明[英 6][27]
内文：利率同市場流通度
睇埋：波動性

有經濟學家主張低利率同高市場流通度[英 7]係泡沫嘅主因[28][29]。

  • 利率：利率反映啲人借錢要還嗰陣要畀幾多利息，利率愈高，啲人還錢嗰時就要畀愈多利息；一般嚟講，利率同投資意慾成大致反比－要投資就往往要借錢，如果利率高，就表示做投資嘅成本都高，於是啲人嘅投資意慾就會下降；事實係政府同中央銀行想調控經濟嗰陣，好多時都會靠調節利率嚟左右啲人嘅投資行為，（簡單講）調高利率會令啲人投資意慾跌，變到比較想儲起啲錢，而如果政府同央行想鼓勵啲人投資，好多時會靠調低利率。
  • 市場流通度：流通度係一件資產可以具有嘅特性；如果話一件資產流通度高，即係話件資產可以快速轉做現錢，而且途中唔會搞到佢價值有咩明顯變化；例如建築物呢種資產嘅流通度好低，成日要傾一大輪搞一大輪手續先至可以成交，所以一棟建築物嘅擁有者冇得快速將棟嘢賣咗佢轉做現錢；相比之下，現錢就係流通度最高嘅資產。

有經濟學家主張，當一個經濟體利率低得滯而且有好多高流通度資產流動嗰時，就容易產生經濟泡沫：利率低表示啲人肯借錢做投資，而啲人手上揸得多高流通度資產就更加表示佢哋有好多錢可以隨時攞嚟使[註 1]；噉就表示個經濟體有一大拃人想攞啲錢去做投資，同時投資嘅機會未必係咁充裕（例如個經濟體唔係咁多做到實質創新嘅公司），於是啲人就會出現投機行為，攞啲資產去炒呀噉，需求勁升就會搞到呢啲資產嘅價出現唔合理嘅膨漲－最後形成泡沫[29]。

博傻理論

[編輯]
内文：博傻理論
睇埋：有限理性、恐慌性拋售同羊群效應

有經濟學家就採取比較似行為經濟學嘅觀點，由「投資者做決策嗰陣，往往係跟從某啲簡單法則嘅，唔係靠理性諗嘢」（有限理性）做出發點[30]。

喺呢方面，博傻理論[英 8]係一個好出名嘅諗頭[註 2]。根據博傻理論，有好多投資者都係跟以下呢條簡單法則行事[31][32]：

買一件資產係個價唔合理咁高嘅（做傻仔），再搵另外一個投機買家（搵個更大嘅傻仔）以更高嘅價賣咗件資產佢。

如果按呢條法則行事嘅投資者數量有返咁上下多，件資產嘅價就會慢慢升，而且情況仲會因為羊群效應[英 9]而加劇－喺一場噉嘅博傻泡沫當中，梗會有啲早期嘅參與者搵到大錢，而佢哋嘅故事傳咗出去，就會進一步吸引更多嘅人加入「做傻仔，一齊鬥傻」。最後當件資產個價升到去某個點，嗰啲「最大嘅傻仔」搵唔到「更大嘅傻仔」肯買件資產，件資產嘅價就會插水式急跌－泡爆[33]。

粵文翻譯：對件資產嘅需求，以及佢個價，會被推高並唔係因為投資者相信件資產嘅真實價值升咗，而係源於啲人相信無論佢哋使咗幾多錢買件資產，件資產遲吓都可以用更高嘅價賣畀第個人。

出名泡沫

[編輯]

... 呀噉。

Bitcoin（bit1 kon1）嘅價格隨時間嘅變化走勢圖：喺2011年6月同2013年4月等嘅位，bitcoin 嘅價都喺短時間內勁跌，搞到好多揸住 bitcoin 嘅投資者損手爛腳。

睇埋

[編輯]

文獻

[編輯]

  • Reinhart, Carmen M.; Rogoff, Kenneth S. (2009). This Time is Different: Eight Centuries of Financial Folly. Princeton, NJ: Princeton University Press. ISBN 978-0-691-14216-6.

註釋

[編輯]
  1. ↑ 亦可以睇吓通脹嘅嘢：流通度高嘅資產被指係易因為通脹而實際價值跌，所以啲人有誘因攞呢啲資產去做投資。
  2. ↑ 有人指，博傻理論係就係聽落好合理，但係就最嚴格嘅科學基準嚟講，到咗 2020 年代初學界都仲未搵到充足嘅實證證據撐佢。

英詞

[編輯]
  1. ↑ market value
  2. ↑ crash / burst
  3. ↑ South Sea Company
  4. ↑ dot-com bubble
  5. ↑ price-earnings ratio
  6. ↑ Paul Krugman
  7. ↑ liquidity
  8. ↑ greater fool theory
  9. ↑ herd effect

引咗

[編輯]
  1. ↑ 《辭海》 第二冊 2445 頁 上海辭書出版社。
  2. ↑ 2.0 2.1 2.2 2.3 Ogawa, A., Onozaki, T., Mizuno, T., Asamizuya, T., Ueno, K., Cheng, K., & Iriki, A. (2014). Neural basis of economic bubble behavior. Neuroscience, 265, 37-47.
  3. ↑ Fernando, Vincent (11 October 2010). "The 10 Most Ridiculous Price Bubbles In History". Business Insider. Retrieved 14 May 2019.
  4. ↑ Three Australian Asset-price Bubbles (PDF).
  5. ↑ Lee, I. H. (2013). Speculation under bounded rationality (PDF). Journal of Economic Theory and Econometrics, 24(1), 37-53.
  6. ↑ Girdzijauskas, S., Štreimikiene, D., Čepinskis, J., Moskaliova, V., Jurkonyte, E., & Mackevičius, R. (2009). Formation of economic bubbles: causes and possible preventions. Technological and Economic Development of Economy, 15(2), 267-280.
  7. ↑ Beechy, T. (2006). Devil Take the Hindmost: Chaucer, John Gay, and the Pecuniary Anus. The Chaucer Review, 41(1), 71-85.
  8. ↑ Gale, D. (1955). The law of supply and demand. Mathematica scandinavica, 155-169.
  9. ↑ Quote from The Deacon's Masterpiece or The One-Hoss Shay, by Oliver Wendell Holmes, Sr.，引咗嘅原文："You see, of course, if you're not a dunce, How it went to pieces all at once, — All at once, and nothing first, — Just as bubbles do when they burst."
  10. ↑ 10.0 10.1 A Brief History of Financial Bubbles. Stanford Business.
  11. ↑ Brown, V.L. (1926), "The South Sea Company and Contraband Trade", The American Historical Review, 31 (4): 662-678.
  12. ↑ Temin, P., & Voth, H. J. (2004). Riding the south sea bubble. American Economic Review, 94(5), 1654-1668.
  13. ↑ 13.0 13.1 13.2 13.3 5 sure-fire signs of a stock market bubble. Bankrate.
  14. ↑ How Do You Spot a Financial Bubble?. Yale Insight.
  15. ↑ Five Steps Of A Bubble. Forbes.
  16. ↑ Goodnight, G. T., & Green, S. (2010). Rhetoric, risk, and markets: The dot-com bubble. Quarterly journal of speech, 96(2), 115-140.
  17. ↑ Minsky, H. P., & Kaufman, H. (2008). Stabilizing an unstable economy (Vol. 1). New York: McGraw-Hill.
  18. ↑ 18.0 18.1 5 Bubble Signs That Should Make You Cautious. Forbes.
  19. ↑ A price-to-book ratio measures a company's stock value relative to its assets minus liabilities. Business Insider.
  20. ↑ Leonhardt, David (25 August 2015). "Part of the Problem: Stocks Are Expensive". The New York Times. Retrieved 31 August 2017.
  21. ↑ Teeter, Preston; Sandberg, Jorgen (2017). "Cracking the enigma of asset bubbles with narratives". Strategic Organization. 15 (1): 91-99.
  22. ↑ 原版英文："When the taxi driver, the hair stylist and the grocery clerk are giving you investing tips, it's a good sign that an investment thesis has spilled over to the mainstream and is attracting less sophisticated retail traders looking for a buck. And they may well succeed – for a period of time."
  23. ↑ Hiraki, T., Ito, A., Spieth, D. A., & Takezawa, N. (2009). How did Japanese investments influence international art prices?. Journal of Financial and Quantitative Analysis, 44(6), 1489-1514.
  24. ↑ Chang, S. S., Stuckler, D., Yip, P., & Gunnell, D. (2013). Impact of 2008 global economic crisis on suicide: time trend study in 54 countries. Bmj, 347.
  25. ↑ Garber, Peter M. (1990). "Famous First Bubbles". The Journal of Economic Perspectives. 4 (2): 35-54.
  26. ↑ Froot, Kenneth A.; Obstfeld, Maurice (1991). "Intrinsic Bubbles: The Case of Stock Prices". American Economic Review. 81: 1189-1214.
  27. ↑ Krugman, Paul (24 August 2015). "A Movable Glut". The New York Times. Retrieved 24 August 2015，原文英文："But these [ongoing economic crises] aren't just a series of unrelated accidents. Instead, what we're seeing is what happens when too much money is chasing too few investment opportunities."
  28. ↑ Buchanan, M. (2008). Why economic theory is out of whack 互聯網檔案館嘅歸檔，歸檔日期2015年4月30號，.. New Scientist.
  29. ↑ 29.0 29.1 Porras, E. (2016). Bubbles and Contagion in Financial Markets, Volume 1: An Integrative View. Springer.
  30. ↑ Harmon, D; Lagi, M; de Aguiar, MAM; Chinellato, DD; Braha, D; Epstein, IR; et al. (2015). "Anticipating Economic Market Crises Using Measures of Collective Panic". PLOS ONE. 10 (7): e0131871.
  31. ↑ Zou, X. (2018). Can the greater fool theory explain bubbles? Evidence from China (No. 2018-04). Working Paper.
  32. ↑ The Greater Fool Theory: What Is It?. Hartford Funds.
  33. ↑ "Oxford Business Review - The Greater Fool Theory 互聯網檔案館嘅歸檔，歸檔日期2021年3月3號，.". Oxford Business Review. 30 December 2020. Retrieved 7 November 2021，原版英文："The demand of the asset, and thus its price, is not driven up by the investors' belief that the intrinsic value of that asset has increased, but rather, due to the belief that no matter the price paid for the asset, it can be sold to someone else at a later point in time for a higher price."

拎

[編輯]
維基同享有多媒體嘅嘢：
股市泡沫
由「https://zh-yue.wikipedia.org/w/index.php?title=經濟泡沫&oldid=2170810」收