King's Lynn

King's Lynn
Die "Custom House"
King's Lynn
Koördinate: 52°45′0″N 0°24′0″O
Staat	Verenigde Koninkryk
Land	Engeland
Graafskap	Norfolk
Bevolking
• Totaal	42 800
Poskodedistrik	PE30
Skakelkodes	01553

King's Lynn (uitgespreek /ˌkɪŋz ˈlɪn/, afgekort Lynn) is 'n markdorp en seehawe in die Engelse seremoniële graafskap Norfolk met 'n bevolking van 42 800 in 2007. King's Lynn is padlangs ongeveer 71 km vanaf Norwich geleë en ongeveer 156 km vanaf Londen.

King's Lynn is temidde van 'n uitgestrekte moerasgebied geleë wat plaaslik as die Fenlands of The Fens bekend staan. Die dorp se geskiedenis strek terug tot in die tyd van die Normandiese verowering van Engeland in die 11de eeu. In die Middeleeue het dit as handelsvennoot van die Hanseverbond tot 'n besige Noordseehawe ontwikkel van waar plaaslike produkte soos linnegoed en wol uitgevoer is.

'n Ryk argitektoniese erfenis van Middeleeuse koopmanshuise, waarvan baie langs die Ouserivier met hul eie stoorgeriewe opgerig is, getuig vandag van dié ekonomiese bloeitydperk. In die omgewing van King's Lynn word voortreflike voorbeelde van Engelse country houses (adellike kontreihuise) en kerkgeboue aangetref.