Terminologia Anatomica
Terminologia Anatomica, aŭ TA, kiun oni povas traduki el Latino al Esperanto per Anatomia Terminologio, estas la oficiala internacia terminaro pri homa anatomio. Ĝin estigis la Federacia Komitato pri Anatomia Terminologio (aŭ FCAT, el la Angla Federative Committee on Anatomical Terminology), kiu estis faka laborgrupo kreita de la Internacia Federacio de Anatomiistaj Asocioj (IFAA, el la Angla International Federation of Associations of Anatomists).[1][2]
Post naŭ jaroj da laboro, ĝi estis publikita por la unua fojo en 1998. De aprilo 2011, ĝi ankaŭ estas atingebla interrete ĉe la retejo de la Federacia Internacia Programo pri Anatomiaj Terminologioj (FIPAT, el la Angla Federative International Programme on Anatomical Terminologies), la sukcedanto de la FCAT.[3]
Tiu anatomia terminaro anstataŭas la antaŭan nomenklaturon (Nomina Anatomica, 1955-1998). Ĝi nun konsistigas tutmondan interkonsentan normon en la fako de la homa makroskopa anatomio.[4]
Terminologia Anatomica estas publikigita oficiale en Latino, sed ĝi estas akompanita de angla versio kiel indiko. La uzo de mortinta lingvo, kiu apartenas al neniu, havigas bonvenan neŭtralecon al la elektitaj terminoj.
TA estas formita de 7 444 anatomiaj terminoj, el kiuj 206 estas klasifikitaj en du malsamaj lokoj. Ĝi estas organizita laŭ la jenaj 16 kategorioj:
| TA-kodo | Latinaj nomoj | Esperantaj nomoj | Anglaj nomoj |
|---|---|---|---|
| A01 | Anatomia generalis | Ĝenerala anatomio | General anatomy |
| A02 | Ossa; Systema skeletale | Ostoj; Skeleta sistemo | Bones; Skeletal system |
| A03 | Juncturae; Systema articulare | Artikoj; Artika sistemo | Joints; Articular system |
| A04 | Musculi; Systema musculare | Muskoloj; Muskola sistemo | Muscles; Muscular system |
| A05 | Systema digestorium | Digesta sistemo | Alimentary system |
| A06 | Systema respiratorium | Spira sistemo | Respiratory system |
| A07 | Cavitas thoracis; Cavitas thoracica | Toraka kavo; Torako | Thoracic cavity; Thorax |
| A08 | Systema urinarium | Urina sistemo | Urinary system |
| A09 | Systemata genitalia | Generaj sistemoj | Genital systems |
| A10 | Cavitas abdominis et pelvis | Abdomena kaj pelva kavoj | Abdominopelvic cavity |
| A11 | Glandulae endocrinae | Endokrinaj glandoj | Endocrine glands |
| A12 | Systema cardiovasculare | Kardiovaskula sistemo | Cardiovascular system |
| A13 | Systema lymphoideum | Limfoida sistemo | Lymphoid system |
| A14 | Systema nervosum | Nerva sistemo | Nervous system |
| A15 | Organa sensuum | Sensaj organoj | Sense organs |
| A16 | Integumentum commune | Tegumento | The integument |
Referencoj
[redakti | redakti fonton]- ↑ Oficiala retejo de la FIPAT, sukcedanto de la FCAT
- ↑ Oficiala retejo de la IFAA
- ↑ 1998-a reta versio de Terminologia Anatomica
- ↑ angle Connecting Medical Informatics and Bio-informatics, Rolf Engelbrecht, European Federation for Medical Informatics, A. Geissbuhler, C. Lovis, 2005