bell hooks

bell hooks

(2009)
Biografía
Nacemento	(en) Gloria Jean Watkins 25 de setembro de 1952 Hopkinsville (Estados Unidos de América)
Morte	15 de decembro de 2021 (69 anos) Berea (Estados Unidos de América)
Causa da morte	insuficiencia renal
Grupo étnico	Afroamericano
Relixión	Budismo
Educación	Universidade de California - lingua inglesa (–1983) Hopkinsville High School (en) Universidade Stanford - grao en Artes
Actividade
Campo de traballo	Estudos de xénero, teoría crítica da raza, actividade literaria, cultural criticism (en) , Cultura de masas, etnicidade, xénero, feminismo, Activismo e interseccionalidade
Ocupación	filósofa, profesora universitaria, escritora
Empregador	Berea College (pt) (2004–2021) Universidade da Cidade de Nova York (1994–2004) Oberlin College (1988–1994) Universidade Yale (1985–1988) Universidade do Sur de California Universidade Estatal de San Francisco
Influencias	Sojourner Truth, Paulo Freire, Gustavo Gutiérrez Merino, Erich Fromm, Lorraine Hansberry, Thích Nhất Hạnh, James Baldwin, Malcolm X, Martin Luther King e Toni Morrison
Pseudónimo literario	bell hooks
Obra
Obras destacables (1981) Ain't I a Woman? (livro) (pt) (1984) Teoria Feminista Da Margem ao Centro (pt) (1996) Bone Black: Memories of Girlhood (en) (2000) Tudo sobre o amor: Novas Perspectivas (pt) (2004) We Real Cool: Black Men and Masculinity (en)
Arquivos en	Berea College (pt)
Premios
(1991)  Premios American Book
Descrito pola fonte	Obálky knih, Encyclopedia of African American Women Writers (en) Notable Black American Women

Gloria Jean Watkins, nada o 25 de setembro de 1952 en Hopkinsville, Kentucky, nos Estados Unidos e finada en Berea, Kentucky o 15 de decembro de 2021, coñecida como bell hooks (escrito en minúsculas), foi unha escritora, feminista e activista social. O nome "bell hooks" deriva do da súa bisavoa materna, Bell Blair Hooks.

Traxectoria

hooks naceu na pequena aldea de Hopkinsville, segregada de Kentucky no seo dunha familia da clase traballadora. A súa nai, Rosa Bell Watkins era ama de casa e o seu pai Veodis Watkins conserxe. Tivo cinco irmás e un irmán. Foi unha ávida lectora que se educou nas escolas públicas con segregación racial e escribiu sobre as grandes dificultades que lle supuxo o paso a unha escola integrada, onde o profesorado e alumnado era de maioría branca. Graduouse na Hopkinsville High School de Hopkinsville, Kentucky. Obtivo unha licenciatura en inglés na Universidade Standford en 1973 e unha mestría en inglés na Universidade de Wisconsin-Madison en 1976.

No ano 1983, despois dalgúns anos de ensino e escritura, rematou un doutoramento en literatura na Universidade de California, Santa Cruz, cunha tese sobre a autora Toni Morrison.

Carreira profesional

A carreira docente de hooks comezou en 1976 como profesora de inglés e profesora titular de estudos étcnicos na Universidade do Sur de California. Durante os tres anos que pasou alí, a editorial Golemics publicou en 1978 a súa primeira obra de poemas There We Wept asinada co pseudónimo bell hooks. Admiraba moito a súa bisavoa materna, por iso adoptou o seu nome como pseudónimo, pero con letras minúsculas, "porque o importante non son eu, é o traballo", dixo.

Foi docente en varias institucións entre principios dos anos oitenta e noventa, incluídas a Universidades de California, Santa Cruz, a Universidade Estatal de San Francisco, Yale, o Oberlin College e o City College de Nova York.

South End Press publicou a súa primeira obra relevante, Ain't I a Woman?: Black Women and Feminism en 1981, aínda que a escribira anos antes, cando era unha estudante.​ Nas décadas transcorridas dende a súa publicación, este libro gañou un recoñecemento xeral como unha contribución influente no pensamento feminista.

Ain't I a Woman? examina varios temas recorrentes na súa obra posterior: o impacto histórico do sexismo e o racismo nas mulleres negras, a desvalorización das mulleres negras, os roles e o retrato nos medios, o sistema educativo, a idea dun patriarcado capitalista supremacista branco, a marxinación do negro e das mulleres así como o desprezo polos problemas de raza e clase dentro do feminismo. Dende a publicación do libro, converteuse nunha pensadora política e crítica cultural de esquerdas e posmoderna. Algunhas feministas cítana con frecuencia como unha autora que pode dar a mellor solución para a dificultade de definir algo tan diverso como o feminismo, abordando o problema de se poder significar todo o non significar nada. Ante a pregunta "que é o feminismo?", hook responde que é un movemento para rematar co sexismo, a explotación sexista e a opresión.

O enfoque da escritura de hooks foi a interseccionalidade entre raza, capitalismo e xénero, e o que ela describe como a súa capacidade para producir e perpetuar sistemas de opresión e dominación de clase. Publicou máis de 40 libros e numerosos artigos académicos, apareceu en documentais e participou en conferencias públicas. Ocupouse da raza, a clase e o xénero na educación, a arte, a historia, a sexualidade, os medios de comunicación e o feminismo.

En 2014 fundou o Instituto bell hooks en Berea College, Berea, Kentucky.