Relegion

La Religion (de l latin: "religio" ousado na Bulgata, que quier dezir "prestar culto a ua debindade", “ligar nuobamente", ó solo "religar") puode ser defenida cumo un cunjunto de crenças relacionadas cun aqueilho que l'houmanidade cunsidra cumo subrenatural, debino, sagrado i trancendental, bien cumo l cunjunto de rituales i códigos morales que deriban dessas crenças.

Simblos de bárias religiones.

Eitimologie

Pormenor dua Bíblia de l seclo XV.

La palabra mirandesa religion deriba de la palabra latina religio, mas çconhece-se al cierto que relaçones stablece religio cun outras palabras. Peç que ne l mundo latino anterior al nacimiento de l crestianismo, religio referie-se a un stilo de cumportamiento marcado pula regideç i pula percison.

La palabra "religion" fui ousada durante seclos ne l cuntesto cultural de la Ouropa, marcado pula persença de l crestianismo que se apropiou de l termo latino religio. An outras ciblizaçones nun eisiste ua palabra eiquibalente. L hinduísmo antigo outelizaba la palabra rita qu'apuntaba para l'orde cósmica de l mundo, cula qual todos ls seres deberian star harmonizados i que tamien se referie a la correta eisecuçon de ls ritos puls brámanes. Mais tarde, l termo fui sustituído por dharma, termo qu'atualmente ye tamien ousado pul budismo i que diç l'eideia dua lei debina i eiterna.

Storicamente fúrun propuostas bárias eitimologies para l'ourige de religio. Cícero, na sue obra De natura deorum, (45 a.C.) diç que l termo ten a ber cun reileger, reler, sendo caratelístico de las pessonas religiosas prestáren muita atençon a todo l que se relacionaba culs diuses, relendo las scrituras. Esta propuosta etimológica sublinha l caráter repetitibo de l fenómeno religioso, bien cumo l'aspeto anteletual. Mais tarde, Latáncio (seclo III i IV d.C.) rejeita l'anterpretaçon de Cícero i diç que l termo ben de religare, religar, dezindo que la religion ye un laço de piedade que sirbe para religar ls seres houmanos a Dius.

Ne l libro "La Cidade de Dius" Agostinho de Heipona (seclo IV d.C.) afirma que religio deriba de religere, "releger". Atrabeç de la religion l'houmanidade reeilegie de nuobo la Dius, de l qual se tenie separado. Mais tarde, na obra De bera religione Agostinho retoma l'anterpretaçon de Latáncio, que bia an religio ua relaçon cun "religar".

Macróbio (seclo V d.C.) cunsidra que religio ben de relinquere, algo que mos fui deixado puls antepassados.

Andependiente de l'ourige, l termo ye adotado para chamar qualquiera cunjunto de crenças i balores que cumponen la fé de determinada pessona ó cunjunto de pessonas. Cada religion anspira ciertas normas i motiba ciertas práticas.

Palabras i Cunceitos Relebantes

Eisisten palabras que son dezidas/screbidas muita beç ne l çcurso religioso griego, romano, judiu i crestiano. Antre eilhes stan: sacro i sous deribados (sacrar, sagrar, sacralizar, sacramentar, eisecrar), profano (profanar) i dius(s). L cunceito dessas palabras baria muito cunsante la época i la religion de quien ls amprega. Inda assi, ye possible ber un mínimo quemun a la grande parte de ls cunceitos atrebuídos als termos.

Ls religiosos griegos, romanos, judius i crestianos acraditan na eisisténcia de bários(griegos i romanos) ó dun único dius (judius i crestianos), un ser ampassible de ser sentido puls sensores houmanos i que ye capaç de porbocar acuntecimientos amprobables/ampossibles que puoden faborecer ó prejudicar ls homes. Pa ls religiosos, las cousas i las aciones se debiden antre sacras i profanas. Sacro ye aqueilho que mantén ua ligaçon/relaçon cul(s) dius(s). Profano ye aqueilho que nun mantén nanhue ligaçon cul(os) dius(es). Para alguns religiosos, "profano" ye un termo pejoratibo, para outros nó. Yá l berbo "profanar" (tornar algo profano) ye siempre tido cumo ua açon mala puls religiosos.

Cunceito de Religion

Praça de San Pedro, ne l Baticano.

Drento de l que se define cumo religion puode-se achar muitas crenças i filosofies defrentes. Las muitas religiones de l mundo son de fato muito defrentes antre si. Inda assi ye possible stabelecer ua caratelística an quemun antre todas eilhas. Ye fato que to religion ten un sistema de crenças ne l subrenatural, giralmente ambolbendo debindades ó diuses. Las religiones questuman tamien tener relatos subre l'ourige de l Ouniberso, de la Tierra i de l Home, i l qu'acunte apuis de la muorte. La maior parte acradita na bida apuis de la muorte.

La religion nun ye solo un fenómeno andebidual, mas tamien un fenómeno social. La eigreija, l pobo scolhido (l pobo judiu), l partido quemunista, son eisemplos de doutrinas que eisigen nun solo ua fé andebidual, mas tamien adeson a un cierto grupo social. Atenten, por eisemplo, a las perseguiçones de l Partido Quemunista Chinés a la seita Falun Gong. L Partido Quemunista Chinés antende que la religion nun seia neçaira la sociadade chinesa.

La eideia de religion cun muita frequéncia cuntempla l'eisisténcia de seres superiores que tenerien anfluéncia ó poder de determinaçon ne l çtino houmano. Esses seres son percipalmente diuses, que quedan arriba dun sistema que puode ancluir bárias catadories: anjos, demónhos, eilementales, semidiuses, etc.

Outras defeniçones mais amplas de religion çpensan l'eideia de debindades i focalizan ls papéles de zambolbimento de balores morales, códigos de cunduta i senso coperatibo an ua quemunidade.

Ateísmo ye la negaçon de l'eisisténcia de qualquier tipo de dius i de la beracidade de qualquiera religion teísta. Agnosticismo ye la dúbeda subre l'eisisténcia de dius i subre la beracidade de qualquiera religion teísta, por falta de probas faborables ó cuntrárias. Deísmo ye la crença nun dius que solo puode ser coincido atrabeç de la rezon, i nun de la fé i rebelaçon.

Alguas religiones nun cunsedarun deidades, i puoden ser cunsidradas cumo ateístas (inda que l'ateísmo nun seia ua religion, el puode ser ua caratelística dua religion). Ye l causo de l budismo, de l cunfucionismo i de l taoísmo. Recentemiente surgiran mobimientos specificamente birados para ua prática religiosa (ó aparecida) de la parte de deístas, agnósticos i ateus - cumo eisemplo puoden ser citados l Houmanismo Laico i l Ounitário-Ounibersalismo. Outros criaran sistemas filosóficos alternatibos cumo August Comte fundador de la Religion de la Houmanidade.

Las religiones qu'afirman l'eisisténcia de diuses puoden ser classeficadas an dous tipos: monoteísta ó politeísta. Las religiones monoteístas (monoteísmo) admiten solamente l'eisisténcia dun único dius, un ser supremo. Las religiones politeístas (politeísmo) admiten l'eisisténcia de mais dun dius.

Atualmente, las religiones monoteístas son dominantes ne l mundo: judaísmo, crestianismo i Eislon juntos ajuntan mais de la metade de ls seres houmanos i quaijeque la totalidade de l mundo oucidental. La Fé Bahá'í ye ua religion monoteísta.

Caratelísticas de las religiones

Inda que cada religion apersente eilemientos própios, ye tamien possible ber eilemientos quemunes a las bárias religiones i que puoden permitir un melhor antendimiento de l fenómeno religioso.

Las religiones ténen grandes narratibas, que splican l'ampeço de l mundo ó que legitiman la sue eisisténcia. L eisemplo mais coincido ye talbeç la narratiba de l Génesis na tradiçon judaica i crestiana. De la legitimaçon de l'eisisténcia i de la balidade dun sistema religioso, este questuma ambocar a ua rebelaçon ó a l'oubtençon dua sabedorie por parte dun fundador, cumo acuntece ne l budismo, adonde l Buda alcançou l'eiluminaçon anquanto meditaba debaixo dua fieira ó ne l Eislon, an que Muhammad recebiu la rebelaçon de l Coron de Dius.

Las religiones tenden tamien a sacralizar determinados locales. Ls motibos para essa sacralizaçon son bariados, podendo star relacionados cun determinado eibento na stória de la religion (por eisemplo, l'amportáncia de l Muro de las Lamentaçones ne l judaísmo) ó porque a esses locales son associados acuntecimientos miraculosos (santuários católicos de Fátima ó de Lourdes) ó porque son marcos d'eibentos religiosos relacionados a la mitologie de la própia religion (menumientos megalíticos, cumo Stonehenge, ne l causo de las religiones paganas). Na antiga religion griega, ls templos nun éran locales para la prática religiosa, mas si locales adonde se acraditaba qu'habitaba la debindade, sendo por esso sagrados.

Las religiones stabelecen que ciertos períodos temporales son speciales i dedicados a ua anteraçon cul debino. Esses períodos puoden ser anuales, mensales, sumanales ó puoden mesmo ser al longo dun die. Alguas religiones achan que ciertos dies de la sumana son sagrados (Shabat ne l judaísmo ó l Demingo ne l crestianismo), outras marcan esses dies sagrados d'acordo cun fenómenos de la naturaleza, cumo las fases de la luna, na religion Wica, an que to purmeiro die de luna chena sbat ye cunsidrado sagrado. Las religiones proponen fiestas ó períodos de jejun i meditaçon que se zambolben al largo de l'anho.

L studo de la religion

Stória de l studo de la religion

Las purmeiras reflessones subre la religion fúrun feitas puls antigos Griegos i Romanos. Xenofonte relatibizou l fenómeno religioso, dezindo que cada cultura criaba diuses a la sue semelhança. L storiador griego Heródoto çcrebiu nas sues Stórias las bárias práticas religiosas de ls pobos qu'ancuntrou durante las biaiges qu'afatuou. Cunfrontado culas defrenças eisistentes antre la religion griega i la religion de ls outros pobos, tentou eidantificar alguns diuses de las culturas strangeiras culs diuses griegos. L sofista Protágoras declarou çcoincer se ls diuses eisistian ó nó, posiçon que tubo cumo cunsequéncias la sue spulson de Atenas i l queimar de to la sue obra. Críties defendiu que la religion serbie para deciplinar ls seres houmanos i fazer cun qu'estes aderissen als eideales de la birtude i de la justícia. Júlio César i l storiador Tácito çcrebírun nas sues obras las práticas religiosas de ls pobos qu'ancuntrórun durante las sues cunquistas militares.

Ne ls purmeiros seclos de l'era atual, ls outores crestianos screbírun reflexones alredror de la religion fruito de ls ataques que sperimentórun por parte de ls outores pagones. Estes creticában l fato desta religion ser nuoba quando acumparada cula antiguidade de ls cultos pagones. Cumo respuosta l'esta alegaçon, Eusébio de Cesareia i Agostinho de Heipona amostrórun que l crestianismo se anserie na tradiçon de las scrituras hebraicas, que relatában l'ourige de l mundo. Para ls purmeiros outores crestianos, l'houmanidade era d'ampeço monoteísta, mas tenie sido currumpida puls cultos politeístas qu'eidantificában cumo obra de Satanás.

Durante la Eidade Média, ls pensadores de l mundo muçulmano rebelórun un coincimiento mais perfundo de las religiones que ls outores crestianos. Na Ouropa, las biaiges de Marco Polo permitiran coincer alguns aspetos de las religiones de la Ásiamas la bison subre las outras religiones era lemitada: l judaísmo era cundenado pul fato de ls judius tenéren reijeitado Jasus cumo messias i l'eislon era bisto cumo ua heresie.

L Renacimiento fui un mobimento cultural i artístico que percuraba rebibir ls moldes de la Antiguidade. Assi sendo, ls antigos diuses de ls griegos i de ls romanos deixórun de ser bistos pula eilite anteletual i artística cumo demónhos, sendo representados i studados puls artistas que ls representában. Nicolau de Cusa rializou un studo acumparado antre l crestianismo i l'eislon an obras cumo De pace fidei i Cribatio Alcorani. An Marsílio Ficino ancontra-se un antresse an studar las fuontes de las defrentes religiones; este outor bia tamien ua cuntinidade ne l pensamiento religioso. Giobanni Pico della Mirandola antressou-se pula tradiçon mística de l judaísmo, la Cabala.

Las çcubiertas i la spanson ouropéia puls cuntinentes, tubírun cumo cunsequéncia la sposiçon de ls ouropeus la culturas i religiones que éran muito defrentes de las sues. Ls missionários crestianos rializórun çcriçones de las bárias religiones, antre eilhas stan las de Roberto de Nobili i Matteo Rici, jesuítas que coincírun bien las culturas de la Índia i de la China, adonde bibírun durante anhos.

An 1724 Joseph François Lafitau, un padre jesuíta, publicou l'obra Moeurs des sauvages amériquaines cumparées aux moeurs des premiers temps na qual cumparaba las religiones de ls índios, la religion de la Antiguidade Clássica i l catolicismo, tenendo chegado a la cuncluson de qu'estas religiones deribában dua religion primordial.

Ne ls finales de l seclo XVIII i ne l'ampeço de l seclo XIX parte amportante de ls testos sagrados de las religiones tenien yá sido traduzidos nas percipales lénguas ouropéias. Ne l seclo XIX acuntece tamien la struturaçon de l'antropologie cumo ciéncia, tendo bários antropólogos se dedicado al studo de las religiones de ls pobos tribales. Nesta época ls ambestigadores refletiran subre las ourigenes de la religion, tenendo alguns defendido un squema eibolutibo, ne l qual l'animismo era la forma religiosa primordial, que depuis eiboluíe para l politeísmo i mais tarde para l monoteísmo.

Abordaiges deciplinares

Un feiticeiro de ls Camarones.

L studo científico de la religion ye atualmente rializado por bárias deciplinas de las ciéncias sociales i houmanas. La Stória de las Religiones, nacida na segunda metade de l seclo XIX, studa la religion atrabeç de ls métodos de l'ambestigaçon stórica. Eilha studa l cuntesto cultural i político an que determinada tradiçon religiosa eimergiu.

La Sociologie de la Religion analisa las religiones cumo fenómenos sociales, percurando çbendar l'anfluéncia deilha na bida de l'andebíduo i de la quemunidade. La Sociologie de la Religion ten cumo percipales nomes Emile Durkhein, Karl Marx,Ernst Troeltsch, Max Weber i Petener Berger.

La Antropologie, tradecionalmente centrada ne l studo de ls pobos sin scrita (inda que ls sous campos de studo puodan ser tamien las modernas sociadades capitalistas), zambolbeu de eigual modo ua ária de studo de la religion, na qual se speculou subre las ourigenes i funçones de la religion. John Lubbock, ne l libro The Origin of Civilization and the Primitibe Cundition of Man apersentou un squema eibolutibo de la religion: de l'ateísmo (antendido cumo falta d'eideias religiosas), passa-se para l xamanismo, l'antropomuorfismo, l monoteísmo i por fin para l monoteísmo ético. Esta bison eibolucionista fui puosta an causa por outros ambestigadores, cumo I.B. Taylor que cunsidraba l'animismo cumo la primitiba forma de religion.

La Fenomenologie de la Religion, que deriba de la filosofie fenomenológica de Edmund Husserl, tenta caçar l lado único de la speriéncia religiosa. Outiliza cumo percipal método científico l'obserbaçon, splicando ls mitos, ls símbolos i ls rituales. Eilha percura cumprender la religion de l punto de bista de l crente, bien cumo l balor dessas crenças na bida de l mesmo. Por estas rezones eibita ls juízos de balores (cunceitoabandono de qualquiera juízo de balor). Ls percipales nomes ligados a la Fenomenologie de la Religion son Nathan Soderblon, Garardus ban der Leuw, Rudolf Otto, Friedrich Heiler i Mircea Eiliade.

Classeficaçon de las religiones

Classeficaçon geográfica

Esta classeficaçon percura agrupar las religiones cun base an critérios geográficos, cumo la cuncentraçon nua determinada region ó l fato de ciertas religiones tenéren nacido na mesma region de l mundo. Las catadories mais ampregues son las seguintes:

• Religiones de l Médio Ouriente: judaísmo, crestianismo, eislon, zoroastrismo, fé bahá'í;
• Religiones de l Stremo Ouriente: cunfucionismo, taoísmo, budismo mahayana i xintoísmo;
• Religiones de la Índia: hinduísmo, jainismo, budismo i siquismo;
• Religiones africanas: religiones de ls pobos tribales de la África Negra;
• Religiones de la Ouceanie: religiones de ls pobos de las eilhas de l Pacífico, de la Austrália i de la Nuoba Zelándia;
• Religiones de la Antiga Grécia i Roma.

Esta classeficaçon ye porblemática, pus alguas religiones nun stan lemitadas nua dada region (cumo por eisemplo l'eislon) i porque alguas religiones nun son atualmente relebantes na region geográfica an que se ampeçórun (eisemplo de l crestianismo, qu'ambora tubisse nacido ne l Médio Ouriente ye hoije minoritário naqueilha region de l mundo).

La religion ne l mundo cuntemporáneo

Adetos de l Cao Dai, ua religion sincrética surgida ne l seclo XX.

Zde ls finales de l seclo XIX, i an particular zde la segunda metade de l seclo XX, l papel de la religion, bien cumo l sou númaro d'aderentes, ten-se alterado muito.

Alguns países an que la tradiçon religiosa stubo storicamente ligada al crestianismo, an cuncreto ls países de la Ouropa, sperimentórun un segneficatibo declínio de la religion. Este declínio manifestou-se na deminuiçon de l númaro de pessonas que frequenta serbícios religiosos ó de l númaro de pessonas que deseian abraçar ua bida monástica ó ligada al sacerdócio.

An cuntraste, ne ls Stados Ounidos, na América Latina i na África susariana, l crestianismo crece muito; para alguns studiosos estes locales seran nun feturo próssimo ls nuobos centros desta religion. L eislon ye atualmente la religion que mais crece an númaro d'adetos, que nun se circunscriben al mundo árabe, mas tamien al sudeste asiático, i la quemunidades na Ouropa i ne l cuntinente americano. L hinduísmo, l budismo i l xintoísmo ten la sue grande ária d'anfluéncia ne l Stremo Ouriente, inda que las dues purmeiras tradiçones anfluencien cada beç mais la spiritualidade de ls habitantes de l mundo oucidental. La Índia, adonde cerca de 80% de la populaçon ye hindu, ye un de ls países mais religiosos de l mundo, quedando an segundo lugar atrás de ls Stados Ounidos. Las splicaçones para l crecimento de las religiones nestas regiones ancluen l zanimo culas grandes eideologies de l seclo XIX i XX, cumo l nacionalismo i l socialismo.

Por outro lado, l mundo oucidental ye marcado por práticas religiosas sincréticas, ligadas a ua "religion andebidual" de cada un faç para el i al aparecimiento de ls chamados "nuobos mobimentos religiosos". Inda que nin todos esses mobimentos séian assi tan nuobos, l termo ye ousado para falar de ls mobimentos neocristones (Mobimento de Jasus), judaico-crestianos (Judius por Jasus), mobimentos d'anspiraçon ouriental (Mobimento Hare Krishna) i la grupos qu'animan al zambolbimento de l potencial houmano atrabeç por eisemplo de técnicas de meditaçon (Meditaçon Transcendental).

Tamien persente na Ouropa i ne ls Stados Ounidos de la América ye aqueilho que ls ambestigadores chaman cumo ua "nubrina místico-sotérica", qu'apela la práticas cumo l xamanismo, l tarot, l'astrologie, ls mistérios i an que sues atibidades son al redror de l'ourganizaçon de cunferéncias, stágios, rebistas i libros. Alguas de las caratelísticas desta nubrina místico-sotérica son las centralidades de l'andebíduo que debe caminar un camino pessonal d'aperfeiçoamento atrabeç de l'outelizaçon de práticas cumo l'ioga, la meditaçon, l'eideia de que todas las religiones puoden cumbergir, l deseio de paç mundial i de l aparecimeiento dua nuoba era marcada por un nible superior de cuncéncia.