Essay

Nen essay is ne tekstård wårin nen skryver uutlegt wo as hee dächt oaver saken dee as nu spöälet in de måtskappye, de weatenskop, filosofy of up kultureel vlak. Wo lange nen essay müt weasen sint gin reagels vöär, mär vake is et deepgraevender en länger as en nöälstükken. Wat der in nen essay steyt kan eavengood in nen breef, artikel, pamflet of kort verhaal stån. Et woord kümt van et franske 'essai', wat probeersel of prove bedüdt. Den eyrsten wat nen essay skreav was Michel de Montaigne, den as der in 1580 en heyl bookwark van uutgavven.

Nen essay kan formeel mär ouk informeel weasen. Formele essays sint vake wat länger, hebbet nen seriösen toun un waerdigheid. Informele essays hebbet vake en persöönlik gevööl; ne ingeaving van den skryver, nen vöärköär, smaak of beleaving, humor, syrlik of jüüst nen alsmär döärrättelenden styl.

Essays geavet vake literären kritik, gåt oaver politik, of oaver insichten uut et dagelikse leaven van den skryver. Souwat alle moderne essays sint prosa, mär der sint ouk wal essays up rym (a.v. Alexander Pope syn An Essay on Criticism un An Essay on Man). De meyste essays sint meysttyds neet meyr as en paar bladsyden, mär der sint ouk essays dee as heyle böker vüllet, sou as John Locke's An Essay Concerning Human Understanding un Thomas Malthus's An Essay on the Principle of Population.

In wat engelsk-talige landen müttet studenten verplicht essays skryven vöär de untwikkeling van nen egen skryvstyl. Ouk künnet universiteiten nen anmeldingsessay van nye studenten verlangen. By geystesweatenskoppen müttet studenten vake as eksamen nen essay inleyveren, üm to låten seen dat se de leyrstof begreapen hebbet.

Et idee van nen 'essay' is ouk up andere media oaverdraegen. Nen filmessay is nen film wårin as dokumentäre-achtige elementen sittet. Et verkennet en tema of idee. Nen foto-essay behandelt en underwarp in bealden med wat begeleidenden tekst der by.