Wölp

Golden Retriever, 2 Maanden oold

En Wölp ( Wülp, Welp) warrt en Jungdeert van Caniden nöömt, sünnerlich van Huushunnen. Sünners wenn de Teev hehr Jungen noch gifft, is de Beteken begäng .

Geboort

De Drachttied duert bi Hunnen in’t Middel 63 bit 64 Daag. Wenn de Teev en grote Tall Wölpen kriggt, kann se en poor Daag fröher wörpen, wenn se en lütt Worp verwacht, en poor Daag later.

Phasen binnen de Wölpentied

Wölpen künnt en ünnerscheedlich Gewicht hebben, wenn se boren warrt. Dat hangt dorvan af, wat se to en grote oder en lütte Raaß tohört. Hunnen van lütte Raßen weegt deelwies blots een Pund, Hunnen van grot Raßen bit to 20 Pund. De Hunnen fangt glieks na de Geboort an, an de Titten van de Moder to sugen. Eerst sünd de Wölpen blind un doov. Man se künnt al glieks na de Geboort röken. Mit jemehr Nees söökt se ok jemehr Moder un de anner Leden van den Worp. So na teihn Daag doot de Ogen sück ok na un na apen. Dat duert en poor Daag. De Ohren doot sik na 13 bit 17 Daag apen.

Wenn de Lütten so bi twee bit veer Weken oolt sünd fangt se an to gnarren, to blaffen, to bieten un to weddeln. De eersten dree Weken in jemehr Leven slaapt un suugt de Wölpen sowat 70 % van de Tiet. De Teev gifft jem üm un bi dree bit veer Weken lang den Titt. Dorna fangt de lütten Tähnen van de Wölpen to kniepen an. Se gifft denn jümmers rorer den Titt. So wennt se ehr Jungen dat Sugen aff. De Lütten fangt denn an, Foder to freten. De Wölpen kamt mehr en mehr up jemehr egen Benen to stahn.

Wenn de jungen Hunnen so üm 8 Weken oolt sünd, warrt se na jemehr tokamen Baas bröcht. In de Tiet van 8 bit 12 Weken is dat Leven van en Wölp sünners op slapen, freten un spelen utricht. Achteran folgt en Periood, in de anfangt sien Charakter uttobilln. De Bregen höört na 12 Weken op to wassen un is denn vull utbillt. Üm un bi 12 bit 16 Weken lööst sik de Wölp jümmer mehr van de Moder af.

In de Tiet tüschen 6 un 9 Maanden is de Wölp in de Pubertät. De letst Periood, eh de Hunnen utwassen sünd, is de Tiet van’n 9. bit to’n 12. Maand. De lütten Hunnen hebbt dat Beren van en Teenager, man höört nu op dat Seggen vun’n jemehrn Baas. Na en Johr warrt en Wölp denn meist blots noch Hund nöömt.