Mančester

Mančester
Manchester
	Lidnanznam;
Valdkund	Sur' Britanii
Eläjiden lugu (2021)	549,853 ristitud
Pind	115,65 km²
Pämez'	Jasmin Dar; (semendku 2023—,; Yasmine Dar)
Telefonkod	+44-(0)161
Aigvö	tal'vel UTC+0,; kezal UTC+1

Mančester (angl.: Manchester ['mænʧɪstə]) om Suren Britanijan seičemenz' da Anglijan kudenz' lidn eläjiden lugun mödhe. Sijadase Lodehline Anglii-regionas, Sur' Mančester-grafkundas.

Nügüd'aigan Mančester om kul'turan, tegimišton da rahaazjoiden järed keskuz.

Istorii

Eländpunkt sai lidnan (town) statusan vl 1301, sikš miše torguz oli sigä. Vozil 1359−1838 lidn eli borough-statusata.

19. voz'sadal lidn oli elänu läbi tegimištkukerduses, sid' tegihe valdkundan tekstil'tegimišton päkeskuseks. Vl 1830 raudte ühtenzoiti Mančesterad lähižen Liverpulinke. Se oli mail'man ezmäine kaks'raižuine raudte, ezmäižikš ajajiden puruvedimidenke da aigplanan mödhe.

Vozil 1830−1840 Mančester oli joudjan torguindan polenpidajiden keskuseks. Vl 1868 lidn vastsi Britanižiden profühtnendoiden kongressan ezmäižen suiman.

Lidn om olmas siti-statusanke vspäi 1853.

Vl 1919 neciš lidnas Ernest Rezerford sai himišt elementad ratud tel ezmäižen kerdan (¹⁴N + α → ¹⁷O + proton).

Vl 1948 mail'man ezmäine programkompjuter oli sätud Mančesteras, andmused da programad kaičihe ühtes muštos fon Neimanan arhitekturan mödhe.

Geografijan andmused

Lidn sijadase Anglijan lodehes, se seižub Penninad-mägiden päivlaskmaižen pautkenno, Irvell-jogen muugotil randoil, 38 metrad ü.m.t. keskmäiženke korktusenke.

Klimat om ven Atlantižen valdmeren märg. Voden keskmäine lämuz om +10 C°, kezakun-elokun +14,6..+16,6 C°, tal'vkun-uhokun +4,5..+4,6 C°. Ekstremumad oma −15 C° (viluku) i +37 C° (heinku). Kezaaigan minimum om +0,8 C° (kezaku), tal'vaigan maksimum om +19 C° (uhoku). Paneb sadegid 829 mm vodes, enamba redukus-tal'vkus (81..92 mm kus), vähemba uhokus-semendkus (51..61 mm kus). Paneb lunt 7 sm tal'ves keskmäras. Keskmäine relätivine nepsuz vajehtase 72..84 % röunoiš voden aigan.

Tobmuz

Mančester jagase 32 sijaližeks valičendrajonaks (angl.: local council ward), kaikuččespäi valitas koume ezitajad.

Lidnan mer (angl.: lord mayor) panese radnikusele lidnan suiman ühtnijoil kerdan vodes. Oz., edeline lidnan pämez' om Džun Hitčen (June Hitchen, semendku 2018 — semendku 2019). Hänen erineden, Suren Mančesteran mer valičese oikti (kaikel rahvahal). Suren Mančesteran mer om Endi Börnhem (Andy Burnham) vn 2017 semendkuspäi.

Eläjad

Kaik 541 300 eläjad oli lidnas vl 2016. Vn 2011 rahvahanlugemižen mödhe läz 2,55 mln ristituid elädas lidnan aglomeracijas (koumanz' surtte valdkundas).

Transport

Avtobusad da raudte oma kundaližeks transportaks. Vspäi 1992 kiruhtramvai radab lidnas (Metrolink, seičeme jonod, 92 stancijad-seižutest, 92 km raudted vl 2015). Sikš ku laivkanal ühtenzoitab Mančesterad Irlandijan merenke 58 km päivlaskmpolehe, ka meriport om lidnas.

Rahvahidenkeskeine civiline Mančester-lendimport^[1] (MAN / EGCC, 28,2 mln passažiroid vl 2018) sijadase 14 km suvipäivlaskmha lidnan keskusespäi sen suviröunal. Sišpäi tehtas reisid Evropan da Pohjoižamerikan maihe, sidä kesken jügureisid.