固定收益证券

固定收益证券是指满足迭个条件——债务人或者发行者要按照条约要求勒固定个辰光支付固定数额个铜钿——个一种证券。譬方讲，债务人需要按照某一只固定个利息率去支付，而且必须是每年支付一记；到了最后，连本带息一塌刮子侪要给付。箇是一种比较普遍个债券。

固定收益证券是相对于股票证券而言个，后者一般性侪呒没定期定量个分红或者另外形式个现金收入。一间公司要想做得大一眼，总需要进行融资来收购合并、购买设备或土地、或者发展新个业务。投资者畀铜钿个时限是看该个公司个风险特征来定个。该个公司可以通过放弃自家股权来发行新股筹资，也可以通过承诺会得定期定量偿还债务来借债。股票通常是勒交易所里向进行交易，而固定收益证券一般性是通过场外交易。

固定收益证券里向个“固定”指个是畀铜钿个辰光固定搭仔数量固定。除脱固定收益证券，市场浪向还有通货膨胀率连接债券、浮动利率债券等等。假使固定收益证券个债务人或发行者错过某一次给付（无论辰光浪向还是金额浪向个），就是伊违约。