Castle

Hoat-kok Aude ê Carcassonne.

Eng-gí ê castle (óa-im : "khá-so͘h"), thang hoan-e̍k chò siâⁿ (城), sī chi̍t-khoán kiàn-tio̍k, sī Tiong-sè-kí ê hông-gī siat-si. Chá-kî ê siâⁿ tāi-iok tī 9 sè-kí chhut-hiān. Tī hóe-io̍h kap hóe-phàu hoat-tián khí-lâi liáu-āu, siâⁿ-pó chiām-chiām hō iàu-sài thè-ōaⁿ khì.

Ji̍t-pún-sek ê siâⁿ hō-chò "siro" (城, しろ); Lō͘-se-a-sek hō-chò "kreml" (Кремль).

Tēng-gī

Gí-goân

Eng-gí ê castle chit jī, lâi-goân sī Latin tan-jī castellum, hit jī koh sī castrum ê kiám-chió-sek (diminutive), ì-sù sī an-chē ê só͘-chāi. Kó͘ Eng-gí ê castel, Kó͘ Hoat-gí ê castel ia̍h chastel, Hoat-gí ê château, Se-pan-gâ-gí ê castillo, I-ta-lí-a-gí ê castello, kap chi̍t kóa kî-tha giân-gí ê tan-jī, mā sī tùi castellum thoân--kòe. Castle chit jī, tī Norman Cheng-ho̍k liáu-āu bô lōa-kú thoân ji̍p khì Eng-gí, pián-sī chit-má kóng chit khoán kiàn-tio̍k-bu̍t, he tī hit chūn ê Eng-lân koh sī sin mi̍h-kiāⁿ.