老婆餅

老婆餅係廣東傳統食品

香港一間餅店賣嘅老婆餅

老婆餅又叫冬蓉酥，係一款發源於廣東嘅傳統餅食，喺香港、臺灣同中國大陸都可以搵到。老婆餅係圓形嘅，表面係一層酥皮，裏面嘅餡係冬瓜蓉。

起源傳說

1. 古時一對窮苦夫婦，老婆將冬瓜整成茸做餡整成圓形嘅餅，跟住老公拎去街市度賣，大受歡迎。老公就叫呢種餅做「老婆餅」。
2. 從前，有個老婆嘅老爺有病不過冇錢醫病，自願賣身做奴；深愛老婆嘅老公為咗贖返老婆，努力研發咗一種美味可口嘅餅，而且靠住賣餅嘅錢將老婆贖返來；於是，後來嘅人就將呢種餅叫做老婆餅。
3. 由廣州蓮香樓首創，早年蓮香樓請咗一位來自潮州嘅點心師傅，佢將老婆喺家鄉自製嘅冬瓜餅帶畀酒樓其他師傅去試，其他師傅覺得好食，於是蓮香樓就將佢改良之後推出；由於呢個係潮州師傅嘅老婆製作，就將佢改名做「老婆餅」。