Dr Musiker Giuseppe Torelli

Dr Giuseppe Torelli (* 22. April 1658 z Verona; † 8. Februar 1709 z Bologna) isch en italiänische Violinist und Komponist im Barock gsi.

Lääbe

Dr Giuseppe Torelli isch äine vo de bedütende italiänische Komponiste und Giiger am Ändi vom 17. Joorhundert gsi. Er isch von ere aagseene Künstlerfamilie cho und het si Usbildig woorschinlig bim Kathedralorchester vo San Petronio überchoo. Er het bim Giacomo Antonio Perti Komposizioon studiert und isch noch ere stränge Brüefig mit säggsäzwanzig Mitgliid vo dr Accademia Filarmonica worde. Vo 1686 aa isch er Bratschist im Orchester vo Bologna gsi. 1698 isch er Kapällmäister vo dr Hoofkapälle vom Markgroof vo Ansbach worde. 1699 und 1700 het er z Wien gschafft und vo 1701 aa bis zu sim Dood wider z Bologna.

Schaffe und Wirke

Si Wärk het e groosse Iifluss uf d Entwigglig vom Concerto grosso ghaa. Er het au die dreisätzigi Form vom Konzärt (schnäll, langsam, schnäll) iigfüert, wo spööter allgemäin übernoo worde isch. Er het siibe Opusräije mit im ganze 84 bekannte Wärk komponiert.

Um 1700 het er s Giigesolo mit Orchester iigfüert, wo denn e baanbrächendi Nöierig im Vergliich zum Concerto grosso gsi isch, wo e Solistegrubbe iigsetzt worde isch. Vorbild isch d Operearie gsi, wo scho hundert Joor vorhäär ufcho isch. Dr Torelli het vor allem Sonate, Concerti grossi und Solokonzärt gschriibe.

Wärk

10 sonate a tre, op. 1 (1686, Bologna)
Concerti da camera a due violini e basso, op. 2 (1686, Bologna)
Sinfonie a due, tre e quattro strumenti, op. 3 (1687, [Bologna)
12 sonate per violino e basso continuo, op. 4 (1688, Bologna)
Concerto e sinfonia a quattro, op. 5 (1692, Bologna)
Concerti musicali a quattro, op. 6 (1698, Augusta) (Concerti grossi)
Capricci musicali per violino e viola, op. 7
Concerti grossi, op. 8 (1-6 per 2 violini, 7-12 per 1 violino; con pastorale per il santissimo Natale; 1709)
No 30 Konzärt für 1 bis 4 Drumbeete und Orchester (Drumbeetesinfonie), d Drumbeete het as s Instrumänt vo fürstliger Macht gulte.

Litratuur

Willi Apel, Die italienische Violinmusik im 17. Jahrhundert, Wiesbaden 1983
Eugene J. Enrico, Giuseppe Torelli's Music for Instrumental Ensembles with Trumpet, Ann Arbor 1971
Franz Giegling, Giuseppe Torelli. Ein Beitrag zur Entwicklungsgeschichte des italienischen Konzerts, Kassel 1949
Richard E. Norton, The Chamber Music of Giuseppe Torelli, Ann Arbor 1969
Francesco Passadore, Catalogo tematico delle composizioni di Giuseppe Torelli (1658-1709, Padua 2007, ISBN 978-88-901412-6-3

Weblingg

Gmeinfreji Note vu Giuseppe Torelli (Musiker) im International Music Score Library Project

Dä Artikel basiert uff ere fräie Übersetzig vum Artikel „Giuseppe_Torelli“ vu de dütsche Wikipedia. E Liste vu de Autore un Versione isch do z finde.