ويكيپيديا:لحكام د لبوتات
لبوت هوّا پروڭرام كيدير عطاشات (مهام) لي كتيرة على بنادم باش يديرها ف وقت معقول، ؤلا موميلّة ؤ تاحد ماكيبغي يديرها بشكل كافي، ؤلا يقدر بنادم ينساها، بحال زّيادة و تّحياد و لإصلاح ديال بعض طّاڭات، لإعلام د لكتاتبيا ب ميصاجات موهيمّة، زّيادة د تصنيفات و تحويلات، و غيرها.
هاد صّفحة كاتليستي لحكام لي متعلّقين ب لبوتات ف ويكيپيديا ب دّاريجة. يلا بغيتي تزيد تّعرّف على لبوتات ؤ شنو كيديرو، شوف ويكيپيديا:بوتات.
يلا بان ليك شي بوت دار شي غالاط، ؤلا بغيتي تعرف كيفاش خدّام ؤلا عندك أي سؤال عام، ماعليك غير تسوّل مول لبوت ف صّفحة د لمداكرة ديالو.
طلب ديال صلاحية د بوت
[بدل لكود]
صفحة متعمقة: ويكيپيديا:طلب صلاحية بوت
ف ويكيپيديا، ضاروري لبوت يكون عندو كونط د خدايمي خاص بيه، و ممنوع باش يخدم بوت بلا كونط (غير أيپي)، ؤ ممنوع تا باش يخدم ب نفس لكونط ديال خدايمي بنادم. يلا شي حد خدّم بوت ب هاد شّكل (بلا كونط خاص بيه ؤلا ب كونط د خدايمي بنادم) غادي يتعرّض لبوت ديالو لبلوك، بشكل ؤطوماتيكي، ؤلا تا ب ليد من طاراف أمغار. لخدايمي لي خدّم بوت بهاد شّكل، على حساب واش قاصد ؤلا لا، ؤ على حساب لوجود ؤ لمقدار ديال تّخريب لي تسبب فيه، يقدر يتعرض تا هوّا ل لبلوك (شوف ويكيپيديا:لحكام د لمنع).
باش يخدم لبوت ف ويكيپيديا ب دّاريجة، خاص يدير مولاه طلب ف صفحة مخصصة ل هادشي، ؤ يعطي سيمانة علّاقل باش تدوز مداكرة ؤ ڤوط، لي ف خلالها لكتاتبيا كييطرحو أسئلة ديالهوم و يناقشو لمهام د لبوت ؤ واش ضاروريين ؤ مزيانين ؤلا لا. موراها خاصو يمشي ل ميطاويكي ف هاد صّفحة، و يطلب صلاحية د لبوت ل لكونط د لبوت ديالو.
يلا ماكانت تا ستيجابة ؤلا موافقة من طاراف كتاتبيا خرين، ماخاصش لكتاتبي لي داير طلب د لبوت يمشي ديريكت ل ميطاويكي ؤ يطلب صلاحية د لبوت تماك، مي يتسنا شهر (4 د سّيمانات) تا يتيقّن بلي تا حد ماغادي يجاوب. يعني لمدة د تّسنية د سيمانة كاتشتارط باش يكون علّاقل كتاتبي واحد جاوب ؤ وافق (ماشي رفض ؤلا غير علّق) على طّلب د صلاحية لبوت. خاص 75% ؤلا كتر د لكتاتبيا لي جاوبو، منهوم علّاقل أمغار واحد، يوافقو على قبول ديال طلب صلاحية لبوت ف لمدة لمدكورة على حساب لحالة. يلا كانت فاتت سيمانة قبل مايجاوب شي حد، خاص هاد 75% تّحسب على لي جاوبو ف سيمانة زايدة محسوبة من فاش تدار طّلب، تا تكمل شهر (4 د سّيمانات)، ماشي أول واحد وافق مور مافاتت سيمانة يتسالا لڤوط ديك سّاع. هادشي كينطابق تا يلا ماجاوب حتا أمغار على طّلب ب لموافقة ؤلا رّفض.
من لأحسن مول لبوت يخلي لكوض سورس مفتوح، ؤ يدير تيست صغير ديال لبوت يلا تّطلب منو، لي مايفوتش 50 تبديل. يلا كان لبوت كيكتب صفاحي جداد، ماخاصوش يكتب ف لمجال سّمياتي رّئيسي (مقالات) بلا مايتشاور معا جّماعة. غادي يكون حسن باش يكتب ف لواساخ باش لمقالات لي كتبهوم لبوت تتم لمراجعة ديالهوم. شوف ويكيپيديا:لحكام د لمحتوى - لمحتوى د الجملة.
شكون يقدر يڤوطي
[بدل لكود]- صفحة متعمقة: ويكيپيديا:لحكام د لڤوط
ماشي جميع لكتاتبيا يقدرو يڤوطيو علي قبول صلاحيات لبوتات، حيت خاص ضاروري يكون عندهوم فهم وخا بسيط ل شنو هوّا بوت ؤ كيفاش كيخدمو لبوتات ف ويكيپيديا، ؤ شنو تّبعات ديال لخدمة د لبوت. كا شرط أساسي ف لحالة لعامة، خاص لكتاتبي يكونو عندو 100 تبديل ؤلا كتر ف لمجموع، منّهوم 30 ماشي ف لمجال سّمياتي رّئيسي ديال لمقالات ؤ ماشي ف صّفحة د لخدايمي ديالو ؤلا د لمداكرة لي تابعة ليها. ؤ خاصو يكون دار علّاقل تبديل واحد ف 6 شهور لّخرة. ف حالات ستيتنائية يقدر يڤوطي كتاتبي ماكيتوفّروش فيه هاد شّروط، يلا قبلو لإمغارن. ف هاد لحالة خاص يدير طلب خاص ف صّفحة د لمداكرة ديالو، يطاڭي فيه جميع لإمغارن د لويكي ؤ يشرح علاش عندو لكفاءة باش يڤوطي ف هاد لحالة، ؤ خاص كلا أمغار جاوب ف ضرف 24 ساعة يوافق على طّلب. يلا غي أمغار واحد ماوافقش، ؤلا يلا دازت كتر من 24 ساعة بلا مايجاوب تا واحد منهوم، طّلب كيتّرفض. لكتاتبي من حقو يعاود طّلب جوج مرات خرين علّكتيرة، تا يتسالا لڤوط على صلاحيات ديال شي بوت ؤ تبان نّتيجة.
مول لبوت ب طبيعت لحال ماعندوش لحق يڤوطي على طّلب ديالو.
شنو يقدر يدير لبوت
[بدل لكود]لبوت يقدر يدير لعطاشات لي موصوفة ف طّلب ديالو ؤ لي وافقات عليها جّماعة د لويكيپيديين. يقدر يوسّع لعطاشات لبوتية ل واحد لحد معقول يلا كانت ضارورية باش يتدارو لعطاشات لأساسية (متلاً يكتب ف لوحة د لأغلاط د لبوت)، ولا يلا كانت من نفس طّبيعة د لعطاشات لأساسية. يلا بغا مول لبوت يزيد عطاشات جداد مافراسش جّماعة، ؤ ماوافقاتش عليهوم قبل، خاصو يدير طلب جديد ل هاد لعطاشة ؤلا عطاشات. شّروط د لموافقة هوما نيت لي مدكورين لفوق. غير هنا ماغاديش يحتاج يدير طلب ف ميطاويكي، حيت لبوت ديجا خدّام.
بوتات عالمية
[بدل لكود]لبوتات لعالمية global bots مقبولة ف ويكيپيديا ب دّاريجة، طالمّا خدمتها محدودة ف عطاشات ديال إصلاح تّحويلات لمسلسلة (تحويل كيدّي ل تحويل) ؤ لكوض د ويكي (ماشي نّص لمكتوب ب دّاريجة). لبوت لعالمي يلا بغا مولاه يدير عطاشات زايدين خاصو يدوز من نفس لپروصي ديال لبوتات لمحليين، كيما مشروح لفوق. شوف ليستة د لعطاشات لمقبولة د لبوتات لعالمية.
شنو مايقدرش يدير لبوت
[بدل لكود]لبوت مامسموحش ليه باش يدير عطاشات بعيدة ف طبيعتها ؤلا لمقدار ديالها على داكشي لي وافقات عليه جّماعة، سوا ف لإجابة على طّلب د صّلاحية، ؤلا ف لحكام د ويكيپيديا. متلاً لحكام د لمحتوى ب جّملة كاتحدّد لمقدار د زّيادات لبوتية د لمقالات لي مسموح بيهوم. أي بوت لي كيتجاوز لحكام ؤ تّيفاق د جّماعة، غادي يتعرّض مولاه ل إندار لي يقدر يوصّل ل تحياد صّلاحية د لبوت، ؤلا تا لبلوك د لخدايمي د لبوت ف ويكيپيديا ب دّاريجة.
بوتات ب صلاحيات د أمغار
[بدل لكود]لبوت يلا كان خاصو يدير تبديلات لي موتاحة غير ل خدايمي ب صلاحيات أمغار، بحال لحماية ؤ التحياد د صّفاحي، ؤلا لكتابة ف صفاحي محميين، يقدر يدير طّلب د لبوت معا طّلب د صلاحيات أمغار، ؤلا يديرهوم مفارقين (طلب د صلاحية بوت + طلب د صلاحية أمغار). لبوت ب صلاحيات د أمغار (ؤلا أمغاربوت) خاص مولاه تا هوّا يكون أمغار. يلا مول لبوت فقد صّلاحيات ديالو، يقدر لبوت يبقا خدّام طالمّا مول لبوت جدّد طّلب د تامغاريت ؤ طّلب ديالو ماتّرفضش. يلا تّرفض طّلب د تامغاريت خاص لبوت تا هوّا تّحيد ليه تامغاريت. لبوت يقدر موراها يستامر ف لخدمة ب عطاشات ماشي أمغارية يلا كانت جّماعة ديجا موافقة عليها.
لعطاشات ديال التحياد ب جّملة خاصهوم مايفوتوش تحياد 50 صفحة دقة وحدة، ؤ خاص كلا لونصاج ديال لعطاشة د التحياد تّڤاليدا من عند أمغار لي ماشي مول لبوت.
حيت هاد لبوت عندو صلاحيات كبيرة ؤ يقدر، وخا غير ب لغالاط، يتسبب ف تخريب كبير ل ويكيپيديا، ضاروري مول لبوت يعلن على لبدية د كلا عطاشة ف صّفحة لمناسبة، ؤ يكون مراقبو ؤ متبّع شنو كيدير باش يقدر يتدخّل يلا طرا شي موشكيل.
إلغاء صلاحيات د بوت
[بدل لكود]كاينين مجموعة د لحالات لي يقدر لكونط د لخدايمي د بوت يفقد فيها صّلاحية د بوت:
- يلا خرج على تّيفاق د جّماعة ؤلا لحكام د ويكيپيديا، بشكل كيتعاود، بعد 3 د لإندارات. قبل كلا إندار خاص لبوت يتّبلوكا ل مدة نهار تال 7 يام باش يحبس تّخريب فيساع، ؤ تّعطا فرصة ل مول لبوت باش يعرف شنو طرا، ؤ يصلح لموشكيل لي عندو. يلا كان تخريب ب لغالاط لي محدود (مافايتش 10 تال 50 صفحة على حساب لحجم د تّخريب ف كلا صفحة)، ؤلا مول لبوت كان غير كيتيستي لبوت، غير إعلام ل مول لبوت كافي يلا ماكانش فراسو، بلا إندار ؤلا بلوك. يلا كان لمقدار د تّخريب مقصود ؤ/ؤلا كبير بزاف، يقدر يتّبلوكا لبوت نيشان بشكل دايم، ؤ يتحيّدو ليه صّلاحيات د بوت.
- يلا مول لبوت تّبلوكا ل شي ساباب، خاص تا لبوت ديالو يتّبلوكا ل نفس لمدة. يلا كان سّاباب د لبلوك عندو علاقة موباشيرة ب لخدمة د لبوت ديالو ؤلا ماشي موباشيرة (متلاً دار بزاف د تّخريب ب لكونط د لخدايمي ديالو)، ؤ كاين تخوّف بلي يقدر يخدّم لبوت بشكل مامزيانش، يقدرو يتحيّدو صّلاحيات د لبوت.
- يلا طلب مول لبوت باش يتحيّدو صّلاحيات د لبوت ل لبوت ديالو.
- يلا لبوت مادار تا تبديل ل مدة ديال 6 شهور، ؤ ماكاينة تا شي إشارة واضحة بلي غادي يعاود يبدا يخدم ف وقت قريب. هاد لمدة تقدر، ب قرار أمغاري، تّمدد ل عام يلا كانو لعطاشات د لبوت ب طبيعتهوم نادرين (مرة ؤلا قل من مرة ف شّهر ف لموعدال). ف هاد لحالة، خاص مول لبوت يتّعلم ف صّفحة د لمداكرة ديالو بلي صّلاحيات د لبوت غادي يتحيّدو ؤ كاتّعطا ليه سيمانة باش يجاوب. يلا مول لبوت رجع ؤ بغا يأكتيڤي لبوت ديالو، خاصو يعاود يدير طلب جديد.
طّلب د لإلغاء د صلاحيات د بوت كيتم ف نفس صّفاحي ديال طلب صّلاحيات، سوا ف ويكيپيديا ب دّاريجة، ؤلا ف ميطاويكي. لڤوط ديال إلغاء صّلاحيات ف ويكيپيديا كيشاركو فيه غير إمغارن، ؤ كيتدار ف ضرف 3 يام. ماشي ضاروري جميع لإمغارن يشاركو فيه باش يتّقبل طلب لإلغاء.