Элеанора Аркадзеўна Язерская

Элеанора Язерская
Элеанора Аркадзеўна Язерская
Род дзейнасці	актрыса, журналістка
Дата нараджэння	8 ліпеня 1946(1946-07-08)
Месца нараджэння	Мінск, БССР, СССР
Дата смерці	16 мая 2014(2014-05-16) (67 гадоў)
Месца смерці	Мінск, Беларусь
Месца пахавання	Усходнія могілкі
Грамадзянства	СССР, Беларусь
Член у	Беларускі саюз кампазітараў БСТД

Элеанора Аркадзеўна Язерская (8 ліпеня 1946(1946-07-08), Мінск — 16 мая 2014(2014-05-16), Мінск) — беларуская радыё- і тэлевядучая, педагог, актрыса.

Адна з самых яркіх асоб беларускага музычнага бамонду ў 1980-х — 2000-х гадах. За ёй замацаваліся слава і вобраз «свецкай ільвіцы».

Біяграфія

Саша Варламаў у ходзе публічнай лекцыі «Суровы свет моды 1940—1980-х гг.» распавядае, як Элеанора Язерская карысталася ў 1980-ыя гг. дызайнерскімі творамі адзення Белбыттэхпраекта ў Мінску.

Нарадзілася 8 ліпеня 1946 года на вуліцы Савецкай ў Мінску (каля Дома ўрада). Бацька Элеаноры (паходзіў з Гомеля) быў інжынерам-энергетыкам і ўзначальваў транспартную службу пры Савеце Міністраў БССР, а маці Аўгуста (паходзіла з Ніжняга Ноўгарада) была фельчарам. Бацькі пабраліся шлюбам зусім маладымі, пражылі ў шлюбе 30 гадоў і развяліся з-за любоўнага рамана бацькі. У Элеаноры былі старэйшы брат Анатоль (загінуў маладым падчас Другой сусветнай вайны) і сястра Міла (перабралася ў Нідэрланды). Пасля таго, як бацька пакінуў сям’ю, ён пражыў усяго 12 гадоў і памёр ва ўзросце 66 год. Паўторна маці Элеаноры Язерскай выйшла замуж у Мінску за героя Савецкага Саюза Аляксандра Антонавіча Антонава (1915—1997).

Напрыканцы жыцця Э. Язерская была ў глыбокай дэпрэсіі, практычна не выходзіла з дому, скардзілася на высокі ціск. Яна казала, што не жадае нікога бачыць і чуць. Апошнія месяцы перад смерцю жыла зусім адна. Дзяцей не мела, яе цела выявіў пляменнік — дзверы кватэры прыйшлося ўзломваць.

Памерла 16 мая 2014 года^{[удакладніць]} ў Мінску ад сардэчнай недастатковасці. Развітанне праходзіла ў будынку Белтэлерадыёкампаніі на вуліцы Макаёнка, 12. Пахавана ў Мінску на Усходніх могілках побач з маці і айчымам.

Адукацыя

Скончыла музычнае вучылішча, а пасля — кансерваторыю. Займалася самаадукацыяй. Збірала ў сваёй мінскай кватэры (на плошчы Перамогі) кнігі, карціны (мела творы Леаніда Шчамялёва, Аляксандра Кішчанкі і інш.) і прыгожыя рэчы (мейсенскі фарфор, антыкварныя гадзіннікі, статуэткі); любіла падарожнічаць па розных краінах і бываць у месцах, звязаных са знакамітымі людзьмі культуры. Была знаёма з многімі вядомымі асобамі культуры Беларусі і СССР.

Творчасць

З пачатку 1980-х гадоў шмат год працавала вядучай сваіх творчых праектаў аб мастацтве на Беларускім тэлебачанні і радыё і амаль усё жыццё прысвяціла тэлебачанню. Пачатак шырокай вядомасці і пік папулярнасці і ўвагі грамадства (асабліва ў 1980-ыя гг. у БССР) Язерскай прынесла аўтарская перадача «Музычны салон Элеаноры Язерскай», якая ішла на беларускім тэлебачанні і куды прыходзіў беларускі і ўсесаюзны эстрадны бамонд. Гэта была першая ў СССР імянная тэлеперадача, якая праіснавала да пачатку 2000-х гадоў.

Элеанору Язерскую параўноўвалі з Фаінай Ранеўскай за самастойнасць і незалежнасць паводзін і думак, трапнасць і метафарычнасць мовы, начытанасць і эстэтызм. Уборы Язерскай вылучаліся яркасцю і элегантнасцю, смелым спалучэннем колераў. Капялюшы, футра і каштоўныя камяні былі трывалай часткай вобразу Элеаноры Язерскай. Любімым напоем быў італьянскі лімонны лікёр ліманчэла.

У 2007 годзе ўдзельнічала ў тэлепраекце АНТ «Дзве зоркі», дзе пела супольна з Іллём Міцько.

У 2007 годзе ўвайшла ў Топ-50 самых стыльных і паспяховых асоб Мінска.

Праекты

• музычная асветніцкая перадача «Музычны салон» (Беларускае радыё і тэлебачанне)
• музычная асветніцкая перадача «Салон Элеаноры Язерскай» (тэлеканал БТ)
• цыкл аўтарскіх асветніцкіх перадач «Жанчыны XX стагоддзя» (тэлеканал СТВ)
• рубрыка «Бон Тон» у праграме «Вялікі сняданак», дзе апавядала аб неверагодных лёсах зорак кіно і тэатра (тэлеканал СТВ)
• аўтарская журналісцкая калонка ў газеце «СБ. Беларусь сегодня»
• аўтарская перадача на радыё «Мир»

Ролі ў кіно

У кіно здымалася толькі ў эпізодах.

• 1992 — Белыя адзенні (Беларусь) — госця на вечарыне (эпізод)
• 1997 — Справы Лахоўскага (Беларусь) — жонка мэра
• 2001 — Эскіз на маніторы (Беларусь) — Ірма Адамаўна
• 2005 — Дунечка (Расія, Беларусь) (эпізод)
• 2006 — Капітанскія дзеці (Расія) — рэжысёрша
• 2008 — Ідэальная жонка (Расія) — важатая

Спасылкі

• Элеонора Езерская на kino-teatr.ru
• Фан сайт Элеаноры Язерскай Архівавана 31 студзеня 2012.
• Элеанора Язерская адзначыла дзень нараджэння ў напаўголым выглядзе
• Элеонора ЕЗЕРСКАЯ: «Завтраки в номер носили только Магомаеву и моему коту…»(недаступная спасылка)
• Элеанора Язерская: у дзяцінстве мяне клікалі Ліна(недаступная спасылка)
• ЯЗЕРСКАЯ Элеанора (аўтар блога) Архівавана 23 верасня 2009.
• Адшумеў, адгуляў і адспяваў «Славянскі кірмаш-2008» (Фотарэпартаж)
• Элеонора Езерская: «Жить надо так, чтобы тебе завидовала даже сволочь». С Днем рождения, Элеонора! Архівавана 18 мая 2014.
• Прощайте, Элеонора Езерская
• В Минске простились с телеведущей Элеонорой Езерской Архівавана 6 сакавіка 2016.