Vikipedio:Respondoj al kritikoj

Ĉagrenis min la ideo, ke post granda zorgo konstrui artikolon, eblas ke aliaj tute fuŝos ĝin. Do, se oni volas partopreni, gravas konscii tion kaj registri en sia komputilo artikolojn faritajn de si mem por ne riski perdi sian tempon.

Nu, eble vi ne jam konas la sistemon tre bone. La vikipedio konservas ĉiun ŝanĝon. Do, se oni fuŝas artikolon, oni povas reveni al antaŭa versio. Oni povas alklaki "historio" kaj vidi ĉiun version de iu artikolo. Ankaŭ, oni povas alklaki "(malsamoj)" kaj vidi, kio ŝanĝiĝis en la paĝo. Krome, ĉiuj rigardadas la paĝon Lastaj Ŝanĝoj, do stultaĵoj ne okazus.

La angla vikipedio havas homojn, kiuj provas fuŝi artikolojn, sed aliaj homoj vidas kaj korektas tion. Mi eĉ vidis grandan atakon, kiam malbonulo fuŝis 50 anglajn artikolojn en la paĝo Lastaj Ŝanĝoj (per aŭtomata programo), kaj post 10 minutoj de helpo de la komunumo, ĉio bonis denove. Krome, se oni nur havas retpaĝon, neniu povas plibonigi viajn informojn. En la vikipedio, se aperas eraro, oni povas korekti ĝin tuj.

Se temas pri politiko aŭ religio, personaj sentoj foje enmiksiĝas. Tio ĉi malbonigus la vikipedion, ĉu ne?

Tial ni laboras laŭ neŭtrala vidpunkto. Oni devas skribi faktojn, ne opiniojn. Ni forigas opiniojn enmetitajn. Partoprenas multaj personoj kun malsamaj vidpunktoj. Ni montras respekton por ricevi ĝin reciproke. La ekzistokialo de Esperanto estas interkomunikado. Tial ĉi la Esperanta estas speciale taŭga 'Wikipedia' por tia ĉi diskuto!

Estontece, ni vidos spamaĵojn, post kiam la spamistoj konstatos ke vikioj estas bonaj senpagaj reklamejoj. Ne gravas, se ni tuj forigas reklamojn -- la spamistoj tuj restarigos tiujn uzante alian retadreson.

Se oni alspamos nin, ni simple forigos ĝin. Se oni realspamos nin, ni simple reforigos ĝin. Estas pli da zorgantoj pri la projekto ol da spamistoj, do ni ĉiam venkos. Se ni ĉiam forigos spamaĵojn, la spamistoj ĉesos. La angla vikipedio estas grandega, sed ĝi ne havas reklamojn. Kiu volus alspami la Esperantan Vikipedion?

Se ĉiu ajn povas redakti artikolon, kiel mi povas fidi, kion mi legas? Ekzemple, mi normale ne iras al enciklopedio pri io, kion mi scias, sed pri io, kion mi volas lerni.

Nu jes, ĝi estas konstruata enciklopedio. Memoru ke ĝi estas projekto kaj ne finita. Sed tamen, estas jam multaj bonaj artikoloj pri aferoj, kiuj ne estas en la reto en Esperanto aliloke. Tamen memoru, ke se vi trovas malveraĵon aŭ eraron en normala retpaĝo, vi ne povas korekti ĝin. Ĉi tie, ĉiuj povas.

Mi faris kelkajn ekskursojn. Mia resumo estas: Multe da artikoloj estas skribitaj de analfabetuloj pri ties fako. Pli ol duono de la artikoloj estas skribitaj de analfabetuloj pri Esperanto. Por trovi paĝon kun eraroj en E-o, sufiĉas klaki al hazarda paĝo. Por trovi paĝon kun eraroj pri iu fako sufiĉas legi preskaŭ ajnan artikolon pri tiu fako (kaj esti iom pli sperta pri ĝi ol ordinara homo). Eĉ kiam la aŭtoroj tradukas ion el iu alilingva vikipedio, ili tradukas tion malĝuste, kiel ekzemple en la artikolo "Fundamenta teoremo de kalkulo", kie la aŭtoro forgesis traduki la tre gravan vorton "kontinua", sen kiu tio estas ne teoremo sed ridindaĵo

Ĉar la vikipedion verkas, kreas nepagitaj volontuloj, tiel la verkaĵo respegulas ilian lingvo- kaj faknivelon. Ĉiu estas bonvena por altigi la fakan kaj lingvan nivelojn por estigi bonkvalitan enciklopedion en Esperanto.