Okzitaniera

Okzitaniera
	Occitan — lenga d'òc — occitan
	Okzitanieraren lurraldea (1900.)
Datu orokorrak
Lurralde eremua	Frantzia, Italia, Monako eta Espainia
Hiztunak	580.000
Rankinga	ez 100 mintzatuenen artean
Ofizialtasuna	Katalunia
Eskualdea	Okzitania
Araugilea	arautu gabea
Hizkuntza sailkapena
	giza hizkuntza; indoeuropar hizkuntzak; hizkuntza italikoak; hizkuntza erromantzeak; mendebaldeko hizkuntza erromantzeak; hizkuntza galo-iberiarrak; hizkuntza galo-erromantzeak; Hizkuntza okzitaniar-erromantzeak
Informazio filologikoa
Hizkuntza-tipologia	subjektu aditza objektua, hizkuntza azentuala eta hizkuntza fusionatzailea
Alfabetoa	latindar alfabetoa, classical norm of Occitan (en) , Mistralian norm (en) eta Norme bonnaudienne (en)
Hizkuntza kodeak
ISO 639-1	oc
ISO 639-2	oci
ISO 639-3	oci
Ethnologue	oci
Glottolog	occi1239
Wikipedia	oc
IETF	oc

Okzitaniera, oc-eko hizkuntza izenaz ere ezaguna (occitan, lenga d'òc), Okzitania izeneko kultur eskualdeko erromantze hizkuntza da.

Hedadura

Frantzian, Loira ibaitik hegoaldera mintzatzen da; halaber, Italiako Alpeetako zenbait bailara, eta aranera aldaera berezian, Araneko haranean (Katalunia).

Euskal Herriari dagokionez, Baiona, Miarritze eta Angelu aldean ere hitz egiten zen, eta Nafarroa Behereko iparraldeko herri batzuetan ere bai.

Okzitaniera Pirinioetako hegoaldean Erdi Aroan Nafarroako eta Aragoiko zenbait tokitan mintzatu zen, euskara eta nafarrera-aragoierarekin batera. Hiztunak Okzitaniatik (Gaskoniatik batez ere) jatorriz merkatariak eta artisauak ziren, Done Jakueren bidean zeuden hiri berrietan finkatuak. Jakan XIII. mendeko amaiera edo XIV. mendeko hasiera arte mintzatu zen; Lizarran eta Iruñean, XVI. mendera arte. Zenbait dokumentu ofizialetan okzitaniera ageri da, Establimentz de Jaca (XIII. mendekoa) eta Fòr de Jaca (Jakako forua) erredakzio batzuetan, adibidez

Estimazioen arabera, okzitaniera 1.939.000 pertsonak hitz egiten dute, nahiz eta oso hizkuntza ahuldua den. Izaera ofiziala Araneko haranean soilik du, aranera izenaz aitortua, katalana eta gaztelaniarekin batera. Okzitaniera eta katalanaren arteko berdintasun ugari daude, ahoskeran eta idazkeran.

Aldaerak

Okzitanieraren hizkuntza-multzo nagusiak.

Okzitaniera hainbat aldaeratan banaturik dago. Eztabaida dago aldaera horiek okzitanieraren dialektoak ote diren ala berezko hizkuntzak (gaskoiari buruz, batez ere). Haietako batzuek estandar propioak garatu dituzte, eta beraz, hizkuntzatzat har daitezke^[1].

iparraldeko taldea (nord-occitan)
- lemosinera
- auverniera
- vivaroalpinera
hegoaldeko taldea (occitan meridional)
- proventzera (provençau), nizardera barne
- lengadocera
gaskoia (gascon), dialekto bakarrekin
- gaskoi (aranera barne)

Lemosinera edo limousinera

Limousinera (lemosin) iparraldeko aldaera da, Limousin eskualdean (Frantzia) hitz egiten dena: zehazkiago, Dordoinako iparraldean eta Charente ekialdean, Angulematik ekialdera.

Auverniera

Auverniera (auvernhat edo auverñat) Auvernia eskualdeko zatirik handienean (Aurillac inguruan —Orlhac okzitanieraz— izan ezik), Velayko lurralde ia osoan, Bourbonnais hegoaldean, Puy-de-Dome departamenduan mintzatzen da. Halaber, Cantal, Loira Garaia, Allier eta Creuseko inguru batzuetan ere hiztunak badira. Auverniera okzitanieraren iparraldeko aldaeraren barietatea da.

Vivano-alpinera edo alpinera

Vivano-alpinera (vivaroalpenc, vivaroaupenc) iparraldeko okzitanieraren parte da, eta Velayko inguru batzuetan, Vivarés iparraldean (Vivares Garaia), Dauphiné iparraldean, Nizardako (Itsas Alpeak) zati handienean, eta Alpeetan, bai Frantziako aldean eta baita Italiakoan ere (Okzitaniako haranak).

Proventzera

Proventzera (Provençau) Frantziako hego-ekialdean mintzatzen da, eta gaur egun bertako biztanleriaren gutxiengoak hitz egiten du. Modu azpidialektalean, halaber, Italiako ipar-mendebaldeko Alpeetako bailaretan ere badira hiztunak. Gainera, Calabriako (Italia) kostaldeko zonalde txiki batean ere (La Gardia herrian batik bat) proventzeraren hizkuntza komunitate txiki bat badago oraindik.

Nizardera

Nizardera (niçard, nissart, niçart) Nizan (Frantzia) eta haren lurralde historikoan (egungo Alpe Maritimoak) mintzatzen den proventzeraren azpialdaera da. Halaber, monakoerarekin batera, Monakon ere hiztun batzuk badira. Egile batzuen arabera, bestalde, nizardera hizkuntza galiar-italiarrei lotuta dago, bereziki dialekto liguriarrei, kontuan hartuz Nizako eskualdea 1860ko hamarkada arte hizkuntza hori mintzatzen zuten eta egun Italia diren lurralde horien parte zela.

Languedocera edo lengadocera

Lengadocera (lengadocian) Frantziako departamendu hauetan mintzatzen da: Lozère, Garona Garaia, Ariège, Gard, Dordogne, Cantal, Pyrénées-Orientales eta Gironda. Era berean, ondoko departamenduen zati batzuetan ere hiztunak badira: Aveyron, Lot, Lot-et-Garonne, Tarn-eta-Garona, Tarn, Aude eta Hérault.

Shuadit

Shuadit edo judeoproventzera 1977tik hiltzat jotzen da.

Gaskoia

Sakontzeko, irakurri: «Gaskoi (hizkuntza)»

Gaskoia (gascon) okzitanieraren dialektoa da hizkuntzalari gehienentzat, nahiz eta beste batzuek hizkuntza autonomotzat hartzen duten. Gaskoiniako lurraldean hedatzen da. Halaber, gaskoiaren barruan lau aldaera nagusi bereizten dira: itsasoko landesa, barnealdeko landesa, bearnera, ariegera eta aranera (Kataluniako Val d'Aranen).

Berant Erdi Aroan eta merkatarien artean bereziki, gaskoia Aturriren hegoaldeko alde euskaldunetara hedatu zen, Angelu, Miarritze eta Baiona neurri handi batean gaskoituz. Euskal substratuaren eraginez edo, gaskoiak beste okzitaniar hizkuntzekiko ezaugarri bereziak ditu.

Aranera

Sakontzeko, irakurri: «Aranera»

Aranera Val d'Aranen (Katalunia) mintzatzen da. 2006ko abuztuaren 9tik Kataluniako Autonomia Erkidego osoan hizkuntza ofizial izaera du, katalana eta gaztelaniarekin batera, Kataluniako estatutu berrian hala jasota. 1984an aranera Val d'Arango hezkuntza sisteman erabiltzeko hizkuntza izendatu zen.

Azkenik, autore batzuen ustez, frankoprovenzera edo arpitana, berezko hizkuntza bainoago, okzitanieraren aldaera edo okzitanieraren eta oïl hizkuntzen arteko trantsiziozko hizkuntza bide da.

Lemosinera
Auverniera
Vivano-alpinera
Proventzera
Gaskoia
Languedocera

Hezkuntza

Calandreta okzitanierazko eskolen izena da. Okzitania osoan zabalduta daude.

Literatura

Okzitanierazko literaturaren sustraiak Erdi Aroko trobadoreetan daude. Horren adibide dira Dante Alighieriren ahapaldi hauek, literatura okzitaniarraren pasarterik esanguratsuenetakoak:

Tan m'abellis vostre cortes deman,

qu'ieu no me puesc ni voill a vos cobrire.

Ieu sui Arnaut, que plor e vau cantan;

consiros vei la passada folor,

e vei jausen lo joi qu'esper, denan.

Ara vos prec, per aquella valor

que vos guida al som de l'escalina,

sovenha vos a temps de ma dolor!

Zure galdera adeitsua hain zait atsegin,

Non ezin dudan eta ez dizudan ezkutatuko.

Arnaut naiz ni, negarrez eta kantuz noana;

Atsekabez dakusat iraganeko erokeria,

Eta, alai dakusat aurrez espero dudan bozkarioa.

Orain, erregutzen dizut, botere horren bidez,

Zeinak eskaileraren goialdera zaramatzana,

Oroit zaitez garaiz ene sufrimenduaz.

Hedabideak

Telebista

Lo pantais ven realitat ("Ametsak egia bihurtzen dira") leloarekin, 2013ko abenduaren 12an abiatu zuten interneten bidez okzitanierazko lehenengo telebista^[2].

Erakunde eta elkarteak

Alde batetik, Conselh de la Lenga Occitana erakundeak hizkuntza arautzen du 1996tik eta, bestetik, Institut d'Estudis Occitans elkarterik zaharrena eta eragileena da.

Conselh horren ildotik, 2011n Lo Congrès (Lo Congrès Permanent de la Lenga Occitana) erakunde berria sortu zuten okzitaniera arautzen duen eskualde arteko erakundea. Okzitanierari bizitasuna ematea eta haren garapenean laguntzea du helburu, hura ezagutzeko eta kodifikatzeko lan egiten du, okzitanieraren hainbat esparrutarako (lexikografia, lexikologia, terminologia, neologia, fonologia, ortografia, gramatika eta toponimia) tresnak sortuz.^[3]^[4]

Hizkuntza-teknologia

Hizkuntza-teknologiarako oinarrizko okzitanierarako baliabideak eta tresnak ari dira garatzen azken urteetan. 2018tik Lo Congrès erakundeak eta Toulouseko CNRS Ikerketa Zientifikoko Zentro Nazionalak alor horretan dihardute, Elhuyar Fundazioarekin eta EHUko Ixa Taldearekin lankidetzan.^[4]^[5]^[6]^[7]

Còrpus deu Congrès. ^[8]
Hiztegi elebakarra: ohiko hitzen bilduma okzitanieraz
Hiztegi elebiduna: ohiko hitzen bilduma okzitanieraz eta haien ordainak beste hizkuntza batzuetan
Analisi morfosintaktikoa: hitzen erroa, aurrizkiak eta atzizkiak banatzea
Analisi sintaktikoa: taldeak osatzen dituzten hitz-segidak ezagutzea
Okzitanierazko hizketaren sintesia. Funtsezkoa gailu mugikor ugariren interfazerako
Okzitanierazko testuen detektagailua: testu batean okzitaniera identifikatzea
Okzitanieraren aldaerez idatzitako testuen detektagailua: okzitanieraren aldaerak identifikatu eta desberdintzea
Frantses-okzitaniera bikotearen itzulpen automatikoa.

Erabilera-datuak

2020an 8000 pertsonari inkesta soziolinguistikoa egin zitzaien.^[9]

Erreferentziak

↑ UNESCO etxea- Munduko hizkuntzen amarauna, Okzitaniera
↑ https://web.archive.org/web/20131220114419/http://paperekoa.berria.info/agenda/2013-12-20/030/001/okzitanierazko_lehenengo_telebista_abiatuko_dute_gaur_internet_bidez.htm
↑ «Lo Congrès - Istoric» locongres.org (Noiz kontsultatua: 2020-05-19).
↑ ^a ^b Partzuergoa – Interreg Poctefa Linguatec. (Noiz kontsultatua: 2020-05-19).
↑ Baliabideak – Interreg Poctefa Linguatec. (Noiz kontsultatua: 2020-05-19).
↑ «Linguatec proiektua abian jartzeko lehen bilera Elhuyarren» Elhuyar (Noiz kontsultatua: 2020-05-19).^{[Betiko hautsitako esteka]}
↑ (Ingelesez) «Meeting of LINGUATEC project in Donostia (2019-02-21)» Ixa Group. Language Technology. (Noiz kontsultatua: 2020-05-19).
↑ «Còrpus deu Congrès» corpus.locongres.com (Noiz kontsultatua: 2020-05-19).
↑ (Frantsesez) «Résultats de l'enquête sociolinguistique relative à la pratique et aux représentations de la langue occitane en Nouvelle-Aquitaine, en Occitanie et au Val d’Aran» Ofici Occitan 2020-06-15 (Noiz kontsultatua: 2021-06-18).

Ikus, gainera

Kanpo loturak

Hizkuntza honek bere Wikipedia du: Bisita ezazu.

Euskera-okzitano hiztegia, Joan Francés Blanc, 1996
Okzitaniera-euskara hiztegia, Joan Francés Blanc, 2000
Automatikoki sortutako euskara-okzitaniera eta okzitaniera-euskara hiztegia Elhuyarren
(Okzitanieraz) Chambra d'Òc Kultur elkarte italiar-okzitaniarra
(Okzitanieraz) Ací Gasconha Kultur elkarte gaskoniarra
(Frantsesez) Hiztegiak eta gramatika
(Okzitanieraz) (Frantsesez) Ostal d'Occitània de Tolosa

Datuak: Q14185
Multimedia: Occitan language / Q14185

[1] UNESCO etxea- Munduko hizkuntzen amarauna, Okzitaniera

[2] ttps://web.archive.org/web/20131220114419/http://paperekoa.berria.info/agenda/2013-12-20/030/001/okzitanierazko_lehenengo_telebista_abiatuko_dute_gaur_internet_bidez.htm

[3] «Lo Congrès - Istoric» locongres.org (Noiz kontsultatua: 2020-05-19).

[:0-4] Partzuergoa – Interreg Poctefa Linguatec. (Noiz kontsultatua: 2020-05-19).

[5] Baliabideak – Interreg Poctefa Linguatec. (Noiz kontsultatua: 2020-05-19).

[6] «Linguatec proiektua abian jartzeko lehen bilera Elhuyarren» Elhuyar (Noiz kontsultatua: 2020-05-19).^{[Betiko hautsitako esteka]}

[7] (Ingelesez) «Meeting of LINGUATEC project in Donostia (2019-02-21)» Ixa Group. Language Technology. (Noiz kontsultatua: 2020-05-19).

[8] «Còrpus deu Congrès» corpus.locongres.com (Noiz kontsultatua: 2020-05-19).

[9] (Frantsesez) «Résultats de l'enquête sociolinguistique relative à la pratique et aux représentations de la langue occitane en Nouvelle-Aquitaine, en Occitanie et au Val d’Aran» Ofici Occitan 2020-06-15 (Noiz kontsultatua: 2021-06-18).

[1]

[2]

[3]

[4]

[5]

[6]

[7]

[8]

[9]

i e a Hizkuntza erromantzeak
Ekialdekoak	Aromaniera • Errumaniera (moldaviera, valakiera) • Istro-romaniera • Meglenera
Hegoaldekoak	Sardiniera (campidanera, logudorera, sassariera)
Mendebaldekoak	Astur-leonesa (asturiera, extremadurera, leonesa, mirandesa, montañesa) • Borgoinera • Dalmaziera • Emiliano-romagnoloa • Erretorromaniera (erromantxea, friuliera, ladinoa) • Franche-comtera • Frankoprovenzera • Frantsesa • Galiziera (eonaviera, fala) • Galoa • Gaztelania (ekuatoreginear gaztelania, europar gaztelania, filipinar gaztelania, kaloa, latinoamerikar gaztelania, saharar gaztelania) • Istriera • Italiera • Katalana (algerera, balearrera, erdialdekoa, valentziera) • Korsikera (gallurera) • Ladinoa • Liguriera (genovera, monakoera) • Lombardiera • Lorrenera • Mozarabiera • Nafar-aragoiera (aragoiera, errioxera, nafar erromantzea) • Napoliera • Normandiera (jerseyera, guerneseyera) • Okzitaniera (gaskoia, limousinera, proventzera) • Piemontera • Pikardiera • Poitevin • Portugesa (afrikar portugesa, brasildar portugesa) • Siziliera • Valoniera • Veneziera • Xanpainera
Letra etzanez: hizkuntza hilak. Letra lodiz: 5 milioi hiztun baino gehiagokoak. Parentesi artean: parentesiaren ezkerrean dagoen hizkuntzaren dialektoak.