Jack McQuillan
| Beathaisnéis | |||||||||||||||||
|---|---|---|---|---|---|---|---|---|---|---|---|---|---|---|---|---|---|
| Breith | 30 Lúnasa 1920 Béal Átha Feorainne, Éire  | ||||||||||||||||
| Bás | 8 Márta 1998 77 bliana d'aois | ||||||||||||||||
| Seanadóir na hÉireann | |||||||||||||||||
| 23 Meitheamh 1965 – 24 Iúil 1969 Téarma parlaiminte: 11ú Seanad Éireann Toghcheantar: An Rolla Riaracháin | |||||||||||||||||
 Teachta Dála | |||||||||||||||||
| 27 Deireadh Fómhair 1963 – 11 Márta 1965 (díscaoileadh na parlaiminte) Téarma parlaiminte: 17ú Dáil Toghcheantar: Ros Comáin | |||||||||||||||||
| Teachta Dála | |||||||||||||||||
| 11 Deireadh Fómhair 1961 – 27 Deireadh Fómhair 1963 (díscaoileadh na parlaiminte) Téarma parlaiminte: 17ú Dáil Toghcheantar: Ros Comáin Toghadh i: Olltoghchán na hÉireann, 1961 | |||||||||||||||||
| Teachta Dála | |||||||||||||||||
| 16 Bealtaine 1958 – 1 Meán Fómhair 1961 (díscaoileadh na parlaiminte) Téarma parlaiminte: 16ú Dáil Toghcheantar: Ros Comáin | |||||||||||||||||
| Teachta Dála | |||||||||||||||||
| 20 Márta 1957 – 16 Bealtaine 1958 (díscaoileadh na parlaiminte) Téarma parlaiminte: 16ú Dáil Toghcheantar: Ros Comáin Toghadh i: Olltoghchán na hÉireann, 1957 | |||||||||||||||||
| Teachta Dála | |||||||||||||||||
| 2 Meitheamh 1954 – 13 Nollaig 1956 (díscaoileadh na parlaiminte) Téarma parlaiminte: 15ú Dáil Toghcheantar: Ros Comáin Toghadh i: Olltoghchán na hÉireann, 1954 | |||||||||||||||||
| Teachta Dála | |||||||||||||||||
| 13 Meitheamh 1951 – 23 Aibreán 1954 (díscaoileadh na parlaiminte) Téarma parlaiminte: 14ú Dáil Toghcheantar: Ros Comáin Toghadh i: Olltoghchán na hÉireann, 1951 | |||||||||||||||||
| Teachta Dála | |||||||||||||||||
| 18 Feabhra 1948 – 2 Bealtaine 1951 (díscaoileadh na parlaiminte) Téarma parlaiminte: 13ú Dáil Toghcheantar: Ros Comáin Toghadh i: Olltoghchán na hÉireann, 1948 | |||||||||||||||||
| Gníomhaíocht | |||||||||||||||||
| Gairm | imreoir peile Gaelaí, polaiteoir, ceardchumannaí | ||||||||||||||||
| Ball de pháirtí polaitíochta | Clann na Poblachta | ||||||||||||||||
| Spórt | peil Ghaelach | ||||||||||||||||
| |||||||||||||||||
Polaiteoir as Béal Átha Feorainne ab ea Jack McQuillan (30 Lúnasa 1920 – 8 Márta 1998).[1] Polaiteoir radacach agus peileadóir cumasach a bhí i McQuillan, a raibh a chur amach féin aige ar chúrsaí sóisialta agus cúrsaí forbartha sa tír seo, ach nach raibh compordach ar deireadh in aon pháirtí polaitíochta.[2] Bhí sé ina bhall de Chlann na Poblachta, Páirtí Náisiúnta Daonlathach Forásach, Páirtí an Lucht Oibre agus Páirtí Sóisialach an Lucht Oibre.
Fear spóirt
[cuir in eagar | athraigh foinse]Bhuaigh Ros Comáin an Chraobh Peile faoi dhó sna 1940idí, agus Jack McQuillan ar an bhfoireann. Ghnóthaigh Ros Comáin an Chraobh Uile-Éireann faoi dhó – uair amháin in aghaidh an Chabháin i 1943 agus uair eile in aghaidh Chiarraí i 1944. Ba é McQuillan a scóráil an cúl cinniúnach a bhuaigh an cluiche do Ros Comáin in aghaidh an Chabháin i 1943.
Duine an-aclaí ar fad a bhí ann – dhéanadh sé traenáil corpfhorbartha nuair nach mbíodh mórán cainte faoina leithéid.[2] Oifigeach airm a bhí in Jack McQuillan ar feadh Ré na Práinne.
Sóisialaí
[cuir in eagar | athraigh foinse]Sheas cáil McQuillan mar pheileadóir dhó nuair a chuaigh sé leis an bpolaitíocht le Clann na Poblachta. D’éirigh McQuillan as an bPáirtí i 1951, i ngeall ar an gcaoi ar chaith siad leis an Dr Noel Browne, tar éis dó an Scéim Máithreacha agus Leanaí a chur chun cinn.[2]
Deirtear gur cuireadh i leith McQuillan go raibh sé i gcoinne na hEaglaise, ach ina ainneoin sin d’éirigh leis mar Neamhspleách sa gcéad Olltoghchán eile i 1951..
Ba iad McQuillan agus Browne an t-aon bheirt Teachta Dála a bhí ag an bPáirtí Náisiúnta Daonlathach Forásach, (NPD) i 1958, ach bhí scileanna agus taithí na mblianta acu ar bhain siad an-úsáid astu i dTeach Laighean. Chuireadar an-bhrú ar rialtas Fhianna Fáil ag cur ceisteanna agus ag iarraidh díospóireachtaí go dtí gur athraíodh na rialacha d’aon turas chun a leithéid a chosc ar aon pháirtí nach raibh seachtar teachtaí acu.[2]
I 1963 chuaigh McQuillan isteach i bPáirtí an Lucht Oibre. Ba mhinic an masla ‘Ask Khrushchev’ a chaitheamh leis sa Dáil – tagairt do cheannaire an Aontais Shóivéadaigh. Chuir McQuillan an dlí ar an Roscommon Herald nuair a thuairisc siad gur dhúirt polaiteoir áitiúil gur Cumannach a bhí ann. Bhuaigh sé an cás clúmhillte ach níor cheadaigh an breitheamh ach cúiteamh leathphingine dó.
Ach de réir a chéile, chuaigh an droch-cháil a bhain le bheith ina radacach agus an phoiblíocht ón gcás cúirte i bhfeidhm ar na vótálaithe agus chaill McQuillan a shuíochán i 1965.
Bhuaigh McQuillan ansin suíochán sa Seanad (1965–9) agus choinnigh sé air ag brú polasaithe maidir le dul chun cinn na tuaithe agus cúrsaí tionsclaíochta.
Ar scor
[cuir in eagar | athraigh foinse]Thit sé amach le Páirtí an Lucht Oibre sa bhliain 1968/69. Chaill sé a mhuinín sa bpolaitíocht agus d’éirigh sé as Páirtí an Lucht Oibre sa bhliain 1969. Bhog sé féin agus a chlann go Alicante na Spáinne mar ar chaith siad seacht mbliana le linn 1969-1976 (agus an deachtóir Franco fós bhfeidhm ar dtús).[3] Chaitheadar bliain i bPáras ina dhiaidh sin (1976-1977).
I 1977 bhí sé ar dhuine den dream a bhunaigh Páirtí Sóisialach an Lucht Oibre ach d’éirigh sé as i 1979 toisc go raibh siad ag tacú leis an bpoblachtánachas míleata ina gcuid polasaithe maidir le Tuaisceart Éireann.[2]
I 1998, bhásaigh sé i mBaile Átha Cliath.
Féach freisin
[cuir in eagar | athraigh foinse]Tagairtí
[cuir in eagar | athraigh foinse]- ↑ "McQuillan, John (‘Jack’) | Dictionary of Irish Biography" (en). www.dib.ie. Dáta rochtana: 2023-08-05.
- ↑ 2.0 2.1 2.2 2.3 2.4 Mairéad Ní Nuadháin (4 Lúnasa 2023). "Polaiteoir radacach agus peileadóir cumasach, ach ar éigean a chloisimid focal faoi" (ga-IE). Tuairisc.ie. Dáta rochtana: 2023-08-05.
- ↑ Sin rud nach ndearna mórán daoine as an tír seo sna seascaidí. Ní raibh an t-uafás cainte ar chor ar bith ar an Spáinn, mar ionad saoire ná mar ionad cónaithe.