Lemosin (Occitània)

Lemosin (Occitània)

Administracion
Capitala	Lemòtges
Geografia
Coordenadas	45° 50′ 04″ N, 1° 15′ 42″ E

Lemosin es una region istorica d'Occitània. Correspond a la ciutat antica dau pòble gau daus Lemoviç. Uei correspond aproximativament aus departaments de Cruesa, Nauta Vinhana e Corresa e a la Charanta Lemosina.

Sa capitala istorica es Limòtges (o Lemòtges) e lo gentilici es lemosin -a.

Galariá

• 
  Usercha
• 
  L'egleisa de Sant Bartomieu de Confolent
• 
  Lo pont de Sant Marçau de Lemòtges
• 
  Lo merchat cobèrt de Lemòtges
• 
  La plaça de la Republica a Lemòtges
• 
  Una eoliana sus lo replanat de Miuvachas
• 
  Briva la Galharda
• 
  Lo chastèu de Rechoard

Eraudica

L'escut ancian (Ostau de Combòrn) es d'aur a cinc (o sieis) cotisas de gules. L'escut moderne (Ostau de Dreux-Bretanha) es d'ermina, bordat de gules.

• 
  Escut ancian de Lemosin, de l'Ostau de Combòrn
• 
  Escut modèrne de Lemosin, de l'Ostau de Dreux-Bretanha

Istòria

Segon Juli Cesar dins los Comentaris sus la Guerra de las Gàllias, la tribú daus lemoviç aguet un grand ròtle dins la resisténcia galla. Lor capitala era l'oppidum de Durotincum (actuau Vilatjobert, situat a Sent Deunis). 'Quela vila era lo punt d'encontre d'itineraris economics nombrós, en fach, los lemoviç eran coneguts per lor produccion d'aur esplechat dins las minas a ciau dubert que i eran nombrosas. D'autres sites avián lor importància coma lo pueg d'Eissandon, Aiun, Usercha o encara Sent Gençan.

Lo territòri daus lemoviç comencet de se romanizar en 52 avans lo Crist, data de sa conquesta per Cesar. Las vilas fugueren desplaçadas per fin de facilitar lo contraròtle de las rotas comercialas e daus autoctòns per l'autoritat romana. Aitau, la capitala daus lemoviç fuguet transferida a Augustoritum, la futura Lemòtges, ciutat creada entierament per los romans vers 10 avans lo Crist per fin de facilitar lo viatge per la ribiera de Vinhana.

Lemosin possedissiá de las ciutats segondàrias coma Briva Curretia (Briva) dins la rota Lion-Bordèu, Acitodunum (Aiun) dins la rota Borges-Clarmont. D'autres sites mai religiós, qu'òm ne serva daus vestigis, fugueren creats o romanizats, coma Cassinomagus (Chassanom) per sos termes, Tintinhac a Navas emb un santuari ente se remarca un temple e un teatre, e tanben Los Cars a Sent Merd.

Daus riches proprietaris que vivián dins de vilas esplechavan las champanhas lemosinas. La toponimia a servat lo remembre de 'quelas esplechas agricòlas e quauques còps de lor proprietari. Daus vilatges que lor nom s'achaba en -ac son d'ancianas vilas, coma Flavinhac (vila de Flavinius), Solenhac (Solemniacum, vila de Solemnius). Se son trobats daus vestigis arqueologics coma los Convents a La Chapela, la vila de Peira Bufiera, o la vila galloromana e los termes de Brachaud, au nòrd de Lemòtges.

Geografia

Localizacion aproximativa de la província istorica de Lemosin, dins los limits d'Occitània (en roge). En blau: una configuracion tardiva de la província de Lemosin au Regim Ancian, mas i chau apondre la zona de la Marcha au nòrd e au nòrd-oèst d'aquela zona blava.

Dialecte

Vejatz dialecte Lemosin.

Lo Lemosin linguistic e administratiu, e sas vilas principalas.

Vejatz tanben

• Lemosina (raça bovina)

Liams extèrnes

• Institut d’Estudis Occitans dau Lemosin
• Collectiu Arri! (collectiu limotjaud per l'occitan (eveniments, lexics, cartas ...))