တူၼ်ၶူးလူင် ၸဝ်ႈၼရၼႃႇထ
| တူၼ်ႈၶူးလူင် ၸဝ်ႈၼရၼႃႇထ | |
|---|---|
 | |
| သႃႇသၼႃႇ | သႃႇသၼႃႇပုတ်ႉထ |
| ပၢႆး (ၵိူင်း) | ထေရဝႃတ |
| ၸုမ်ႈၵုၼ်း | ဢၵ်ႉၵမႁႃႇသတ်ႉထမ်ႇၸေႃးတိၵထၸ |
| ၵေႃႉတႄႇတင်ႈ |
|
| ၸိုဝ်ႈတၢင်ႇၸိူဝ်း | ၸၢႆးထုၼ်းလႅင်ႇ |
| ၵဵဝ်ႇလူၺ်ႈသုၼ်ႇတူဝ် | |
| ၵူၼ်းမိူင်း |  တႆး |
| ၵိူတ်ႇ | တီႇသႅမ်ႇပႃႇ 15၊ 1951 ၽၢႆႇၵျွင်းၶမ်း၊ ၼႂ်းၸႄႈမိူင်းၶွၼ်၊ မိူင်းၶႄႇ |
| ပေႃႈမႄႈ | ၶိင်းမၢၼ်ႇသႅင်+ၼၢႆးမၢၼ်ႇသႅင် (ၾႃႉဝၢဝ်းၸုမ်ႈ) |
| ၽူႈယႂ်ႇၵူၼ်းလူင် | |
| ၵွၼ်းဝတ်ႉ |
|
“ၸဝ်ႈသြႃႇလူင်ႁဝ်းၼႆႉ ပဵၼ်ၵူၼ်းလႅတ်းသႅဝ်း၊ ၽႂ်းၽၢႆ၊ ႁတ်းႁၢၼ်၊ ဝူၼ်ႉၵႂၢင်ႈ၊ ႁၼ်ၵႆ ၼႂ်းလွင်ႈတူင်ႉၼိုင်ၼႃႈၵၢၼ် သႃႇသၼႃႇပုတ်ႉထၸဝ်ႈၵူၺ်းဢမ်ႇၵႃး မေႃႁၵ်ႉႁွမ်ထိင်းသိမ်းပႂ်ႉပႃး လိၵ်ႈလၢႆး/ၸိူဝ်ႉၶိူဝ်း/သႃႇသၼႃႇ ၸဝ်ႈၼိုင်ႈ”
ၸႃႇတိ လႄႈ ပေႃႈမႄႈ
[မႄးထတ်း | မႄးထတ်းငဝ်ႈငႃႇ]ၸဝ်ႈသြႃႇလူင်ႁဝ်းၶႃႈ လႆႈၵိူတ်ႇႁၼ်ၼႃႈ မိူဝ်ႈပီႊၵေႃးၸႃႇ 1313 ၶု၊ လိူၼ်ၸဵင်လွင်ႈ 2 ၶမ်ႈ၊ ဝၼ်းသဝ်သေ ပဵၼ်လုၵ်ႈၸၢႆးလဵဝ် ၶိင်းမၢၼ်ႇသႅင် လႄႈ ၼၢႆးမၢၼ်ႇသႅင် (ၾႃႉဝၢဝ်းၸုမ်ႈ)၊ ၶိူဝ်းႁိူၼ်း “ၶိူဝ်းၾၢင်”၊ ၼႂ်းၸေႊၽၢႆႇၵျွင်းၶမ်း၊ မိူင်းၶွၼ်၊ ၸိုင်ႈၶႄႇ ၶႃႈယဝ်ႉ။[1]
ၶဝ်ႈယူႇၼႂ်းသႃႇသၼႃႇ၊ ၶိုၼ်ႈပဵၼ်ၽဝသႃႇမၼေႇ လႄႈ ရႁၢၼ်း
[မႄးထတ်း | မႄးထတ်းငဝ်ႈငႃႇ]ပေႃႈမႄႈသွင်ၸဝ်ႈ လႆႈဢွၼ်ဢဝ် ၸဝ်ႈသြႃႇလူင်ႁဝ်း ဢၼ်ၸိုဝ်ႈမိူဝ်ႈလဵၵ်ႉ ႁွင်ႉဝႃႈ “ၸၢႆးထုၼ်းလႅင်ႇ” လႆႈမိူဝ်းယူႇသဝ်း တႂ်ႈၵုင်ႇမုၼ်ငဝ်း တမ်ႈတီႈၸဝ်ႈသြႃႇလူင်ဝိသုတ်ႉထိ ၵျွင်းၵမ်ႇမထၢၼ်း၊ ဝဵင်းမူႇၸေႊ မိူဝ်ႈပီႊၵေႃးၸႃႇ 1324 ၼီႈ၊ လိူၼ်ႁူၵ်းလွင်ႈ 2 ၶမ်ႈ (20.5.1962) ဝၼ်းသဝ်။ ဝၢႆးသေၼၼ်ႉ လႆႈၶိုၼ်ႈပဵၼ်ၽဝၸဝ်ႈသၢင်ႇ မိူဝ်ႈပီႊၵေႃးၸႃႇ 1325 ၼီႈ၊ လိူၼ်သီႇမူၼ်း (ပီႊၶရဵတ်ႈ 1964) တီႈဝိႁၢၼ်ႇတိူၵ်ႈသွၼ်ထမ်းဢွင်ႇမင်ႇၵလႃႇ၊ ဝဵင်းပၢင်ႇသၢႆး မိူဝ်ႈဢႃႇယုလႆႈ 12 ၶူပ်ႇ။ ၸိုဝ်ႈၸဝ်ႈသၢင်ႇ ႁွင်ႉဝႃႈ “ရႃႇၸဝမ်ႇသ”။ ထိုင်မိူဝ်ႈဢႃႇယု ၸဝ်ႈထူၼ်ႈတဵမ် 20 ၸဝ်ႈသြႃႇလူင် ဝိသုတ်ႉထိ ၵျွင်းၵမ်ႇမထၢၼ်း ၸင်ႇႁဵတ်းပွႆးၶၢမ်ႇၸၢင်းပၼ် မႅၼ်ႈမိူဝ်ႈပီႊၵေႃးၸႃႇ 1332 ၼီႈ၊ လိူၼ်သၢမ်လွင်ႈ 7 ၶမ်ႈ (ပီႊၶရဵတ်ႈ 1971) လႆႈယုၵ်ႉယွင်ႈ ၽဝၸဝ်ႈသၢင်ႇ ၶိုၼ်ႈပဵၼ်ၽဝရႁၢၼ်း တီႈၶၼ်ႇထသိမ်ႇ ဝတ်ႉမႁႃႇဝၼ်ႇ၊ ဝဵင်းမူႇၸေႊ ၶႃႈယဝ်ႉ။ ၸဝ်ႈသြႃႇလူင်ပၺ်ႇၺႃႇသႃႇမိ ဝတ်ႉမႁႃႇဝၼ်ႇ (ၵျွင်းႁွင်ႇ)၊ ဝဵင်းမူႇၸေႊ လႆႈႁဵတ်းပဵၼ် ဢုပတ်ႉၸေႇသြႃႇ ၸဵမ်သၢင်ႇတင်းၸၢင်းယဝ်ႉ။ မိူဝ်ႈၶၢမ်ႇၸၢင်းၼၼ်ႉ ၸဝ်ႈသြႃႇလူင်ႁဝ်း ၸင်ႇလႆႈ ၸိုဝ်ႈဝႃႈ “ၸဝ်ႈၸၢင်း ၼရၼႃႇထ”။[1]
ဢွင်ႈတီႈသွၼ်ႁဵၼ်း ပရိယတ်ႉတိ
[မႄးထတ်း | မႄးထတ်းငဝ်ႈငႃႇ]ဝိႁၢၼ်ႇတိူၵ်ႈသွၼ်ထမ်းဢွင်ႇမင်ႇၵလႃႇ၊ ဝဵင်းပၢင်ႇသၢႆးၼႆႉ ပဵၼ်ငဝ်ႈဢွင်ႈတီႈသွၼ်ႁဵၼ်း ပရိယတ်ႉတိ ၸဝ်ႈသြႃႇလူင်ႁဝ်း ၸဵမ်မိူဝ်ႈလဵၵ်ႉၼၼ်ႉသေ ထိုင်မိူဝ်ႈပီႊၶရဵတ်ႈ 1968 မိူဝ်ႈဢႃႇယု လႆႈ 16 ၶူပ်ႇၼၼ်ႉ ၸဝ်ႈသြႃႇမင်ႇၵလ ဝိႁၢၼ်ႇတိူၵ်ႈသွၼ်ထမ်းဢွင်ႇမင်ႇၵလႃႇ၊ ဝဵင်းပၢင်ႇသၢႆး ၸင်ႇဢွၼ်ၵႂႃႇႁဵၼ်းလိၵ်ႈ တီႈမိူင်းမၢၼ်းတလေး 2 တီႈ 1) အရှေဝိသုဒ္ဓါရုံ ရမည်းသင်းကျောင်း၊ တမ်ႈတီႈ ၸဝ်ႈသြႃႇလူင် ဦးဉာဏဝံသ 2) ဆိုင်းတန်းကျောင်း (ခ) မင်္ဂလာဗိမာန်ဝိသုဒ္ဓါရုံတိုက်သစ် တမ်ႈတီႈၸဝ်ႈသြႃႇလူင် ဦးပညာသီရိဘိဝံသ ၶႃႈယဝ်ႉ။[1] ဝၢႆးသေ ၸဝ်ႈသြႃႇႁဝ်း လႆႈထုၵ်ႇယုၵ်ႉယွင်ႈ ၶိုၼ်ႈပဵၼ်ၸဝ်ႈၼင်ႈၵျွင်း ဝတ်ႉမႁႃႇဝၼ်ႇ၊ ဝဵင်းမူႇၸေႊ မွၵ်ႈ 3 ဝႃႇယဝ်ႉ ၸဝ်ႈသြႃႇႁဝ်း လႆႈၵႂႃႇသွၼ်ႁဵၼ်း ဢဝ်လၢႆးၼႄၵမ်ႇမထၢၼ်း တီႈတိူၵ်ႈၵမ်ႇမထၢၼ်းမႁႃႇၸီႇ၊ ဝဵင်းလူင်တႃႈၵုင်ႈ ၼႆလႄႈ ၸုမ်းမႁႃႇၸီႇၶဝ်ၸဝ်ႈ ၸင်ႇလႆႈၼွပ်ႇပၼ်ၶႅပ်းမႂ်ႊမၵ်းမၼ်ႈ ၸဝ်ႈၼႄၵၢၼ်တြႃး "ၵမ်ႇမတ်ႉထႃႇၼႃႇၸရိယ" ၶႃႈယဝ်ႉ။[2]
ၶိုၼ်ႈပဵၼ် ၸဝ်ႈသြႃႇၼင်ႈၵျွင်း
[မႄးထတ်း | မႄးထတ်းငဝ်ႈငႃႇ]ပီႊၵေႃးၸႃႇ 1335 ၼီႈ၊ လိူၼ်သိပ်းဢဵတ်းလွင်ႈ 7 ၶမ်ႈ (18.10.1973) မိူဝ်ႈဝႃႇၸဝ်ႈလႆႈ 2 ဝႃႇ ၼၼ်ႉ လႆႈယုၵ်ႉယွင်ႈၶိုၼ်ႈပဵၼ် ၸဝ်ႈၵႂၢၼ်းၵျွင်း တီႈဝတ်ႉမႁႃႇဝၼ်ႇ၊ ဝဵင်းမူႇၸေႊ ပႃးထူၼ်ႈသွင်။
ၸိုဝ်ႈၸုမ်ႈ ဢၼ်လူင်ပွင်ၸိုင်ႈ လႆႈလူႇတၢၼ်း
[မႄးထတ်း | မႄးထတ်းငဝ်ႈငႃႇ]- သတ်ႉထမ်ႇမၸေႃးတိၵထၸ မိူဝ်ႈပီႊၶရဵတ်ႈ 1992။
- မႁႃႇသတ်ႉထမ်ႇမၸေႃးတိၵထၸ မိူဝ်ႈပီႊၶရဵတ်ႈ 2014။
- ဢၵ်ႉၵမႁႃႇသတ်ႉထမ်ႇမၸေႃးတိၵထၸ မိူဝ်ႈပီႊၶရဵတ်ႈ 2022။
ၼႃႈၵၢၼ်ပုၼ်ႈၽွၼ်း ၼႂ်းသင်ႇၶၸိုင်ႈမိူင်း/သင်ႇၶၸိုင်ႈတႆး/သင်ႇၶတူင်ႇဝဵင်း
[မႄးထတ်း | မႄးထတ်းငဝ်ႈငႃႇ]- ပီႊၶရဵတ်ႈ 1989-2004 ထုၵ်ႇလႆႈယုၵ်ႉယွင်ႈ ၶိုၼ်ႈပဵၼ်ၽူႈၼၢမ်းၼႂ်း ၸုမ်းသင်ႇၶ ၼႃႇယၵ တူင်ႇဝဵင်းမူႇၸေႊ။
- ပီႊၶရဵတ်ႈ 1995 လႆႈႁၢပ်ႇၵၢၼ် ပဵၼ်ၽူႈမၢႆလူင် မူႇၸုမ်းထတ်းလိၵ်ႈ ပပ်ႉၾိင်ႈငႄႈ ပုတ်ႉထၽႃႇသႃႇ၊ မုၵ်ႉၸုမ်းငဝ်ႈငုၼ်းလူင်သင်ႇၶႃႇၸိုင်ႈတႆး ဢၼ်လႆႈႁဵတ်းပၢင်ၵုမ်တီႈ မူႇၸေႊ။
- ပီႊၶရဵတ်ႈ 1998 လႆႈႁၢပ်ႇၵၢၼ် ပဵၼ်ႁူဝ်ၼႃႈ ၸုမ်းၾိင်ႈငႄႈပုတ်ႉထ ငဝ်ႈငုၼ်းမုၵ်ႉၸုမ်း လူင်သင်ႇၶႃႇၸိုင်ႈတႆး။
- ပီႊၶရဵတ်ႈ 2011 ထုၵ်ႇလႆႈယုၵ်ႉယွင်ႈ ၶိုၼ်ႈပဵၼ်ၵႅမ်ႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈတႆး တေႃႇထိုင် ယၢမ်ႈလဵဝ်။
- ပီႊၶရဵတ်ႈ 2013 ပဵၼ်ႁူဝ်ၼႃႈၸုမ်း ၽၢႆႇငိုၼ်းတွင်း (Financial Committee) “ၶေႃးလဵၵ်ႉသႃႇရိပုတ်ႉတ”၊ ဝဵင်းမူႇၸေႊ တႄႇပီႊ 2013 တေႃႇထိုင် ယၢမ်းလဵဝ်။
- ပီႊၶရဵတ်ႈ 2017 ထုၵ်ႇတၢင်ႇပဵၼ်ႁူဝ်ပဝ်ႈလူင် မုၵ်ႉၸုမ်းလူင်သင်ႇၶႃႇထုင်ႉမၢဝ်း ၶၢဝ်းတၢင်း 2 ပီႊ၊ သိုပ်ႇၼၼ်ႉ ၸင်ႇၶိုၼ်းတၢင်ႇပဵၼ် ႁူဝ်ပဝ်ႈၸေႊဝဵင်းမူႇၸေႊ တႃႇမုၵ်ႉ ၸုမ်းသင်ႇၶႃႇထုင်ႉမၢဝ်း တေႃႇထိုင် ယၢမ်းလဵဝ်။
- ပီႊၶရဵတ်ႈ 2019 ထုၵ်ႇလႆႈယုၵ်ႉယွင်ႈ ၶိုၼ်ႈပဵၼ်ၽူႈၶဝ်ႈၸုမ်း နိုင်ငံတော်ဗဟို သံဃာ့ဝန်ဆောင် မိူဝ်ႈဝၼ်းထိ 13.8.2019။
- ပီႊၶရဵတ်ႈ 2020 ထုၵ်ႇတၢင်ႇပဵၼ်ၽူႈၶဝ်ႈၸုမ်းဢေႃးဝႃႇတႃႇၸရိယ လႄႈ ပဵၼ်ၽူႈၶဝ်ႈ ၸုမ်းဢွၼ်ႁႃငိုၼ်းၵွင်ၵၢင် ၵၢၼ်ၵေႃႇၵွင်းမူးလူင် သုဝၼ်ႇၼမိၵတႃႇမႁႃႇၸေႇတီႇ တီႈ လွႆႊတိုင်ၶမ်း၊ ဝဵင်းမူႇၸေႊ။
ၼႃႈၵၢၼ်သႃႇသၼႃႇ ဢၼ်ၸဝ်ႈသြႃႇဢွၼ်ႁူဝ်ႁဵတ်းသၢင်ႈ
[မႄးထတ်း | မႄးထတ်းငဝ်ႈငႃႇ]- ပီႊၶရဵတ်ႈ 1976 ၵေႃႇသၢင်ႈသိမ်ႇလူင် ဝတ်ႉမႁႃႇဝၼ်ႇ “သိမ်ႇဢုပ်းၶမ်းပဝ်းမိူင်း”။
- ပီႊၶရဵတ်ႈ 1980 ဝၼ်းဢွၼ်ႁဵတ်းပွႆးပထၢၼ်းပႃႇလိၸဝ်ႈ တေႃႇမိူဝ်ႈလဵဝ် (ပဵၼ်ပွၵ်ႈ ဢွၼ်တၢင်းသုတ်း မိူင်းထုင်ႉမၢဝ်း) မိူဝ်ႈပီႊသႃႇသၼႃႇ 2524 ၼီႈ လိူၼ်ႁႃႈမႂ်ႇ 1 ဝၼ်း တေႃႇထိုင် 7 ဝၼ်း (16.3.1980)။
- ပီႊၶရဵတ်ႈ 1983 ႁဵတ်းပွႆးဝၢတ်ႈ ပွၵ်ႈၵမ်း 2 တီႈဝတ်ႉမႁႃႇဝၼ်ႇ၊ ဝဵင်းမူႇၸေႊ။ မိူဝ်ႈႁဵတ်းပွႆးဝၢတ်ႈၼၼ်ႉ လႆႈဢွၼ်တင်ႈၸုမ်းသႃႇသၼႃႇၵီႊလွၼ်ႉသေ ႁဵတ်းပပ်ႉႁဵၼ်း လိၵ်ႈတႆးဢွၵ်ႇ တွၼ်ႈတႃႇပၢင်သွၼ်ၾိင်ႈငႄႈပုတ်ႉထ။
- ပီႊၶရဵတ်ႈ 1984 ဢွၼ်တင်ႈၸုမ်းထမ်ႇမၸၵ်ႉၵ တူင်ႇဝဵင်းမူႇၸေႊ။
- ပီႊၶရဵတ်ႈ 1985 ႁဵတ်းပွႆးယုၵ်ႉယွင်ႈၶူးမေႃတႆးလႄႈ ပီႊမႂ်ႇတႆး တီႈဝတ်ႉမႁႃႇဝၼ်ႇ၊ ပွၵ်ႉႁွင်ႇ၊ ဝဵင်းမူႇၸေႊ။
- ပီႊၶရဵတ်ႈ 1985 ႁဵတ်းပၢင်သွၼ် ငဝ်ႈႁၢၵ်ႈပုတ်ႉထ ၼႂ်းတူင်ႇဝဵင်းမူႇၸေႊ 10 ပီႊ ႁိမ်းႁွမ်း။
- ပီႊၶရဵတ်ႈ 1993 တႄႇတင်ႈႁူင်းထမ်းလူင်လႃႇၽမဵတ်ႉတႃႇ ဝတ်ႉမႁႃႇဝၼ်ႇ။
- ပီႊၶရဵတ်ႈ 1995 ၸဝ်ႈသြႃႇလူင်ၼရၼႃႇထ (မႁႃႇသတ်ႉထမ်ႇမၸေႃးတိၵထၸ) ဝတ်ႉမႁႃႇဝၼ်ႇ၊ ဝဵင်းမူႇၸေႊ လႆႈတိုၵ်းသူၼ်းတၵႃႇ ၵေႃႉဢၼ်ပဵၼ်ၼၢႆးသူၺ်ႇယဵၼ်ႇ (ႁွင်ႉ) ၼၢႆးၶၢဝ်သူၺ်ႇယဵၼ်ႇ ပွၵ်ႉပိၵ်ႉၸွႆႇ၊ ဝဵင်းမိူင်းၵုတ်ႈ တႄႇတင်ႈ ငိုၼ်းလူႇ 110,000 (ၼိူင်ႈသႅၼ်ပၢႆႊၼိူင်ႈမိုၼ်ႇ)သေ ဢွၼ်ပူၵ်းတင်ႈဝတ်ႉသႃႇသၼဝေႇပုင်ႇလၵျွင်းတႆး တီႈဝဵင်းလိူဝ်ႇ (မၢၼ်းတလေး) တွၼ်ႈတႃႇတေပဵၼ်ၽွၼ်းလီ သြႃႇလႄႈတၵ်ႉၵႃႇ မိူင်းတႆး/ မိူင်းမၢၼ်ႊ လႄႈ တႃႇလုၵ်ႈႁဵၼ်းသင်ႇၶတႆးယူႇယဝ်ႉ။
- ပီႊၶရဵတ်ႈ 2000 ၵေႃႇသၢင်ႈၵျွင်းလူင်သွင်ၸၼ်ႉလင်ၼိူင်ႈ တီႈဝတ်ႉသႃႇသၼ ဝေႇပုင်ႇလၵျွင်းတႆး၊ ဝဵင်းလိူဝ်ႇ။
- ပီႊၶရဵတ်ႈ 2006 တႄႇႁဵတ်းၽြႃးဢိၼ်းသၢၼ် လႄႈ ၵျွင်းၽြႃးဢိၼ်းသၢၼ် ဝတ်ႉမႁႃႇဝၼ်ႇ။ လိူဝ်ၼၼ်ႉ လႆႈမႄးၵုမ်းလုမ်းလႃး ၵွင်းမူးသွင်သူႇ လႄႈ ၵူႊလွင်ႈလွင်ႈ ဢိၵ်ႇၼႂ်းဝတ်ႉ/ၼွၵ်ႈ ဝတ်ႉတင်းၼမ်။
- ပီႊၶရဵတ်ႈ 2007 တႄႇတင်ႈ “ၸုမ်းသၢႆငဝ်းသႃႇသၼႃႇ” ဝဵင်းမူႇၸေႊ မိူဝ်ႈဝၼ်းထိ 25.12.2007 မႅၼ်ႈမိူဝ်ႈပီႊၵေႃးၸႃႇ 1368 ၼီႈ၊ ပီႊတႆး 2101 ၼီႈ၊ လိူၼ်ၸဵင်လႆႈ 17 ဝၼ်း။
- ပီႊၶရဵတ်ႈ 2008 ၵေႃႇသၢင်ႈႁူင်းထမ်းလူင် မင်ႇၵလႃႇပိမၢၼ်ႇလင်ၼိူင်ႈ တီႈဝတ်ႉ သႃႇသၼဝေႇပုင်ႇလၵျွင်းတႆး၊ ဝဵင်းလိူဝ်ႇ။
- ပီႊၶရဵတ်ႈ 2010 (ၵ) ၵေႃႇသၢင်ႈသိမ်ႇ ‘သူၺ်ႇတိၼ်ႇၸႃႇ’ လင်ၼိူင်ႈ တီႈဝတ်ႉသႃႇသၼ ဝေႇပုင်ႇလၵျွင်းတႆး၊ ဝဵင်းလိူဝ်ႇ။ (ၶ) ၵွပ်ႈဝတ်ႉမႁႃႇဝၼ်ႇတဵမ် 100 ပီႊ ၸင်ႇလႆႈတိူင်ႇ ပၢင်ႇသင်ႇၶႃႇ၊ ၽူႈယႂ်ႇၵူၼ်းလူင်ၶဝ်လႄႈ ပေႃႈမႄႈၸေႊဝဵင်းၶဝ်သေ လႆႈႁဵတ်းပွႆးပၢၵ်ႇပီႊ တဵမ် တီႈဝတ်ႉမႁႃႇဝၼ်ႇ၊ ဝဵင်းမူႇၸေႊ။
- ပီႊၶရဵတ်ႈ 2011 ၵေႃႇသၢင်ႈသိမ်ႇလူင်သၢမ်ၸၼ်ႉ တီႈဝတ်ႉမႁႃႇဝၼ်ႇ၊ ဝဵင်းမူႇၸေႊ။
- ပီႊၶရဵတ်ႈ 2012 ယၢတ်ႇၼမ်ႉၵျွင်း သိမ်ႇမႂ်ႇသၢမ်ၸၼ်ႉ တီႈဝတ်ႉမႁႃႇဝၼ်ႇ၊ ဝဵင်းမူႇၸေႊ။
- ပီႊၶရဵတ်ႈ 2013 တင်ႈၸုမ်းမႁႃႇဝၼ်ႇၾွင်ႇတေးသျိၼ်း တႃႇႁဵတ်းၼႃႈၵၢၼ်ၾိင်ႈငႄႈ ပုတ်ႉထ ဢၼ်ပဵၼ်ႁူင်းႁဵၼ်းထမ်ႇမ လႄႈ ႁူင်းႁဵၼ်းသင်ႇၶ တီႈဝတ်ႉမႁႃႇဝၼ်ႇ၊ ဝဵင်းမူႇၸေႊ မိူဝ်ႈဝၼ်းထိ (18.8.2013)။
- ပီႊၶရဵတ်ႈ 2014 လႆႈဢွၼ်ႁူဝ် ၸဝ်ႈၶူးဢိတ်ႉသရိယ လႄႈ သင်ႇၶႃႇၸဝ်ႈၼႂ်းၵျွင်း မႁႃႇဝၼ်ႇသေ ပိုတ်ႇၽုၺ်ႇပၢင်သွၼ်ၶၢဝ်းမႆႈ ဢၼ်ၵဵဝ်ႇလူၺ်ႈ လွင်ႈၾိင်ႈငႄႈပုတ်ႉထ/ လိၵ်ႈလၢႆးတႆး/ လိၵ်ႈဢင်းၵိတ်ႉ/လိၵ်ႈထႆး ၸိူဝ်းၼႆႉတႄႇၵႂႃႇ လုၵ်ႈႁဵၼ်းမီး 500 ပၢႆ။
- ပီႊၶရဵတ်ႈ 2015 (ၵ) ဢွၼ်ႁူဝ်ၼၢမ်းၼႃႈ ၸဝ်ႈတႃႇၼႁဝ်း ၶိင်းလွႆယွတ်ႈသႅင် သၢမ်လူင် + ၼၢႆးလွႆယွတ်ႈသႅင် လုၵ်ႈလၢၼ်တင်းၸုမ်း ပွၵ်ႉႁွင်ႇ၊ ဝဵင်းမူႇၸေႊသေ ၵေႃႇသၢင်ႈ ၵျွင်းလွႆမိူင်းသႅင်ယဝ်ႉလီငၢမ်း လႆႈယၢတ်ႇၼမ်ႉၵႂႃႇမိူဝ်ႈဝၼ်းထိ 8.4.2015။ (ၶ) ၶွတ်ႇ ၽွတ်ႈၸုမ်းႁႃငိုၼ်းၵွင်ၵၢင် မႁႃႇဝၼ်ႇၾွင်ႇတေးသျိၼ်းသေ ၽႅၼ်ၵၢၼ်တႃႇႁဵတ်း ပၢင်လူႇတၢၼ်းၵႂႃႇၸွမ်းၵူႊပီႊပီႊ မိူဝ်ႈဝၼ်းထိ (16.12.2015)။
- ပီႊၶရဵတ်ႈ 2016 (ၵ) ဢွၼ်ႁူဝ်ၸဝ်ႈတႃႇၼ ၶိင်း/ၼၢႆးသူၺ်ႇၵျွင်း (ၼမ်ႉဢုမ်) ပွၵ်ႉၵွင်းၼွင် လႄႈ ၶိင်းသူၺ်ႇၵျွင်း+ၼၢႆးမႂ်ႊငိုၼ်းမွင်ႇ (ၽူၺ်းႁုင်း) ၵေႃႇသၢင်ႈၵျွင်း သူဝ်ႇသူဝ်ႇပေႇပေႇယဝ်ႉလီငၢမ်းသေ လႆႈယၢတ်ႇၼမ်ႉၵႂႃႇမိူဝ်ႈ 7.7.2016 ။ (ၶ) လႆႈဢွၼ် ႁူဝ် ၸဝ်ႈၶူးပၺ်ႇၺႃႇၽေႃးၵ လႄႈ သင်ႇၶႃႇၸဝ်ႈၼႂ်းၵျွင်းမႁႃႇဝၼ်ႇသေ တႄႇပၢင်ၽိုၵ်း ၽွၼ်ႉမေႃသွၼ် ပွၵ်ႈၵမ်း 1 လႄႈ ပွၵ်ႈၵမ်း 2 ယဝ်ႉ သိုပ်ႇပိုတ်ႇၽုၺ်ႇ ႁူင်းႁဵၼ်းထမ်ႇမ ၼိူဝ်ဝဵင်း/ၼႂ်းၸေႊဝဵင်းမူႇၸေႊ 11 ဢွင်ႈတီႈ။
- ပီႊၶရဵတ်ႈ 2017 လႆႈဢွၼ်ႁူဝ် ၸဝ်ႈၶူးပၺ်ႇၺႃႇၽေႃးၵ လႄႈ သင်ႇၶႃႇၸဝ်ႈ ၼႂ်းၵျွင်းမႁႃႇဝၼ်ႇသေ တႄႇပၢင်ၽိုၵ်းၽွၼ်ႉမေႃသွၼ် ပွၵ်ႈၵမ်း 3 လႄႈ ပွၵ်ႈၵမ်း 4 ယဝ်ႉ သိုပ်ႇပိုတ်ႇၽုၺ်ႇ ႁူင်းႁဵၼ်းထမ်ႇမ ၼႂ်းၸေႊဝဵင်းမူႇၸေႊ/ ပၢင်ႇသၢႆး 12 ဢွင်ႈတီႈ။
- ပီႊၶရဵတ်ႈ 2018 (ၵ) လႆႈဢွၼ်ပိုတ်ႇၽုၺ်ႇ ႁူင်းႁဵၼ်းထမ်ႇမ ၼႂ်းၸေႊဝဵင်းမူႇ ၸေႊ/ပၢင်ႇသၢႆး 2 ဢွင်ႈတီႈ။ (ၶ) ဢွၼ်ႁူဝ်ၼၢမ်းၼႃႈ ၸဝ်ႈတႃႇၼ မူႇၸုမ်းလုၵ်ႈလၢၼ် ၶိူဝ်းလွႆဝၢတ်ႈသေ ၵေႃႇသၢင်ႈ ၵျွင်းႁူင်းၶိူဝ်းလွႆဝၢတ်ႈယဝ်ႉလီငၢမ်း လႆႈယၢတ်ႇၼမ်ႉၵႂႃႇမိူဝ်ႈ 12.12.2018 ။
- ပီႊၶရဵတ်ႈ 2019 (ၵ) လႆႈဢွၼ်ႁဵတ်းပၢင်ၽိုၵ်းၽွၼ်ႉမေႃသွၼ် ႁူင်းႁဵၼ်းထမ်ႇမ ပွၵ်ႈၵမ်း 5 တီႈဝတ်ႉပၼ်ႇၸဝၵ်ႉၵီႇ၊ လွႆတိုင်ၶမ်း၊ ဝဵင်းမူႇၸေႊ။ (ၶ) လႆႈဢွၼ်ႁူဝ် ၼၢမ်းၼႃႈ သင်ႇၶႃႇၸဝ်ႈဝတ်ႉမႁႃႇဝၼ်ႇ လႄႈ ၸဝ်ႈတႃႇၼတင်းလၢႆသေ လႆႈတွၵ်ႇလၵ်းမၵ်းမၢႆ ဢွင်ႈတီႈၵေႃႇသၢင်ႈၵျွင်းဢုမ်ႈမိူင်းသႅင်သင်ႇၶႃႇဝႃႇသ၊ ဝတ်ႉမႁႃႇဝၼ်ႇ၊ ဝဵင်းမူႇၸေႊ မိူဝ်ႈဝၼ်းထိ (15.2.2019)၊ ပီႊတႆး 2113 ၼီႈ၊ လိူၼ်သၢမ်မႂ်ႇ 11 ၶမ်ႈ ဝၼ်းသုၵ်း ယၢမ်းၼႂ် (10:42) မွင်း။
- ပီႊၶရဵတ်ႈ 2020 (ၵ) ဢွၼ်ႁူဝ်ၸဝ်ႈတႃႇၼတင်းလၢႆသေ မေးႁဵတ်းၵုင်းသွၼ်းၽြႃးမႂ်ႇ ဝတ်ႉမႁႃႇဝၼ်ႇ၊ ဝဵင်းမူႇၸေႊ။ (ၶ) ဢွၼ်ႁူဝ်သြႃႇ လႄႈ တၵႃႇမၢၼ်ႈၸေႊၵွင်းႁႆး၊ မိူင်းပေႃႈသေ ဢုပ်ႇၵုမ်ၵၼ် မိူဝ်ႈ (18.11.2020) တႃႇမႄးၵုမ်းလုမ်းလႃး ၵွင်းမူးၵဝ်ႇၵႄႇ လူင် ၸေႇယမင်ႇၵလႃႇႁွင်းမိူင်း တီႈမၢၼ်ႈၸေႊ၊ မိူင်းပေႃႈ။ ဝၼ်းတွၵ်ႇလၵ်းမင်ႇၵလႃႇ (25.11.2020)၊ ဝၼ်းတမ်းမၢၵ်ႇဢုတ်ႇရတၼႃႇ (11.12.2020)၊ ဝၼ်းသႂၢင်းထႃႇပၼႃႇ သတ်ႉတထႃႇၼ (12.2.2021)၊ ဝၼ်းတၢင်ႇထီး ပီသႅင်ၵွင်းမူး (22.5.2021)။
- ပီႊၶရဵတ်ႈ 2021 ဢွၼ်ႁူဝ်ၸဝ်ႈတႃႇၼတင်းၼမ်သေ ၵေႃႇသၢင်ႈၵျွင်းသိမ်ႇ မႂ်ႇ"ၸေႇယႃႉႁိူင်း" တီႈမၢၼ်ႈၸေႊ၊ မိူင်းယႃႉလီငၢမ်းယဝ်ႉ လႆႈယၢတ်ႇၼမ်ႉၵႂႃႇမိူဝ်ႈ (11.3.2021)။
- ပီႊၶရဵတ်ႈ 2022 ၸဝ်ႈသြႃႇလူင်ႁဝ်း လႆႈဢွၼ်ႁူဝ်ၼၢမ်းၼႃႈ သင်ႇၶႃႇၸဝ်ႈ ဝတ်ႉမႁႃႇဝၼ်ႇ လႄႈ တၵ်ႉၵႃႇတင်းၼမ်သေ ႁဵတ်းပဵၼ်ပွႆးယၢတ်ႇၼမ်ႉ ၵျွင်းဢုမ်ႈမိူင်းသႅင် သင်ႇၶႃႇဝႃႇသ (ၵျွင်းမႂ်ႇၸဵတ်းၸၼ်ႉ) မိူဝ်ႈဝၼ်းထိ (16-19/12/2022) မႅၼ်ႈမိူဝ်ႈပီႊတႆး 2117 ၼီႈ၊ လိူၼ်ၸဵင်လွင်ႈ 9 ၶမ်ႈ တေႃႇထိုင် 12 ၶမ်ႈ။