藍玉
藍玉（？—1393年）係喺明朝初期一位出名嘅將軍，係安徽定遠人，同胡惟庸係同鄉，亦係常遇春嘅妻弟。佢喺洪武十二年嘅秋天做咗永昌侯，同一年仲做埋征虜大將軍。到二十一年再做大將軍、封做涼國公。佢後嚟畀明太祖懷疑佢謀反，之後處決咗，總共牽連到一萬五千人，歷史上叫做「藍玉案」。
生平
[編輯]藍玉早年係由常遇春照顧，而因為佢「臨戰勇敢，所向多捷」，所以常遇春成日喺朱元璋面前讚佢。後嚟，佢因為係「管軍鎮撫」積功，而做咗「大都督府僉事」。
喺洪武四年（1371年），藍玉同傅友德進攻四川；洪武五年（1372年）佢首先同大將軍徐達大贏北元，跟住之後再同沐英攞返吐番。由於佢立咗好多戰功，所以佢喺明洪武十二（1379年）封咗做永昌侯。
到洪武十四年（1381年），藍玉以征南嘅左副將軍嘅身份，再同傅友德打入雲南。喺洪武廿年（1387年），北元嘅納哈出唔至一次打過入遼東；朱元璋就封藍玉做右副將軍，封穎國公嘅傅友德做左副將軍。佢哋同征虜大將軍馮勝，一齊帶廿萬大軍向北行，納哈出因為打唔贏明軍，所以投降。
到洪武廿一年（1388年），朱元璋封藍玉做大將軍，帶住十五萬嘅兵馬，打入北元嘅後主脫古思帖木兒。佢同年喺捕魚兒海（今日嘅貝爾湖），堆冧咗北元嘅主力部隊，俘虜咗北元後主嘅二仔地保奴同北元嘅皇妃、公主等百幾人、總共七萬七千位男男女女；佢亦攞理北元嘅寶璽、符敕金牌、金銀印諸物，總共馬駝牛羊有十五萬幾。脫古思帖木兒唯有跑到去蒙古嘅舊首都和林，北元自此之後就冇哂料。有快遞傳到去應天府，朱元璋喺開心到跳之下，原本打算封佢做梁國公，後嚟因為聽到藍玉曾經逼姦過元朝嘅皇妃，所以就由「梁」改做「涼」，變咗做涼國公。朱元璋依然讚佢拍得住漢朝嘅衛青或者唐朝嘅李靖等等嘅大將軍。
喺洪武廿四年（1392年），元降將月魯帖木兒喺建昌 (今日嘅江西省南城縣) 造反，藍玉俘虜咗月魯帖木兒嘅阿爸，封咗做太子太傅。
但係，爵封國公嘅藍玉就因為自己有大功，開始自把自為，好多行為都犯咗明朝嘅律法。加上佢曾經喺皇帝面前損過人臣嘅禮儀，令朱元璋心中對藍玉開始覺得唔滿意。到洪武廿六年（1393年），因為藍玉私地下收埋咗日本嘅武士刀，畀錦衣衛蔣瓛告佢謀反。
佢做太子太傅嗰時，曾經預知燕王會謀反。