Алагалажәа

Аиндеиццәа – ари Америка инхо ажәларқәа рзеиҧш хьӡоуп. Аескимосцәеи алеутцәеи алаҳамҵозар, Аиндеиццәа рыхьӡ Европантә ирылаҵәеит. XV ашәышықәса анҵәамҭазы Христофор Колумб Индиа дшашьҭаз Америка дыӡхаҵит. Убри инаркны, Америка инхоз аиндеиццәа ҳәа рыхьӡхеит. Иахьазы, адунеиаҿы ҩfжәижәаба миллион инареиҳаны индиатәи араса иаҵанакуа ауааҧсыра нхоит. XIX ашәышықәсазы урҭ рхыҧхьаӡара ханҩажәа миллион иреиҳан. Индиатәи араса инықәырҧшны, шә-милаҭк рыла ишьақәгылоуп. XV ашәышықәсазы европаа Америка ианыӡхыҵыз, урҭ рхыҧхьаӡара ҩышә жәлары рҟынӡа инаӡон.

Аиндеицәа рҭоурых

Аҵарауаа ргәаанагарала, индиатәи ажәларқәа Америкаҟа иааит Аҩада-Мрагылара Азиантәи. Урҭ Америкаҟа ииасит Беринг аӡыбжьахала ала. Миллион шықәса раҧхьа, Беринг иӡыбжьахала зынӡагьы иҟаӡамызт. Беринг иӡыбжьахала аҭыҧан, хбарсҭа дгьылын, ахбарсҭа мҩала, Азиантәи Америкаҟа иааит ауаа. Ари ҟалеижьҭеи акрааҵуеит. Америка аҵакырадгьылқәа зегьы аиндеиццәа раланархара шәышықәсақәа рыла ицон. Алтаитәи арегион Аиндеиццәа рыҧсадгьыл ауп ҳәа ирыҧхьаӡоит.

Аиндеицәа рбызшәа

Аҩадатәи Америка инықәырҧшны, ҧшьышә инарзынаҧшуа еиуеиҧшым ахылҵшьҭрақәа рхаҭарнакцәа нхоит. Урҭ еиуеиҧшым абызшәақәа рыла ицәажәон.

Аиндеиццәа аҩыра рымаӡамызт. Азеижәтәи ашәышықәсазы, аиндеиццәа рхылҵышьҭрақәак иреиуаз аҧыза Секвоиа иаҧиҵеит аҩыра – чероки. Ҩышықәса рнаҩс, иара ибызшәала иҭижьуеит агазеҭ – Чероки Финикс. Хылҵышьҭрақәак еицәажәон адыргақәа рыла. Ихадаз адыргақәа аиндеиццәа шьапыла ианныҟәоз еимырдон, мамзаргьы еибадырны реиҭаҵраан дыргала еицәажәон. Лассы ласс аиндеиццәа реицәажәараан, еиуеиҧшымыз амаҭәарқәа рхы иадырхәон, иаҳҳәап асаркьа.

Аиндеицәа рынхарҭеи рынхамҩеи

Аиндеиццәа рынхарҭа ҭыҧқәа ҷыдоуп. Урҭ ақьалақәеи, ақәацәқәеи, аҳаҧқәеи рҿы инхон. Хылҵшьҭрақәак азеиҧш ҩнқәа рҿы инхон. Ус еиҧш иҟаз аҩнқәа – ахаҳә, анышәаҧшь, амҿы махәқәа, абыӷьқәа еиуеиҧшым амаҭәарқәа ирылырхуан, зны-зынла аӷәқәагьы рхы иадырхәон. Иара убас, аиндеиццәа рынхамҩаҿгьы аиҧшымзаарақәа рыман. Урҭ рынхамҩаҿы анырра дуӡӡа анаҭеит дара ахьынхоз рҭыҧ. Уи адагьы, урҭ рынхамҩа анырра дуӡӡа анаҭеит рытрадициақәа. Аиндеиццәа рзы зегь раасҭа ихадараз усын ашәарыцара. Иара убас, аиндеиццәа абна ирнаҭоз абеиара аизгара бзиа ирбон. Хылҵышьҭрақәак адгьыл иқәаарыхуан. Аиндеиццәа рыфатә хадақәа иреиуан аҧсыӡ. Аҧсыӡкра дара рзы ихадараз усын.

Европаа иреиуаз ауаа рааирала урҭ аҽқәа рхархәашьа рҵеит. Уи инаҷыдан, абџьар ахархәашьагьы рҵеит. Аиндеиццәа абизонқәеи, абнацәқәеи рышьҭашәарыцара еиҳа ирзымариахеит.

Аиндеиццәа рҿы ақыҭанхамҩа ибзианы аҿиара аман. Ақыҭанхамҩа еиҳа аҿиара аман Мексикеи Аладатәи Америкеи. Уаҟа аиндеиццәа еиуеиҧшым ақыҭанхамҩатә культурақәа аадрыхуан. Дара аҩнытә ҧсаатәқәеи аҧстәқәеи рацәаны ирыман.

Афатә аҳәса иҟарҵон. Еиҳа ахархәара змаз фатә хкын пемикан. Пемикан – ари афатә ихәыҷу, аха угәы зырҭәуа фатәхкуп. Уи абизон акәац рҩеи ауҭраҭых рҩеи ирылырхуеит.

Пемикан аныҟәаҩцәа лассы-ласс рхы иадырхәон. Аныҟәаҩцәа рзы уи аинтерес аҵан избанзар, рацәак аҭыҧ агаӡомызт, ихәыҷын насгьы, угәы арҭәуан, акыраамҭагьы иузхон.

Акерамика. (Анышәаԥшьӡы)

Аиндеицәа акерамика иалху амаҭәарқәа рыҟаҵара иалагеит европаа раҧхьагьы. Аҭыҧантәи акерамика еиуеиҧшымзаарала ирацәан. Еиуеиҧшымызт акерамика аҟаҵашьа аметодқәагьы. Аиндеицәа ирыздырӡомызт акыцлых аҟаҵаразы аусуга ахархәашьа. Убри аҟнытә акерамика напыла аус адырулон. Акерамика адагьы аиндеиццәа рхы иадырхәон анышәаҧшь. Аритуалқәа (ақьабзқәа) рымҩаҧгараан Анышәаҧшь иалхны асабрадақәеи рхы иадырхәоз еиуеиҧшым амаҭәарқәеи ҟарҵон.

Аҟазара

Ацентртә Америка Анд аҵакырадгьыл аҿы европаа ықәнагалаанӡа, аҟазареи акультуреи даара ибзиан аҿиара рыман. Мексика, Гватемала, Гондурас, Панама, Колумбиа, Перу, Боливиа, иара убас, егьырҭ атәылақәа рҿы ирыҧшааит ирацәаны ижәытәӡатәиқәаз амаҭәарқәа. Аиндеицәа ркультура даараӡа интересуп, ирацәаҩуп иаднаҧхьалогьы. Урҭ ркультура ианыҧшит ашәарыцацәа, аҧсыӡкцәа, адгьылақәарыхыҩцәа адунеи ишазхәыцуаз, ишырбоз. Урҭ рнапкымҭақәа ҧшӡаны иҟаҵоуп, ркультура амифтә хаҿсахьақәа анырра дуӡӡа арҭеит. Даараӡа иҧшӡоуп аиндеиццәа амҿлых аус радулашьа. Амҿлых аус здырулоз рхы иадырхәон аритуалтә ҵасқәа рымҩаҧгараан. Аиндеицәа зегьы ирылукаауан рҧашьеи рықәҵашьеи рыла. Дара иреиӷьыз асҩцәа иреиуан. Рнапкымҭақәа дырҧшӡон аҵысхә, ахаҳә, акерамикеи рыла. Аиндеицәа рҩымҭақәа рҿы лассы-ласс иаадырҧшуеит аибашьцәеи ашәарыцацәеи ирызкыу асценақәа.

Аха, рыцҳарас иҟалаз ЕАА, Канада, Аргентина уҳәа атәылақәа рҿы, аиндеиццәа ркультура гәыгәҭарыжьуа иалагеит. Аха, даҽаганкахьала Мексика, Гватемала, Перу, Боливиа атәылақәа рҿы жәлар рҟазара аиндеиццәа ркультура шьаҭас иаиуит.

Амифологиа

Аиндеи жәлар рзы анырра дуӡӡа ҟанаҵеит амифологиа. Амифологиа ианыҧшит амца аҟалашьеи, ауаҩи, аҧстәқәеи адунеи ишықәнагалаз. Ԥыҭк ихьшәаны ицәырҵит Каиман изкыз амиф. Каиман афатә данцәахәын, иара убас, аҵиаақәа дрыҧсыцқьан. Даара ибеиоуп аиндеиццәа рмифологиа адунеи шашьас иаиуз атәы зҳәо.

Аиндеиццәа дрыман даараӡа иҧшӡаз анцәахәы Маиса. Маис – аиндеиццәа рҿы даара ибзианы ирдыруа ҵиаауп. Амиф ишаҳәо ала, анцәахәы Маиса аҵиаақәа дырхылаҧшуеит. Лара даараӡа дыҧшӡан, лыхцәқәа дуун. Индиатәи ахылҵышьҭрақәа зегьы рзы, ари анцәахәы амч ду лыман. Ахцәду змаз анцәахәы адгьыли, ажәҩани, Аҧсҭазаареи аҧсреи дырсимволын. Ашаманцәа адырра дуқәа рыман. Аиндеиццәа ргәаанагарала, ачымазцәа рыхәшәтәреи, аҧсабара амчқәа рхархәареи, аҧстәқәеи аҧсымчқәеи рацәажәара урҭ рнапаҵаҟа иҟоуп ҳәа иршьон. Ашаманцәа ирыдҳәалоу алегьендақәа рацәоуп, иахьа урҭ даара ирылаҵәаны иҟоуп.

Аиндеицәеи ацивилизациақәа рыҿиареи

Аиндеицәа иаадрыхуаз афатәқәа адунеизегь аҿы анырра дуӡӡа ҟарҵеит. Афатәқәа – аҧш, акартош апомидор, азараҟьа, аҭаҭын, акакао, апырпыл, аҟәыд, адгьылраса, уҳәа убас иҵегь, аиндеиццәа ирыдҳәалоуп. Европа акартош рыларҵәара амлакра армаҷит. Аҧш рхы иадырхәоит ауаа рыфатә еиҧш, арахә акрырҿаҵараҿгьы. Аиндеицәа рҟынтәи ирҵеит аҩнытә ҧстәқәеи аҧсаатәқәеи рхархәашьа. Ҿырҧшыс иаагозар, аиндеиццәа рыҟны ашәишәи даара ахархәара аман. Аиндеицәа ауаса хкқәак иҩнытәны иҟарҵеит. Урҭ ирықәырхуаз аласа ахархәара бзианы иаман. Ирацәоуп иахьа алақәа рыжәла, Индиатәи абналақәа иҩнытәхаз иреиуоу зышьҭамҭа Америка иҟоу.

Ашьҭахьажәа

Иҟалап, шәара ижәбахьазар аиндеиццәа рфырхацәақәа ирызку акинофильмқәа. Иҟалап шәаҧхьахьазар Маин Риди, Џьеимс Фенимор Купери аиндеиццәа ирызкыу рроманқәа. Арҭ акинофильмқәеи, ашәҟәқәеи рыла аиндеиццәа рҭоурых рмифологиа, ркультура зегьы ирдыруа иҟалеит. Уи џьашьатәӡам. Избанзар, индиатәи ажәларқәа иҷыдоу жәларуп.