Ilesia Católica

Ilesia Católica
confesión cristiana (es) , ilesia histórica y Ilesia
Llocalización
Sede	Ciudá del Vaticanu
Direición	Ciudá del Vaticanu
Historia
Símbolo niceno (es) [[File:Noun Project label icon 1116097 cc mirror.svg
Fundador	Xesús
Organigrama
Presidente	Franciscu (13 marzu 2013)
Participación empresarial
Propietariu de	ver Catedral del Sagrado Corazón (es) Catedral de Mechelen Catedral de Santa María de Tokio (es) Maria Rosenkranzkönigin (en) Bosque de clima Vaticano (es) Sarja Church (en) Cross of Justin II (en) Gleeson College (en) Thomas More College (en) Bishop Saint and Saint Francis of Assisi (en) Catedral de Amberes (es) Palacio Apostólico Vaticano (es) St. Roch in Glory (en) Marienaltar (en) San Bernardino de Siena predicando ante Alfonso V de Aragón (es) Pala Pesaro (es) El sermón y las obras del Anticristo (es) San Mateo y el ángel (es)
Forma parte de	ver Association of Christian Churches in Germany (en)
Formáu por	Ilesia católica llatina Ilesia católica caldea Ilesia católica copta Ilesia católica siria Ilesia católica maronita Iglesia greco-católica melquita (es) Iglesia católica siro-malabar (es) Iglesia católica siro-malankar (es) Iglesia greco-católica rumana (es) Iglesia greco-católica ucraniana (es) Iglesia católica bizantina rutena (es) Ilesia católica etíope Iglesia greco-católica eslovaca (es) Iglesia católica eritrea Iglesia greco-católica húngara (es) Iglesia católica bizantina búlgara (es) Iglesia católica bizantina griega (es) Iglesia católica bizantina en Italia (es) Iglesia greco-católica de Croacia y Serbia (es) Iglesia greco-católica macedonia (es) Iglesia católica bizantina albanesa (es) Iglesia católica bizantina rusa (es) Iglesia greco-católica bielorrusa (es) Ilesia católica armenia laico católico (es) clérigo católico (es) teología católica (es)
Bolsa de valores	catolicismu
Varios
Premios	(2010)  'Verschlossene Auster' award (en)
Web oficial

La Ilesia Católica, tamién conocida como Ilesia Católica Romana, ye la mayor de les ilesies cristianes, con más de 1.270 millones de fieles bautizaos en tol mundu. Ye la más antigua de les instituciones internacionales de funcionamientu ininterrumpíu, y como talo tien xugao un papel destacáu na historia y el desarrollu de la civilización occidental. La Ilesia ta formada por cuasi 3.500 diócesis, tamién llamaes ilesies locales, espardíes per tol mundu y gobernada, caúna, por un obispu. El Papa, Vicariu de Cristu y socesor del apóstol San Pedru, ye l'obispu de Roma, el cabezaleru de tola Ilesia Católica, depositariu del ministeriu universal de Pedru y responsable de la xunidá y la corrección doctrinal de les enseñances de la Ilesia. El gobiernu de la organización ta centralizáu na Santa Sede, allugada na pequeña nación independiente de Ciudá del Vaticanu, asitiada metanes Roma, y de la que'l papa ye'l so xefe d'estáu.

Les creyencies cristianes del catolicismu fúndense no recoyío nel Credu de Nicea. La Ilesia Católica enseña que hai namái una ilesia, santa, católica ya apostólica, fundada por Xesucristu na Gran Comisión; y que los sos obispos son los sucesores de los apóstoles de Cristu y el papa, el primeru d'ente ellos, ye'l socesor de San Pedru, a quien Cristu-y dio la primacía sobro los demás apóstoles. Caltién que mantiene les práctiques de la fe cristiana orixinal, qu'esta-y foi tresmitida pola tradición sagrada y que ye, pola mor de la guía del Espíritu Santu, infalible. Pese a la so xunidá coesisten nella bayura de tendencies teolóxiques ya espirituales, espeyaes na esistencia d'una Ilesia Llatina (tamién nomada Ilesia d'Occidente o Ilesia Católica Romana), 23 Ilesies católiques orientales y cientos d'instituciones monástiques, delles mendicantes, delles de clausura y delles terciaries.

De los sos siete sacramentos el principal d'ellos ye la Eucaristía, que se celebra llitúrxicamente na misa. La Ilesia enseña que, al traviés de la consagración por un sacerdote, el pan y el vinu del sacrificiu eucarísticu conviértense nel cuerpu y la sangre de Xesucristu: ye la doctrina de la transubstanciación. La Virxe María ye venerada nesta ilesia como Ma de Dios y Reina de los Cielos, y la so imaxe ye oxetu de veneración en milenta imáxenes espardíes per santuarios marianos de tol mundu. Les sos enseñances inclúin la creyencia na misericordia divina, na santificación al traviés de la fe y l'espardimientu del Evanxeliu, y tamién la doctrina social de la Ilesia, que pon l'enfotu na axuda voluntaria a los enfermos, los probes y los aflixíos al traviés de les obres de misericordia corporales ya espirituales. La Ilesia Católica ye'l mayor proveedor non gubernamental d'educación y sanidá del mundu.

El so pensamientu dirixó primeru ya influyó dempués la filosofía, la cultura, l'arte y la ciencia occidental. Anguaño, los sos fieles estiéndense per tol mundu, y de magar el sieglu XX la mayoría vive nel hemisferiu sur como resultáu, d'una banda, de la progresiva secularización d'Europa, y d'otra de la persecución que sufren los cristianos nel Oriente Mediu. La Ilesia Católica yera una cola Ilesia Ortodoxa hasta'l Cisma d'Oriente de 1054, resultáu de diferencies insalvables ente les dos ilesies sobre la cuestión de l'autoridá del papa sobro los demás obispos. Hasta'l conceyu d'Éfesu de 431 la Ilesia del Oriente almitía la idea de la primacía papal, y tamién les Ilesies ortodoxes orientales hasta'l conceyu de Calcedonia de 451: le estremadura ente toes elles foi resultáu de diferencies teolóxiques, non organizatives. Al cisma d'Oriente siguiolu, nel sieglu XVI, la Reforma protestante, que supunxo la rotura de parte de los obispos, sacerdotes y fieles cola Ilesia y dio llugar al nacimientu ya espoxigue del protestantismu. Dende finales del sieglu XX la Ilesia ye percriticada poles sos enseñances sobre la sexualidá, pola so negativa a ordenar sacerdotises muyeres y pol so manexu de los casos d'abusu sexual nos que participaran sacerdotes.

La Ilesia dirixe miles d'ilesies, hospitales y orfanatos alredor del mundu, y ye, amás del mayor proveedor non gubernamental d'educación y asistencia sanitaria nel mundu, responsable de bien d'actividaes humanitaries n'estayes perdiferentes: infancia, refuxaos, probes... Foi, por últimu, responsable de la fundación de la mayoría de les primeres universidaes que se crearon, y sigue siendo anguaño un importante proveedor d'educación superior.

Nome

San Ignaciu d'Antioquía ye l'autor de la primer referencia escrita na qu'apaez la espresión «católica» pa referise a los siguidores de Xesús (Ignaciu, el portador de Dios, cuadru de Ioann Apakass, sieglu XVII, conserváu nel muséu Pushkin de Moscú).

L'usu más antiguu conserváu del términu católica (del griegu καθολικός, romanizáu katholikos), que significa lliteralmente universal, pa referise a la Ilesia ye del añu 110: apaez na Carta d'Ignaciu a los Esmirneanos, escrita por san Ignaciu d'Antioquía, el mesmu autor del que se sepa qu'usó, alredor del añu 100, el términu Cristiandá (en griegu Χριστιανισμός) pa referise a los discípulos de Xesús. Nes Llectures Catequétiques, escrites alredor del 350 por san Cirilu de Xerusalén, el nome Ilesia Católica entamó a usase pa estremar a esti grupu d'otros grupos relixosos que tamién se nomaben «la ilesia» a ellos mesmos. La noción católica, d'universalidá, foi afitada en 380 nel edictu De fide Catolica, promulgáu por Teodosio I, el caberu emperador en gobernar al tiempu les metaes occidental ya oriental del Imperiu romanu, cuando estableció a esta ilesia como relixón oficial del imperiu.

De magar el cisma d'Oriente de 1054 la Ilesia d'Oriente adoptó pa sigo'l axetivu ortodoxa como'l so epítetu distintivu, magar que'l so nome oficial sigue siendo Ilesia Ortodoxa Católica, y la Ilesia Occidental que vive en comunión cola Santa Sede tomó católica como'l so epítetu distintivu, y conservolo tres de la Reforma Protestante de finales del sieglu XVI. El términu católica romana aparez ocasionalmente en documentos tanto de la Santa Sede, especialmente cuando se dirixe a determinaes conferencies episcopales nacionales, como de delles diócesis.

El nome Ilesia Católica, aplicáu al conxuntu d'esta ilesia, ta oficializáu neto nel Catecismu de la Ilesia Católica (1990) que nel Códigu de Derechu Canónicu (1983). Y foi utilizáu nos documentos del Conceyu de Trento (1545–1563), del Conceyu Vaticanu I (1869–1870) y el Conceyu Vaticanu II (1962–1965), amás de milenta otros documentos oficiales.

Organización

La Ilesia Católica sigue, na so organización de gobiernu, un sistema episcopal, lideráu por obispos, persones ordenaes, esto ye, que recibieron el sacramentu del orde sacerdotal, a les que se-yos da una xurisdicción formal de gobiernu, xeneralmente territorial, dientro la ilesia. Hai trés niveles dientro'l cleru: l'episcopáu, compuestu por obispos con xurisdicción sobro un área xeográfica nomada diócesis o eparquía; el presbiteriáu, formáu por sacerdotes ordenaos polos obispos y que trabayen dientro les diócesis llocales o n'órdenes relixoses; y el diaconáu, compuestu por diáconos qu'axuden a obispos y sacerdotes n'estremaes funciones del so ministeriu. El cabezaleru de la Ilesia ye l'obispu de Roma, el papa, que la so xurisdicción ye nomada Santa Sede. Parallelamente a la estructura diocesana hai bayura d'instituciones relixoses que funcionen autónomamente, dalgunes embaxu la xurisdicción del so obispu llocal pero les más de les veces suxetes namái a l'autoridá del papa. La mayoría d'estes instituciones son namái d'homes o de muyeres, pero hai dalgunes nes que conviven persones de los dos sexos. Arriendes de les persones ordenaes hai seglares, persones non ordenaes, qu'axuden en diferentes funciones llitúrxiques demientres el cultu.

Santa Sede, papáu, Curia Romana y Colexu Cardenaliciu

«Darete les llaves del Reinu de los cielos. Lo qu'arreyes na tierra, arreyaráse en cielu, lo que desarreyes na tierra, desarreyarase en cielu», díxo-y Xesús a Pedru nel evanxeliu de San Matéu (16:1919). Les dos llaves cruciaes, una dorada ya otra platiada, del escudu de la Santa Sede simbolicen les llaves de Simón Pedro y representen el poder del papáu pa facer y desfacer. La tiara papal, con trés corones, simboliza'l triple poder del papa como «pa de los reis», »gobernador del mundu» y «vicariu de Cristu». La cruz dorada asitiada sobre la bola del mundu que corona la tiara simboliza la soberanía de Xesucristu.

El cumal de la xerarquía de la Ilesia Católica ocúpalu l'obispu de Roma, que recibe'l nome de papa (del llatin papa, pa). L'actual, de nome Franciscu, ye'l 266ᵘ papa, y foi escoyíu nún cónclave papal el 13 de marzu de 2013.

El oficiu del papa ye'l papáu. La Ilesia Católica considera que Cristu instituyó'l papáu al dá-y les llaves del cielu a san Pedru. La xurisdicción eclesiástica papal ye nomada Santa Sede (Sancta Sedes en llatín) o Sede Apostólica (esto ye, la sede del apóstol Pedru). Al serviciu directu del papa ta la Curia Romana, el cuerpu de gobiernu central de la Ilesia, que trabaya nos asuntos cotidianos rellacionaos cola so organización.

El papa ye, tamién, soberanu de la Ciudá del Vaticanu, un enclave dientru de Roma que ye una entidá xurídicamente distinta de la Santa Sede. Ye na so condición de cabezaleru de la Santa Sede, y non como soberanu de la Ciudá del Vaticanu, como'l papa recibe embaxadores d'otros estaos a los qu'unvia tamién los sos propios representantes diplomáticos. La Santa Sede tamién concede órdenes, condecoraciones y medalles; un exemplu d'elles son les órdenes de caballería que surdieron na Edá Media.

La basílica de San Pedru, el templu más famosu de Roma, asítiase nel llugar nel que la tradición considera que ta la tumba de Pedru, pero esta nun ye la catedral del papa. La so catedral como obispu de la diócesis de Roma ye l'archibasílica de San Xuan de Laterano. Esta asítiase na ciudá de Roma, en territoriu italianu, magar que tien privilexos d'extraterritorialidá qu'esti país-y concedió a la Santa Sede.

La dignidá de cardenal ye un rangu honoríficu concedíu polos papes a determinaos clérigos, que pueden ser miembros de la Curia Romana, obispos de grandes ciudaes del mundu o teólogos importantes. El papa puede acudir en busca de conseyu y d'axuda pal gobiernu de la Ilesia al Colexu Cardenaliciu, formáu por tolos cardenales del mundu. Esti colexu ye'l que, cuando un papa muerre o abdica, aconceya pa elixir un nuevu papa. Tolos cardenales menores de 80 años formen, nesa circunstancia, un colexu electoral qu'aconceya de siguío hasta nombrar un nuevu papa. Magar qu'esti conceyu, nomáu cónclave papal, puede escoyer a cualesquier católicu de sexu masculín como papa dende 1389 tolos papes foran primero cardenales.

Códigu de Derechu Canónicu

El Códigu de Derechu Canónicu (en llatín jus canonicum) ye'l sistema de lleis y principios llegales ellaboraos y fechos cumplir poles autoridaes xerárquiques de la Ilesia Católica pa regular la so organización y gobiernu y pa dirixir les actividaes de los católicos na so xera de desendolcar la misión de la ilesia. El sistema de lleis de la Ilesia Llatina foi'l primer sistema llegal del mundu occidental y ye'l más antiguu con un funcionamientu ininterrumpíu nel mundu; les 23 ilesies católiques orientales, pela so banda, gobiérnense acordies a les ordenances propies del canon llexislativu oriental, que recueye y adapta les lleis antigües que rixeron de siempres estes ilesies

Les lleis eclesiástiques positives, basaes directa o indirectamente na presuposición de la esistencia d'una llei divina inmutable, la llei natural, deriven so autoridá formal, no que cinca a les lleis qu'afecten al conxuntu de la Ilesia, del papa: esti ye'l supremu llexislador (el Supremu Pontífiz), qu'axunta na so persona la totalidá de los poderes llexislativu, executivu y xudicial. Les lleis más específicas, o non xenerales, deriven la so autoridá formal de la promulgación fecha por un llexislador de rangu inferior al supremu llexislador, seya ordinariu o delegáu por elli. Los cánones o lleis d'esti códigu nun afecten namái a cuestiones de naturaleza moral o doctrinal, sinón a toes aquelles propies de la condición humana. Esti códigu organízase con tolos elementos habituales d'un sistema llegal maduru: lleis, xulgaos, abogaos, xueces, un códigu llegal completu y perfectamente articuláu pa la Ilesia Llatina y otru pa les ilesies católiques orientales, directrices pa la interpretación de les lleis y castigos.

El Códigu de Derechu Canónicu regula la vida y la organización de la vida de la Ilesia Católica, y ye independiente de la llei civil de cada estáu. Nos asuntos nos que ye competente namái almite la preeminencia de la llei civil en cuestiones específiques como la tutela de menores; la llei civil, pela so banda, consiente la preeminencia del derechu canónicu en materies específiques como'l matrimoniu canónicu. Los testos anguaño en vigor (2020) son el Códigu de Derechu Canónicu (Codex Iuris Canonici) de 1983, na Ilesia Llatina, y el Códigu de los Cánones de les Ilesies Orientales (Codex Canonum Ecclesiarum Orientalium) de 1990, nes ilesies orientales.

Ilesia Llatina ya ilesies orientales

Fachada de l'archibasílica de San Xuan de Laterano, la catedral del papa na so condición d'obispu de la diócesis de Roma.

Nos primeros años de la historia del catolicismu desarrolláronse, neto na fastera occidental d'Europa que na oriental, diverses modalidaes de cristianismu. La mayoría de les de tradición oriental nun tán, de magar el Gran Cisma de 1054, en comunión cola Ilesia Católica, pero hai delles ilesies particulares autónomes que sí: toes elles son ilesies sui iuris, esto ye, ilesies independientes y de propiu derechu, autónomes pa decidir el futuru de so. La Ilesia católica, anguaño, confórmenla la Ilesia Llatina, la única que sobrevivió de les de tradición occidental, con más de 1.000 millones de fieles, y 23 ilesies autónomes de tradición oriental, les Ilesies Católiques Orientales, que tienen una feligresía conxunta de 17,8 millones de fieles (2017).

La Ilesia Llatina ye gobernada pol papa y polos obispos diocesanos nombraos directamente por elli. El papa exerz el papel de patriarca na Ilesia Llatina, que representa la forma orixinal de la Cristiandá occidental, aquella practicada na fastera occidental del Imperiu romanu, heriede de creyencies y vezos orixinaos n'Europa y el noroeste d'África nos primeros sieglos de la historia de la Cristiandá y qu'anguaño son compartíos parcialmente por otres ilesies non católiques que los oríxenes de so remóntense al tueru protestante. Les ilesies católiques orientales, pela so banda, siguen les tradiciones y la espiritualidá propies de la Cristiandá oriental, magar que tienen caltenío siempre la so obediencia al papa o decidieron volver a ella nos sieglos que siguieron al Gran Cisma. Estes ilesies son comunidaes de cristianos católicos con vezos llitúrxicos y espirituales que nun espeyen diferencies doctrinales cola Ilesia Llatina, sinón que son reflexu de distintes influencies históriques y culturales.

El Códigu de los Cánones de les Ilesies Orientales define una ilesia sui iuris (independiente y de plenu derechu) como un grupu de fieles cristianos que comparten una xerarquía sacerdotal que tien el reconocimientu del papa como suprema autoridá en cuestiones de doctrina dientru d'esa ilesia. Esta definición ye una innovación recoyida nel Códigu citáu pa facer notar la relativa autonomía d'estes ilesies, que tán en comunión completa col papa, esto ye, reconocen la so supremacía, pero tienen estructures de gobiernu ya tradiciones llitúrxiques estremaes de les de la Ilesia Llatina. El términu ilesia sui iuris nun apaez como talo recoyíu nel Códigu de Derechu Canónicu pa denomar a la Ilesia Llatina, pero hai un reconocimientu tácitu d'esa equivalencia.

Delles ilesies católiques orientales tán dirixíes por un patriarca, elixíu pol sínodu de los obispos d'esa ilesia; otres tán mandaes por un arzobispu principal, otres por un obispu metropolitanu y otres organícense como eparquíes individuales. Caúna de les ilesies ye autónoma pa decidir sobro la so propia organización, los sos ritos llitúrxicos, el so calendariu llitúrxicu y dellos otros aspectos, y ta suxeta namái a la obediencia, en cuestiones de doctrina, a l'autoridá del papa. La Curia Romana tien un departamentu específicu, la Congregación pa les Ilesies Orientales, encargáu de les rellaciones con eses ilesies. El papa, en xeneral, nun intervién nel nomamientu d'obispos o sacerdotes de les ilesies católiques orientales, sinón que delega nes estructures de gobiernu d'elles, pero podría facelo si lo considerara necesariu o comeniente.

Diócesis, parroquies, organizaciones ya institutos

Mapa de les subdivisiones territoriales (provincies eclesiástiques y archidiócesis) nes que s'organiza la Ilesia Católica.

Los distintos países, rexones o grandes ciudaes organícense n'ilesies particulares, nomaes diócesis na Ilesia Llatina y eparquíes nes ilesies católiques orientales, dirixíes caúna por un obispu. Delles diócesis formen una provincia eclesiástica: l'obispu d'una d'elles, la diócesis metropolitana, recibe'l nome d'arzobispu o obispu metropolitanu, y ye'l cabezaleru de los demás obispos de la provincia. Los obispos d'un país concretu formen parte d'un conceyu nomáu conferencia episcopal nacional, sodividida en conferencies episcopales rexonales en dellos países. En 2014 la Ilesia Católica tenía un total de 2.998 diócesis.

Cada diócesis sodivídese en parroquies, atendíes caúna por ún o más sacerdotes, diáconos o llaicos con funciones pastorales. Les parroquies son les responsables del cultu regular de los sacramentos y de l'atención pastoral de los fieles del so territoriu. En 2016 había 221.700 parroquies católiques nel mundu.

Na Ilesia Llatina los homes pueden ser, tres de recibir la ordenación sacramental, diáconos o sacerdotes. Homes y muyeres pueden ser ministros llaicos, facultaos pa distribuyir la Comunión, y tamién llectores nos oficios sagraos y molacinos. Históricamente namái homes y neños podíen exercer la función de molacín, pero de magar la década de 1990 permitióse-yos tamién a muyeres y neñas exercer esta función.

Los católicos que recibieron l'orde sacerdotal, y tamién llaicos, pueden dedicase a la vida consagrada, de forma individual como freru o virxe consagrada, o formando parte d'un institutu, relixosu o secular, de vida consagrada, nos que toma unos votos que confirmen el so deseyu de siguir los trés preceutos evanxélicos de castidá, probeza ya obediencia. Exemplos d'institutos de vida consagrada son los benedictinos, los carmelites, los dominicos, los franciscanos, les misioneres de la caridá, los lexonarios de Cristu o les hermanes de la misericordia. El términu «institutu relixosu» ye un términu modernu qu'abarca los antiguos de «órdenes relixoses» y «congregaciones relixoses», qu'antaño teníen un estatus estremáu nos códigos de derechu canónicu. Anguaño los téminos «orde relixosa» y «institutu relixosu» intercámbiense, nel usu coloquial, pa facer referencia a una mesma realidá.

Miembros de la Ilesia Católica

Númberu de católicos por país (2011).

El catolicismu ye la segunda confesión relixosa con mayor númberu de fieles nel mundu, namái per detrás del sunismu, rama mayoritaria del Islam. L'estatus de miembru de la ilesia católica, definíu pol bautismu, compártíenlu, al final de 2018, 1.329 millones de persones, esto ye, el 18% de la población mundial. No que cinca al pesu d'esta confesión dientro de les ilesies cristianes, cuasi la metá de los cristianos del mundu son católicos. La so distribución pel mundu sigue, nes caberes décades, un patrón de descensu de católicos n'Europa y ascensu del so númberu nos continentes del hemisferiu sur. Asina, actualmente viven n'Europa el 21,5% de los católicos, el 17,8% n'África, el 11,1% n'Asia, el 48,3% n'América y el 0,9% n'Oceanía.

Hai diferentes tipos de ministros católicos: clérigos ordenaos (sacerdotes), llaicos con funciones ministeriales, misioneros y catequistes. A finales de 2014 había nel mundu 465.595 clérigos ordenaos, de los que 5.237 yeren obispos, 415.792 sacerdotes (diocesanos, los cures, o relixosos, los flaires) y 44.566 diáconos permanentes. Ente los ministros non ordenaos había 3.157.568 catequistes, 347.679 misioneros llaicos y 39.951 llaicos con funciones ministeriales. Esi mesmu añu, los católicos comprometíos cola vida relixosa o consagrada en comunidá yeren 54.559 homes y 705.529 muyeres. Estes persones nun recibieron el sacramentu del orde, y xeneralmente nun se-yos considera ministros a nun ser que pertenezcan a dalguna de les categoríes ministeriales anteriormente nomaes.

Doctrina

La doctrina católica tien desarrolláose al traviés de los sieglos, definiéndose a partir de les enseñances directes de los primeros cristianos, de les definiciones, conseñaes nos documentos de los conceyos ecuménicos y nes bules papales, de lo que son les creyencies católiques ortodoxes, y del debate teolóxicu. La ilesia percree que ye continuamente guiada pol Espíritu Santu cuando discute cuestiones teolóxiques, y que ye, gracies a la so proteición, infalible no que cinca a cuestiones doctrinales.

La Ilesia cree que la revelación tien una fonte única, Dios, que la tresmite de dos formes, al traviés de les Sagraes Escritures y al traviés de la Tradición Apostólica, que son infaliblemente interpretaes pol maxisteriu de la Ilesia. Les Sagraes Escritures, la biblia católica, son un conxuntu de 73 llibros, 46 del Vieyu Testamentu y 27 del Nuevu Testamentu, directamente inspiraos por Dios a los sos autores. La Tradición Apostólica ye'l conxuntu d'enseñances y creyencies presentes na Ilesia de magar el tiempu de los apóstoles. Sagraes Escritures y Tradición Apostólica reciben el nome conxuntu de depósitu de la fe (depositum fidei en llatín), y son interpretaes pol maxisteriu de la Ilesia, l'autoridá interpretadora de la divinidá qu'exercen el papa y el colexu episcopal. El resultáu de los sos trabayos interpretativos ye'l Catecismu de la Ilesia Católica, qu'afita les creyencies de la Ilesia y ye espublizáu pola Santa Sede.

La naturaleza de Dios

Representación, nún diagrama cenciellu, del conocíu como Escudu de la Trinidá (Scutum Fidei), símbolu que desplica el calter unitariu y trinitariu de la divinidá cristiana. Esti emblema considerábase, a finales de la Edá Media, el escudu d'armes de Dios.

La Ilesia Católica afirma qu'hai un únicu y eternu Dios, que esiste como pericóresis, como un ser únicu con una única sustancia y esencia, una mesma naturaleza divina, formada por trés hipóstasis o persones: el Padre, el Fíu ya l'Espíritu Santu, que conformen conxuntamente la Santísima Trinidá.

Los católicos creen que Xesucristu ye la «Segunda Persona» de la Trinidá, Dios Fíu. Dios, al traviés del poder del Espíritu Santu, y en un actu conocíu como Encarnación, xuntó la so naturaleza divina cola humana al traviés de la concepción de Cristu nel vientre de la Virxe María. Cristu, poro, ye completamente divín y completamente humanu, al puntu de tener inclusive alma humana. La Ilesia enseña que la misión de Cristu na tierra incluyía la prédica de les sos enseñances y l'exemplu prácticu d'elles pa que los sos siguidores, al traviés del rellatu de les sos andances fechu nos cuatro evanxelios, pudieran tener cuenta d'elles y aplicales. Xesús, creyen los católicos, tuvo llibre de pecáu demientres tuvo vivu, y permitió ser inxustamente crucificáu como un sacrificiu de so pa llograr la reconciliación, conocida como Misteriu Pascual, de la humanidá con Dios. Neto la pallabra griega «Cristu» que la pallabra hebrea «Mesíes» signifiquen l'unxíu, faciendo referencia a la creyencia cristiana de que la muerte y resurrección de Xesús representen el cumplimientu de les profecíes mesiániques del Vieyu Testamentu.

La Ilesia Católica enseña dogmáticamente que «l'Espíritu Santu procede eternamente del Padre ya'l Fíu, non como dos principios separtaos sinón como un solu principiu». Y tamién que'l Padre, como «el principiu ensin principiu», ye'l orixe del Espíritu Santu, pero tamién que Elli, como Padre del únicu Fíu, ye col Fíu el principiu únicu del que procede l'Espíritu Santu. Esta creyencia esprésase na conocida como cláusula Filioque, añadida a la versión llatina del credu de Nicea de 381 pero non incluyida nes versiones en griegu d'esi credu, que foron les usaes na Cristiandá oriental.

La naturaleza de la Ilesia

La Ilesia Católica defínese como «la única ilesia verdadera», «el sacramentu universal de salvación pa la raza humana» y «la única relixón verdadera». Acordies col Catecismu, la Ilesia Católica ye descrita nel credu de Nicea como «una, santa, católica y apostólica»: estos cuatro atributos conócense en conxuntu col nome de Notes de la Ilesia. Esta considera que'l so fundador ye Xesús: el Nuevu Testamentu recueye dellos eventos consideraos inicios del so deseyu d'establecer una ilesia, como les sos actividaes proselitistes y enseñances y el so unviu de los apóstoles como testigos del so ministeriu, sufrimientu y resurrección. Na Gran Comisión, tres de resucitar, instruyó a los apóstoles pa que continuaran col so llabor. La venida del Espíritu Santu sobro los apóstoles, nel acontecimientu conocíu como Cincuesma, ye interpretada como l'entamu del ministeriu públicu de la Ilesia Católica. Esta afirma que tolos obispos consagraos formen parte d'una llinia de sucesión ininterrumpida colos apóstoles de Cristu, la llamada socesión apostólica. En particular, l'obispu de Roma ye consideráu'l socesor del apóstol Simón Pedru, y d'esi fechu derívase la so supremacía sobre'l restu la Ilesia.

El dogma católicu establez que la Ilesia representa «la presencia continuada de Xesús na tierra», y que ella y naide namái qu'ella tien los medios completos pa la salvación. Al traviés de la pasión (sufrimientu) de Cristu, que finó na so crucifixión según lo recoyío nos evanxelios, Cristu fizo una ofrenda de so a Dios Padre pa reconciliar a la humanidá con Dios. La resurrección de Xesús convirtiólu en «el primer nacíu d'ente los muertos», el primeru ente munchos hermanos: aquellos que se reconcilien con Dios y sigan los mandatos de Cristu han poder entrar nel reinu de Dios. La Ilesia ve la so lliturxa y sacramentos como una forma de perpetuar les gracies algamaes al traviés del sacrificiu de Cristu pa fortalecer la rellación del creyente con Cristu y como axuda pa vencer al pecáu.

El Xuiciu Final

La Ilesia Católica enseña que, inmediatamente dempués de la so muerte, l'alma de cada persona ha ser sometida a un xuiciu particular por Dios no que cinca a los sos pecaos y la so rellación con Cristu. Habrá, amás, otru día, el del Xuiciu Final, nel que Cristu sentarase pa facer un xuiciu universal de tola humanidá. Esti Xuiciu Final, acordies cola doctrina católica, ha poner fin a la historia humana y va señalar l'aniciu d'unos nuevos cielu y tierra meyores dirixíes rectamente por Dios.

Según la sentencia dictada nel so xuiciu particular créese que l'alma entra nún de los trés estaos posibles de vida de dempués de la muerte:

• El Cielu ye un estáu de xunión permanente y definitiva cola naturaleza divina de Dios; una xunión que nun ye ontolóxica, sinón una xunión pola gracia. Ye una vida eterna, na que l'alma contempla a Dios nún estáu infinitu de visión beatífica.
• El purgatoriu ye un estáu transitoriu nel que les almes destinaes al cielu pero qu'entá nun se desprendieran completamente del pecáu y, poro, nun pueden acceder a elli inmediatamente, purifíquense. Nel purgatoriu l'alma sufre, purga los sos pecaos y perfecciónase. Les almes del purgatoriu pueden ver amenorgáu'l so penar poles oraciones de los devotos na tierra y pola intercesión de los santos.
• La condenación eterna. Aquellos qu'anecien en vivir n'estáu de pecáu mortal y nun s'arrepienten primero de morir condénense al Infiernu, a la separtación definitiva de Dios . La Ilesia enseña que naide ye condenáu al Infiernu sin tener decidíu llibremente rechazar a Dios . Naide ta predestináu al Infiernu, y naide puede determinar con certeza absoluta quién tien sío condenáu al Infiernu. El catolicismu enseña que, pola gracia de Dios, cualesquier persona puede arrepentise de los sos pecaos en cualesquier momentu enantes de la muerte y, al ser consciente de la verdá de la fe católica, algama la so salvación. Dellos teólogos católicos tienen especulao que les almes de los neños que muerren ensin bautizar y los non cristianos que nun tán en pecáu mortal pero caltienen, por nun tar bautizaos, el pecáu orixinal, van al morrer a un llugar nomáu el limbu. Sicasí, la so esistencia nun ye un dogma oficial de la Ilesia Católica.

Magar que la Ilesia Católica enseña que namái ella ye'l camín pa la salvación, reconoz tamién que l'Espíritu Santu puede manifestase notres comunidaes cristianes pa «impulsales hacia la xunidá católica» y pa «animales y dirixiles hacia la confluyencia cola Ilesia Católica» y, poro, puede llevar a los sos fieles a la salvación, porque eses comunidaes cristianes separtaes d'ella contienen elementos de la doctrina verdadera, magar que tean amestaos con creyencies falses. Enseña, tamién, que tolos que se salven sálvense al traviés de la Ilesia Católica, pero que hai otres formes extraordinaries d'algamar la salvación: el bautismu de deséu, persones que quieren el bautismu primero de morrer pero nun tienen tiempu o oportunidá de recibilu; el martiriu prebaptismal o bautismu de sangre, persones que muerren pola so fe inclusive anque nun tean bautizaes; y la inorancia insuperable, persones que nun tuvieron la oportunidá de conocer la fe católica pero tuvieron un comportamientu en vida que los fai dignos de la salvación, que sicasí nun ye automática namái por ser inorante de la fe católica.

Santos y devociones

L'Ángelus, de Jean-François Millet (1857-59, Muséu d'Orsay). El rezu del Ánxelus remóntase al sieglu XIV, y ye una de les devociones populares que forma parte de les «práutiques piadoses adecuaes» almitíes pola Ilesia Católica.

Un santu ye una persona a la que se-y reconoz haber tenío un gráu excepcional de cercanía con Dios. Nómase canonización al actu pol que una ilesia cristiana declara qu'una persona que yá morriera yera un santu; tres d'esa declaración la persona ye incluyida nel canon, o llista, de santos reconocíos. Les primeres persones honraes como santes foron los mártires: les lleendes piadoses sobro la so muerte foron consideraes prebes de la fuercia de la so fe en Cristu. A partir del sieglu IV entamó la veneración pública de los nomaos confesores, persones que demostraran la so fe non morriendo por ella sinón al traviés de la so vida y la so pallabra.

Na Ilesia Católica, neto na ilesia llatina que nes orientales, l'actu de canonización ta reserváu a la Sede Apostólica, y ocurre al final d'un llargu procesu que requier munches prebes de que'l candidatu a santu viviera y morriera de forma tan santa ya exemplar qu'amerita ser reconocíu como santu. El reconocimientu oficial pola Ilesia de la santidá d'una persona implica qu'esa persona ta yá en Cielu y puede ser públicamente invocada ya nomadad oficialmente na lliturxa, incluyendo la Lletanía de los Santos. La canonización permite tamién la veneración universal del santu na lliturxa del ritu romanu; pa ser veneráu namái llocalmente, nún ámbitu xeográficu determináu, nun fai falta ser declaráu santu, y ye abondo con tener sío nomáu beatu.

Les devociones son «práutiques esternes de piedá» que nun formen parte de la lliturxa oficial de la Ilesia Católica pero son parte de les práutiques espirituales populares de los católicos. Esti términu abarca delles práctiques rellacionaes cola veneración de los santos, y especialmente de la Virxe María. Son devociones, por exemplu, el Vía Crucis, la devoción al Sagráu Corazón de Xesús, los escapularios, les novenes a los santos, les peregrinaciones, la devoción al Santísimu Sacramentu o la veneración d'estatues o cuadros cola imaxe de los santos. Los obispos recordaron a los católicos, nel Conceyu Vaticanu II, que «les devociones deben desarrollarse de forma que tean harmonizaes colos tiempos llitúrxicos, ser axeitaes a lo recoyido na lliturxa y, d'alguna forma, derivaes d'ella, y deben dirixir a la xente a ella porque, en realidá, la lliturxa, pola so propia naturaleza, ye persuperior a toes elles».

La Virxe María

Llámase marioloxía católica al conxuntu de dogmes, doctrines ya creyencies que faen referencia a la vida de María, la ma de Xesús, asina como a la so veneración polos creyentes. María ye oxetu d'un respetu especial por ser la Ma de Dios (en griegu clásicu Θεοτόκος, romanizáu Theotokos), y ye dogma de fe la so virxinidá perpetua, esto ye, que remaneció virxe a lo llargo de tola so vida. Tamién lo son la doctrina de la Inmaculada Concepción, esto ye, que foi concebida ensin la mancha del pecáu orixinal, y l'Asunción de María, ye dicir, que'l so cuerpu xubió al Cielu al final de la so vida. Estes dos caberes creyencies foron establecíes como dogma infalible, respeutivamente, pol papa Pío IX en 1854 y pol papa Pío XII en 1950, pero dempués de tener consultao colos obispos católicos de tol mundu pa comprobar qu'esto yera una creyencia universal.

Les devociones a María formen parte de les espresiones de la piedá católica, pero estrémense del cultu a Dios. Estes devociones inclúin l'arte, la música y l'arquiteutura mariana. Hai delles fiestes marianes a lo llargo del añu llitúrxicu, y María ye honrada con munchos nomes y títulos, como'l de Reina los Cielos. El papa Pablu VI llamóla Ma de la Ilesia porque ser la ma física de Cristu convertíala na ma espiritual de caún de los miembros del Cuerpu de Cristu, esto ye, de la Ilesia. La so influyencia na vida del so fíu fai que los católicos-y dediquen munchos rezos y devociones pa consiguir la so intercesión ante Cristu pa que se cumplan los sos pidimientos: l'Avemaría, el Rosariu, la Salve y el Memorare son dellos de los más populares y espardíos. Otra popular devoción católica ye la peregrinación a los llugares nos que la Ilesia afirma qu'hebo apariciones marianes auténtiques: Lourdes, Fátima, Guadalupe...

Sacramentos

Distribución de les gracies divines per aciu de la Ilesia y los sos sacramentos (panel central del Epitafiu de Wrisberg, obra de Johannes Hopffe, fecha en Hildesheim primeru de 1615).

La Ilesia Católica afirma que se-y confiaron siete sacramentos que foron instituyíos por Cristu. El númberu y la natura d'ellos foi siendo definida por dellos conceyos ecuménicos, y tomaron la so forma actual nel conceyu de Trento. Son el bautismu, la confirmación, la eucaristía, la penitencia, la unción d'amalecíos, l'orde ya'l casamientu. Los sacramentos son rituales visibles que los católicos ven como señales de la presencia de Dios y canales efectivos de la gracia de Dios pa tolos que los reciben con una disposición d'espíritu adecuada (ex opere operato). El Catecismu de la Ilesia Católica divídelos en trés grupos, que reflexen les etapes de la vida natural y espiritual de los fieles católicos: sacramentos d'aniciu cristianu, sacramentos de curación y sacramentos al serviciu de la comunión y la misión de los fieles.

La lliturxa de los sacramentos ye central a la misión de la Ilesia. Como diz el Catecismu:

Na lliturxa del Nuevu Pactu cada acción llitúrxica, especialmente la celebración de la Eucaristía y los sacramentos, ye un encuentru ente Cristu y la Ilesia. La xunidá de l'asamblea llitúrxica deriva de la «comunión del Espíritu Santu», qu'axunta a los fíos de Dios nel Cuerpu de Cristu. Esta asamblea tresciende toles afinidaes humanes: la racial, la cultural, la social...

Acordies cola doctrina de la Ilesia los sacramentos namái son válidos si se faen cola materia, forma ya intención adecuaes. Otramiente, les lleis canóniques neto de la Ilesia Llatina que de les ilesies orientales establecen quién ye'l que puede encargase de celebrar los sacramentos y les condiciones, estrictes en dellos casos, que tienen que cumplir los fieles pa recibilos. Rescampla nesti sentíu, pola creyencia de la Ilesia de que Cristu ta presente na Eucaristía, el fechu de que'l que ye consciente de tar en pecáu mortal tien prohibíu recibir el sacramentu anantes de tener recibíu'l perdón al traviés del sacramentu de la penitencia. Los católicos, amás, avecen a tar obligaos a nun comer polo menos una hora primeru de recibir el sacramentu, que se-yos niega xeneralmente a los non católicos.

Los católicos, inclusive magar que tean en peligru de muerte y nún llugar nel que nun haya un sacerdote católicu cerca, nun pueden pidir la eucaristía, la confesión (penitencia) o la unción d'amalecíos a naide, nin siquiera a un pastor protestante, que nun tea recibío les órdenes relixoses acordies coles normes de la Ilesia. Nel mesmu sen, un sacerdote católicu nun puede, nin siquiera en situación de peligru de muerte, administrar esos sacramentos a los que nun reconocen la fe católica. No que cinca a les ilesies de la cristiandá oriental que nun tán en comunión cola Santa Sede (la Ilesia Ortodoxa y otres) les normes católiques son menos estrictes: permítese, ya inclusive recomiéndase, l'alministración de la eucaristía a fieles d'eses ilesies en circunstancies especiales tres de recibir l'aprobación de l'autoridá de la Ilesia.

Sacramentos d'aniciu

Bautismu

El bautismu ye, na doctrina católica, el primeru de los trés sacramentos d'aniciu como cristianu. Quita tolos pecaos, neto l'orixinal que los propios de la persona, y convierte a esta en miembru de la Ilesia. Como gracia de dios que ye, nun requier méritu dengún de la persona que lu recibe; dafechu, dáse-yos inclusive a los ñácaros, que nun tienen entá pecaos propios pero que lu necesiten pa esborrar el pecáu orixinal. Si un recién nacíu ta en peligru de muerte puede ser bautizáu por cualesquier persona: un médicu, una enfermera, un pariente... El bautismu marca a una persona pa siempres, y nun puede ser repetíu. La Ilesia Católica reconoz como bautismos válidos aquellos alministraos por persones que nun seyan católicos o cristianos siempre que al facelo tengan la intención de bautizar («de facer los que la Ilesia fai cuando bautiza») y que usen la fórmula bautismal trinitaria.

Bautismu de San Agustín. Conxuntu escultóricu de 1549 asitiáu na catedral de Troyes (Francia).

Confirmación

La Ilesia Católica ve esti sacramentu como necesariu pa completar la gracia otorgada por Dios nel bautismu. Cuando'l bautizáu ye un adultu, aveza a dáse-y la confirmación inmediatamente dempués. Nes Ilesies Orientales tamién los ñácaros reciben la confirmación a continuación del bautismu, mentantu que na Ilesia llatina la confirmación retrásase hasta que'l neñu tea la edá suficiente pa entender lo que significa'l sacramentu o hasta que l'obispu decida. El sacramentu, que nel catolicismu recibe'l nome de confirmación, porque confirma la gracia del bautismu, ye nomáu crismación nes Ilesies orientales, una y bones el ritu esencial del sacramentu ye la unción con crisma, un amiestu d'aceite d'oliva y sustancies perfumaes, xeneralmente oleorresina, bendicíu por un obispu. Los que reciben la confirmación tienen que tar n'estáu de gracia, polo que los que quieran recibilu deben llimpiar primero'l so espíritu al traviés del sacramentu de la Penitencia. Ye necesariu, tamién, que tengan intención de recibir el sacramentu y tean preparaos p'amosar, cola so vida, que son cristianos.

Eucaristía

La Eucaristía ye, pa los católicos, el sacramentu que completa la iniciación como cristianu. Descríbeselu como «la fonte y cumal de la vida cristiana». La ceremonia na qu'un católicu recibe la Eucaristía por primer vegada nómase la Primer Comunión.

La celebración eucarística, tamién nomada Misa o Divina Lliturxa, inclúi rezos y llectura de les escritures sagraes, amás de la ofrenda del pan y el vinu, que son llevaos al altar y consagraos por sacerdote, lo que los convierte nel cuerpu y el sangre de Cristu, un cambiu de materia que se conoz como transubstanciación. Les pallabres de la consagración espeyen les que dixo Xesús na Última Cena, na que Cristu ufrió el so cuerpu y la so sangre a los sos apóstoles la nueche anantes de ser crucificáu. El sacramentu re-presenta (fai presente) el sacrificiu de Cristu na cruz, y perpetúalu. La muerte y resurrección de Cristu da la gracia al traviés del sacramentu que xune a los creyentes con Cristu y ente ellos, perdona los pecaos veniales y axuda a evitar que se cometan pecaos mortales (que nun pueden perdonase, pela so banda, namái que al traviés de la Penitencia).

Sacramentos de curación

Los dos sacramentos de sanación son la penitencia y la unción d'amalecíos.

Penitencia

El sacramentu de la Penitencia, tamién nomáu Reconciliación, Perdón, Confesión o Conversión, esiste pa permitir la conversión d'aquellos que, tres del bautismu, separtáranse de Cristu pol pecáu. Son esenciales, pa esti sacramentu, dellos actos: unos, a executar pol pecador (esame de conciencia, contrición y determinación de nun pecar otra vuelta, confesión con un sacerdote y realización de dalguna acción pa reparar el dañu causáu polos sos pecaos), y otros, que correspuenden al sacerdote (determinación d'executar el actu de reparación, y absolución). Los pecaos graves, nomaos pecaos mortales, deben confesase polo menos una vegada al añu, y siempres anantes de recibir la Comunión; la confesión de los pecaos menores, nomaos pecaos veniales, recomiéndase tamién, pero nun ye obligatoria. Los sacerdotes tán obligaos, baxo l'amenaza de les penes más severes, a caltener el secretu de confesión, esto ye, el secretu absolutu sobro los pecaos que-yos fueren revelaos en confesión.

Unción d'amalecíos

Representación pictórica de la Estrema Unción (Unción d'Amalecíos) nel Trípticu de los Siete Sacramentos, pintáu por Rogier van der Weyden, c. 1445.

El crisma ye un aceite usáu p'alministrar los trés sacramentos d'aniciu, los que nun pueden ser repetíos. P'alministrar la unción d'amalecíos úsase un aceite diferente col que un sacerdote o obispu bendiz a un católicu que, pola so avanzada edá o la enfermedá, ta en peligru de muerte. Esti sacramentu conforta, da paz y valor al enfermu y inclusive, si'l creyente nun ta en condiciones de poder confesar, perdóna-y los sos pecaos.

Esti sacramentu, nomáu tamién Unción, y nel pasáu Estrema Unción, ye, xunto cola Penitencia y el Viáticu, que ye'l nome de la comunión que se-y da a los que tán a piques de morrer, ún de los trés sacramentos que formen los caberos ritos.

Sacramentos al serviciu de la comunión

Según el catecismu de la Ilesia hai dos sacramentos de comunión que tienen como fin la salvación d'otros: l'orde ya'l casamientu. Dientru de la vocación xeneral de ser cristianu estos dos sacramentos «consagran pa desarrollar una misión o vocación específica ente la xente de Dios. Los homes reciben los ordes sagraos p'alimentar a la Ilesia al traviés de la pallabra y la gracia. Los esposos cásense pa que'l so amor seya fortificáu pa permití-yos cumplir colos deberes del so estáu».

Ordes sagraos

El sacramentu de l'Orde consagra y encomienda a dellos cristianos pa que sirvan a toa la Ilesia como miembros d'ún de los trés graos d'orde: episcopáu (obispos), presbiteriu (sacerdotes) y diaconáu (diáconos). La Ilesia tien definío les regles que definen quién puede recibir estos ordes. Na Ilesia Llatina el sacerdociu ta xeneralmente reserváu pa homes célibes, y l'episcopáu ta siempres restrinxíu a homes célibes. Los homes casaos pueden ser ordenaos en delles ilesies orientales, y pueden recibir, en determinaes condiciones, el diaconáu, inclusive na Ilesia Llatina. Sicasí, tres de convertise en sacerdote un home nun puede casase hasta que renuncie formalmente a los sos ordes y tea formalmente laicizáu.

Tolos clérigos, seyan diáconos, sacerdotes o obispos, pueden predicar, enseñar, bautizar, casar y dirixir lliturxias funerales. Pa administrar los sacramentos de la Eucaristía, la Penitencia y la Unción d'Amalecíos ye necesario ser sacerdote o obispu, y namái los obispos pueden alministrar el sacramentu del Orde.

Casamientu

La Ilesia católica considera'l casamientu como un vínculu social ya espiritual ente un home y una muyer, enfocáu hacia'l bien de los esposos y la procreación; acordies coles enseñances católiques en moral sexual, ye l'únicu contestu apropiáu pal desarrollu de l'actividá sexual. Un matrimoniu católicu, o cualesquier casamientu ente individuos bautizaos de cualesquier denominación, ye consideráu un sacramentu. Un casamientu sacramental nun puede ser disueltu más que por la muerte. La Ilesia, d'otra banda, pon ciertos requisitos, como que l'actu seya llibremente consentíu, pa que'l casamientu seya válidu, y establez tamién una serie de normes y regles, nomaes forma canónica, a siguir polos católicos.

La Ilesia nun reconoz el divorciu como final d'un casamientu válidu, y permite'l divorciu llegal, reconocíu pol estáu, namái como una midida pa protexer les propiedaes o el bienestar de los esposos o los sos fíos. Sicasí, delles circunstancies particulares pueden ser tomaes en cuenta por un tribunal eclesiásticu específicu, que puede declarar la nulidá del matrimoniu; nun ta permitíu casase otra vuelta tres d'un divorciu a menos que'l casamientu primeru fora declaráu nulu.

Lliturxa

Esisten munches tradiciones, llitúrxiques y d'otra triba, ente les 24 ilesies autónomes (sui iuris). Estes tradiciones, nomaos ritos, espeyen, más que diferencies nes cereyencies, la diversidá histórica y cultural de les ilesies. Según la definición del Códigu de Cánones de les Ilesies Orientales, «un ritu ye la herencia llitúrxica, teolóxica, espiritual y disciplinaria, estremada pola cultura de los pueblos y les sos circunstancies históriques, qu'alcuentra so espresión na forma que caúna de les ilesies sui iuris tien de vivir la fe».

La lliturxa del sacramentu de la Eucaristía, nomada Misa na Ilesia Llatina y Divina Lliturxa nes orientales, ye la principal lliturxa de la Ilesia Católica, porque considérase que fai otra vuelta presente'l sacrificiu propiciatoriu de Cristu. La so forma llitúrxica más estendida ye'l ritu romanu, desarrolláu na forma promulgada pol papa Pablo VI en 1969 y revisada por Xuan Pablu II. La versión previa del ritu romanu, codificada en 1962, sigue pudiendo usase, en circunstancies determinaes, la Ilesia Llatina. Les ilesies católiques orientales, pela so banda, tienen los sos propios ritos. Les lliturxes, eucarística y de los otros sacramentos, varíen de ritu en ritu, espeyando los diferentes énfasis teolóxicos.

Ritos de la Ilesia Llatina

Edición de 2002 del Misal romanu, acompangáu de cáliz cubiertu con purificador, patena y palia, crucifixu y vela.

El ritu romanu ye'l ritu de cultu más común usáu pola Ilesia Católica. El so usu, magar que nacíu en Roma, espardióse primero per Europa y dempués pol restu del mundu, influenciando o suplantando ritos llocales. L'actual forma ordinaria de la Misa nel ritu romanu, recopiláu nes ediciones posteriores a 1969 del Misal romanu, celébrase xeneralmente na llingua vehicular llocal, usando una traducción oficialmente aprobada del testu orixinal en llatín.

En 2007 el papa Benitu XVI afirmó que yera llexítimu siguir usando'l Misal romanu de 1962 como una forma extraordinaria del ritu romanu, a la que noma usu antiguu (usus antiquior), y asoleyó nueves normes, más permisives que les anteriores, pa regular el so usu. Una instrucción asoleyada cuatru años dempués falaba de les dos formas o usos del ritu romanu aprobaes pol papa colos nomes de forma ordinaria y forma extraordinaria.

La edición del misal romanu de 1962, espublizada unos meses primeru de la inauguración del Conceyu Vaticanu II, foi la cabera que presentó la misa siguiendo la estandarizada en 1570 pol papa Píu V por encargu del conceyu de Trento, y ye, poro, conocida como misa tridentina. El misal romanu de Píu V foi sometíu a cambeso menores polos papes Clemente VIII en 1604, Urbanu VIII en 1634, Píu X en 1911, Píu XII en 1955 y Xuan XXIII en 1962. Caúna de les ediciones sucesives foi la forma ordinaria del ritu romanu hasta que foi sustituyida por una posterior. Cuando la edición de 1962 foi sustituyida pola promulgada por Pablo VI en 1969 el so usu requería'l permisu del obispu de la diócesis; pero'l motu proprio (documentu emitíu por iniciativa propia pol papa ensin que se-y pida) Summorum Pontificum, emitíu por Benitu XVI en 2007, permitió'l so usu llibre pa celebrar misa siempre de forma privada, y autorizó a los párrocos a permitir, embaxu ciertes condiciones, su usu en mises públiques. Les mises d'esti misal celébrense, sacante les llectures de la Biblia, que faense en llingua vernácula, esclusivamente en llatín llitúrxicu.

De magar 2014 los clérigos que dirixen los pequeños ordinariatos personales formaos p'agospiar a grupos d'antiguos anglicanos convertíos al catolicismu embaxu los términos del documentu Anglicanorum Coetibus, de 2009, tán autorizaos a utilizar una variación del ritu romanu nomada Cultu Divinu o, menos formalmente, Usu del Ordinariatu, qu'incorpora elementos de la tradición y la lliturxa anglicanes. Los cabezaleros de la Ilesia Anglicana protestaron por esti alcuerdu.

Na archidiócesis de Milán, que ye la mayor d'Europa con cinco millones de fieles, la misa celébrase acordies col ritu ambrosianu, y hai otros ritos de la Ilesia Llatina, el mozárabe y los propios de dellos institutos relixosos, que siguen tando autorizaos por ser polo menos 200 años más antiguos de la publicación, en 1570, de la bula papal Quo primum, cola que Píu V instituyó'l misal romanu.

Ritos orientales

Les Ilesias Católiques orientales comparten patrimoniu y ritos llitúrxicos coles ilesies non católiques (la Ilesia Ortodoxa y otres ilesies cristianes orientales que nun tán en comunión col papa) coles que comparten esfera d'influyencia: Rusia, el Cáucasu, los Balcanes, l'África nororiental, India ya Oriente Mediu. Les Ilesies Católiques Orientales son grupos de fieles que o nun tuvieran nunca en comunión cola Santa Sede o que recuperáronla a costa de tener perdío la comunión coles ilesies coles que comparten tradición histórica.

Los ritos usaos poles Ilesies Católiques Orientales incluyen, amás del bizantín, nes sos variedaes antioquiana, griega y eslavona, l'alexandrín, el siriacu, l'armeniu, el maronita y'l caldéu. Estes ilesies tienen autonomía p'afitar les particularidaes de les sos fórmules llitúrxiques y de cultu, con ciertes llendes marcaes pa protexer la «observancia adecuada» de la so tradición llitúrxica. Nel pasáu dellos de los ritos anguaño usaos por estes ilesies sofrieron un grau variable de llatinización llitúrxica, pero nos caberos años volviose, acordies col decretu papal Orientalium Ecclesiarium, emanáu del Conceyu Vaticanu II, a les práutiques tradicionales d'esta zona. Cada ilesia, amás, tien el so propiu calendariu llitúrxicu.

Aspectos sociales ya culturales

Doctrina social de la Ilesia

Artículu principal: Doctrina social de la Ilesia

La doctrina social de la Ilesia, espeyando l'esmolimientu de Xesús polos probes, enfótase enforma nes obres corporales ya espirituales de misericordia, que representen acciones de sofitu a los enfermos, los probes y los que sufren. La enseñanza de la Ilesia defende la so opción preferencial polos probes, mentantu que la llei canónica establez que «el fiel cristianu ta obligáu a trabayar en favor de la xusticia social y, atentu al llamáu del Señor, a axudar a los probes». Los cimientos de l'actual pensamientu social de la Ilesia considérase que foron establecíos pol papa Lleón XIII na encíclica Rerum novarum (1891), qu'afita los derechos y la dignidá del trabayu y el derechu de los trabayadores a formar sindicatos.

Les enseñances católiques alrodiu de la sexualidá promueven la práctica de la castidá, poniendo'l focu nel caltenimientu de la integridá corporal ya espiritual de la persona. Considérase al matrimoniu como l'únicu contextu admisible pa la actividá sexual. Les enseñances de la Ilesia no que cinca a la sexualidá vienen siendo oxetu de controversia creciente, especialmente de magar el final del Conceyu Vaticanu II, por culpa'l cambéu de les actitúes culturales hacia'l sexu nel mundu occidental, que cristalizaron no que se llamó la revolución sexual.

La Ilesia tamién sofita'll cuidáu del mediu ambiente, y en rellación con otros aspectos sociales, la encíclica Laudato si', espublizada pol papa Franciscu el 24 de mayu de 2015, critica el desarrollu irresponsable ya'l consumismu, y amuesa esmolición pola degradación ambiental y el calentamientu global. El papa espresa, nesi documentu, la so preocupación porque, pa elli, el calentamientu global del planeta ye un síntoma d'un problema mayor: la indiferencia del mundu desarrolláu hacia la destrucción del planeta debida a que lo únicu que preocupa a los homes ye la ganancia económica a cortu plazu.

Servicios sociales

La Madre Teresa de Calcuta, fundadora de les Misioneres de la Caridá y defensora de los probes y los amalecíos, nuna semeya de 1986.

La Ilesia Católica ye'l mayor proveedor non gubernamental d'educación y servicios sanitarios del mundu. En 2010 el Conceyu Pontificiu pa l'Asistencia Pastoral a los Trabayadores de la Salú afirmó que la Ilesia dirixe'l 26% de los establecimientos sanitarios (incluyendo hospitales, clíniques, incluses, farmacies y centros de curiáu de pacientes con llépara) del mundu. No que cinca a la educación, la Ilesia tien involucráose nesa estaya de la vida social de magar la fundación de les primeres universidaes n'Europa. Dirixe y patrocina milenta escueles d'educación primaria, secundaria ya universitaria pel tol mundu, y el de so ye'l mayor sistema escolar non gubernamental del planeta.

Los institutos relixosos de muyeres foron y son les cabezaleres del esfuerciu de la Ilesia na provisión de servicios sanitarios ya educativos, con ordes como les Hermanes de la Misericordia, les Hermanines de los Probes, les Hermanes del Santísimu Sacramentu o les Fíes de la Caridá de San Vicente de Paúl. La monxa católica Teresa de Calcuta, fundadora de les Misioneres de la Caridá, recibió'l premiu Nobel de la Paz en 1979 pol so trabayu humanitariu colos más probes de la India. L'obispu Carlos Filipe Ximenes Belo recibió esi mesmu premiu en 1996 «pol so trabayu p'algamar una solución xusta ya pacífica al conflictu de Timor Oriental».

La Ilesia tamién participa activamente na axuda humanitaria internacional al desarrollu al travíes d'organizaciónes como Caritas Internacional, Catholic Relief Services, Axuda a la llesia Necesitada, de grupos de sofitu a los refuxaos, como'l Serviciu de Refuxaos de los Xesuites, y comunidaes y grupos como la Sociedá de San Vicente de Paúl.

Moral sexual

La Ilesia Católica llama a tolos sos miembros a practicar la castidá acordies col so estáu na vida. La castidá inclúi la templanza, l'autodominiu, el crecimientu personal ya cultural y la gracia divina. Y algamala obliga a evitar la lluxuria, la masturbación, la fornicación, la pornografía, la prostitución y, especialmente, la violación. La castidá, p'aquellos que nun tan casaos, implica vivir en continencia, absteniéndose de l'actividá sexual; los casaos tán llamaos, pela so banda, a la castidá conyugal.

La Ilesia enseña que l'actividá sexual ta reservao a pareyes casaos, seya en matrimoniu sacramental ente cristianos o en matrimoniu natural, cuando ún o dambos de los esposos nun tán bautizaos. Inclusive nos noviazgos, y particularmente colos novios yá prometíos, los dos compañeros sentimentales son llamaos a la continencia como mou de demostrar el respetu y la fidelidá mutuos. La castidá nel matrimoniu obliga a la fidelidá conyugal y a la proteición de la fecundidá nel matrimoniu. Los esposos deben trabayar na confianza y la honestidá na pareya, y compartir la so intimidá, neto la espiritual que la física. L'actividá sexual tien que tar siempres abierta a la posibilidá de la vida: la Ilesia lláma-y a esto la significancia procreativa. El sexu, amás, tien que contribuyir siempre a que la pareya ámese más; ye lo que la Ilesia llama la significancia xunitiva.

L'usu de contraceptivos y la realización de práctiques sexuales non encaminaes a la procreación nun tán permitíos; sicasí, consiéntense l'usu de métodos de planificación familiar naturales pa espaciar el periodu ente nacimientos de los fíos o pa posponer la concepción d'un neñu por una causa xustificada. El papa Franciscu dixo en 2015 que ta preocupáu porque la Ilesia tien obsesionáose con cuestiones como l'albuertu, el matrimoniu de persones del mesmu xéneru y la contracepción, y criticó que la Ilesia punxera'l dogma per delantre del amor y que priorizara les cuestiones morales sobre l'axuda a los probes y marxinaos.

Divorciu y nulidá matrimonial

La llei canónica nun recueye una forma de proceder pal divorciu de dos individuos bautizaos, una y bones considera que'l casamientu sacramental válidu y consumáu ye un vínculu que xunce pa tola vida. Por embargu, puede obtenese una declaracion de nulidá probando que les condiciones esenciales pa contraer un matrimoniu válidu nun taben presentes dende l'aniciu; esto ye, que'l matrimoniu nun fora válidu de primeres por dalguna causa. Una declaración de nulidá, nomada comúnmente anulación, ye una sentencia d'un tribunal eclesiásticu que determina qu'un casamientu foi intentáu de forma inválida. Aparte d'eso, los casamientos ente individuos non bautizaos pueden ser disueltos con permisu del papa embaxu delles circunstancies, como'l deseyu de casase con un católicu: ye'l nomáu privilexu paulín o petrín. El intentu de casase por segunda vegada tres d'un divorciu y ensin obtener la nulidá coloca al «esposu recasáu nuna situación de adulteriu permanente ya públicu». Un esposu inocente que vive en continencia tres del divorciu, o les pareyes que viven en continencia tres d'un divorciu civil por causa grave, nun tán en pecáu.

Los tribunales diocesanos completaron, a nivel mundial, 49.000 causes de nulidá. Un númberu perpequeñu comparáu col de divorcios nos países predominantemente católicos, que tienen aprobao lleis de divorciu nes caberes décades: Italia (1970), Portugal (1975), Brasil (1977), España (1981), Irlanda (1996), Chile (2004) y Malta (2011). Filipines y la Ciudá del Vaticanu, pela so banda, nun tienen reconocíu'l derechu al divorciu (en Filipines, sicasí, los musulmanes sí que pueden divorciase).

Contracepción

Pablu VI asoleyó la encíclica Humanae Vitae en 1968.

La Ilesia enseña que les rellaciones sexuales deben tener llugar namái ente un home y una muyer que tean casaos, y debe consumase ensin usar métodos contraceptivos. Na so encíclica Humanae Vitae, de 1968, el papa Pablu VI refugó con firmeza toa triba de métodos anticonceptivos, contradiciendo a dellos sectores de la Ilesia que víen la píldora anticonceptiva como un métodu de contracepción éticamente xustificable, magar que permitiendo la regulación de los embarazos mediante métodos naturales de planificación familiar. Esta doctrina foi detallada por Xuan Pablu II na so encíclica Evangelium Vitae, na qu'esclarió la postura de la Ilesia no que cinca a la contracepción, l'albuertu y la eutanasia, condenando toos ellos como parte d'una «cultura de la muerte» y faciéndo un llamáu en favor d'una «cultura de la vida».

Munchos católicos occidentales tienen amosao el so fondu desalcuerdu coles enseñances de la Ilesia no que cinca a la contracepción. Una organización católica independiente d'Estaos Xuníos de la Ilesia, Catholics for Choice, afirmó en 1998 que'l 96% de les muyeres católiques d'esi país usaran contraceptivos en dalgún momentu de les sos vides, y que'l 72% de los católicos creyíen qu'ún podía ser bon católicu magar que desobedeciera la doctrina de la Ilesia relativa a la contracepción. Por otra parte, como les instituciones sanitaries venceyaes a la Ilesia son ún de los mayores proveedores de servicios de salú a pacientes con SIDA a nivel mundial, hai una polémica importante, dientru y fuera la Ilesia, sobre l'usu del preservativu como un métodu pa evitar contaxos, una y bones la Ilesia refuga l'usu cotidianu del preservativu como métodu anticonceptivu.

La Ilesia opónese tamién a la fertilización in vitro porque afirma qu'esi procesu artificial sustitúi al amor ente un maríu y una muyer, y tamién porque obliga a la eliminación d'embriones, y los católicos percreyen qu'un embrión ye un individuu cola so propia alma y debe, poro, ser tratáu como talo. Esti argumentu ye nel que se basa la Ilesia pa oponese al albuertu.

Homosexualidá

La Ilesia Católica considera que los «actos homosexuales» son «contrarios a la llei natural», «actos de depravación graves» que «nun pueden ser aprobados en denguna circunstancia», magar que les persones que tienen tendencies homosexuales deben ser trataes con respetu y dignidá. Según el so catecismu

«El númberu d'homes y muyeres que tienen tendencies homosexuales fondamente asentaes nun son pocos. Esta inclinación, que ye obxetivamente desordenada, supón pa la mayoría d'ellos una preba. Toos ellos tienen que ser aceptaos con respetu, compasión y sensibilidá. Cualesquier signu de disciminación inxustificada en cualquie sentíu debe ser evitáu. (...) Les persones homosexuales son llamaes a la castidá. Al traviés de virtúes d'autocontrol q'eduquen la llibertá interior, a veces cola axuda de l'amistá desinteresada, de la oración y de la gracia sacramental estes persones pueden, y deberíen, averase de forma gradual y decidida a la perfección cristiana.»

Esta parte del Catecismu foi citada pol papa Franciscu nuna rueda de prensa en 2013 na que recalcó, cuando foi preguntáu por una persona concreta:

«Yo creo que cuando t'encuentres delantre d'una persona como esa [l'individuu del que-y falaben] debes estremar ente'l fechu de qu'una persona seya gai del fechu de que forme parte d'un grupu de presión, porque los grupos de presión nun son bonos, son malos. Si una persona ye homosexual y busca al Señor con bona voluntá, ¿quién soi yo pa xulgalu?»

Estes apreciaciones, y otres asemeyaes feches na mesma entrevista, foron vistes como un cambéu nel tono, que non na sustancia, de la enseñanza de la Ilesia, qu'inclúi'l so rechazu del matrimoniu ente persones del mesmu sexu. Sicasí, hai dellos grupos católicos opuestos a esta posición de la Ilesia que trabayen pa camudalu.

Ordenación femenina

Lady Theodora, la ma del papa Pascual I, piénsase que fue obispu na Ilesia Católica nel sieglu IX.

Homes y muyeres comparten munches ocupaciones na Ilesia: hai persones de los dos sexos dedicaes a la vida contemplativa, a l'atención sanitaria, al trabayu como misioneros... Y magar que les Órdenes Sagraes tán reservaes pa los homes les muyeres católiques tienen xugao dellos papeles relevantes na vida la Ilesia: los institutos relixosos femeninos diéron-yos un espaciu formal pa la so participación, y los conventos diéron-yos un espaciu propiu nel qu'autogobernase, rezar ya influyir na sociedá deimentres munchos sieglos. Les hermanes y monxes tienen xugao un papel fundamental nel desarrollu y el funcionamientu de les redes mundiales de prestación de servicios educativos y sanitarios de la lIlesia.

Los esfuercios en favor de la ordenación sacerdotal de muyeres provocaron delles declaraciones de papes y de la curia romana escontra la idea, como la Declaración Inter Insigniores sobre la cuestión de l'admisión de muyeres nel ministeriu sacerdotal (1976) o les cartes apostóliques Mulieris dignitatem (1988) y Ordinatio sacerdotalis (1994). Na cabera d'elles Xuan Pablu II afirmó que la Ilesia Católica «nun se considera a sigo mesma autorizada a almitir muyeres na ordenación sacerdotal». Desafiando estes declaraciones, grupos opositores como Roman Catholic Womenpriests (Sacerdotises de la Ilesia Católica) tienen celebrao ceremonies que consideren ordenaciones sacerdotales (al parecer, con un obispu católicu home dirixendo la ceremonia) y que, acordies cola llei canónica, son ilícitos ya inválidos y consideraos pola Ilesia simples simulaciones del sacramentu del orde. La Congregación pa la Doctrina de la Fe espublizó una declaración na que clarifica que cualesquier obispu católicu involucráu en ceremonies d'ordenación de muyeres, neto que les propies muyeres si foran católiques, seríen automáticamente excomulgaes acordies colo recoyío nel canon 1378 de la llei canónica y con otres lleis de la Ilesia.

Abusos sexuales

De magar la década de 1990 la cuestión de los abusos sexuales a menores por miembros (sacerdotes o non) de la Ilesia Católica convirtióse n'oxetu de denuncies, de persecución xudicial, de cobertura nos medios de comunicación y de discutiniu públicu en países de tol mundu. La Ilesia Católica tien sío criticada pol so manexu de les denuncies cuando foi descubiertu que dellos obispos protexeron a los sacerdotes acusaos, tresfiriéndolos a otres xeres pastorales nos que, delles vegaes, siguieron cometiendo abusos sexuales.

En rempuesta al escándalu estableciéronse procedimientos formales p'axudar a prevenir l'abusu, pa favorecer la comunicación de cualquier casu qu'ocurra y atender eses denuncies con rapidez, magar que les asociaciones que representen a les víctimes son escéptiques alrodiu de la so efectividá. En 2014 el papa Franciscu instituyó la Comisión Pontificia pa la Proteición de los Menores, que tien como oxetivu velar polos menores.

Bibliografía

• Barry, Rev. Msgr. John F. One Faith, One Lord: A Study of Basic Catholic Belief. Gerard F. Baumbach, Ed.D, 2001. ISBN 0-8215-2207-8.
• Bokenkotter, Thomas. A Concise History of the Catholic Church. Doubleday, 2004. ISBN 0-385-50584-1.
• Catecismu de la Ilesia Católica. Libreria Editrice Vaticana, 1994.

• Duffy, Eamon, Saints and Sinners, a History of the Popes. Yale University Press, 1997. ISBN 0-300-07332-1.
• Kreeft, Peter. Catholic Christianity. Ignatius Press, 2001. ISBN 0-89870-798-6.
• MacCulloch, Diarmaid. Christianity: The First Three Thousand Years. Viking, 2010. ISBN 978-0-670-02126-0. Publicáu orixinalmente, col nome, A History of Christianity, por Allen Lane.
• Marthaler, Berard. Introducing the Catechism of the Catholic Church, Traditional Themes and Contemporary Issues. Paulist Press, 1994. ISBN 0-8091-3495-0.

• O'Collins, Gerald; Farrugia, Maria. Catholicism: The Story of Catholic Christianity. Oxford University Press, 2003. ISBN 978-0-19-925995-3.
• Schreck, Alan. The Essential Catholic Catechism. Servant Publications, 1999. ISBN 1-56955-128-6.

Enllaces esternos

• Páxina web oficial de la Santa Sede (vatican.va)
• Vatican News. Canal oficial del Vaticanu en youtube

• Datos: Q9592
• Multimedia: Catholic Church